Ilesia de Santa María de Narzana

Ilesia de Santa María de Narzana
Bien d'Interés Cultural
ilesia y monumentu
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Sariegu
Coordenaes	43°24′55″N 5°34′30″W
Ilesia de Santa María de Narzana Ilesia de Santa María de Narzana (Asturies)
Historia y usu
Orixe del nome	María
Patrimoniu
BIC	RI-51-0001633

La Ilesia de Santa María de Narzana ta asitiada nel conceyu asturianu de Sariegu, al llau del monte La Llomba, na parroquia de Narzana, nun altu dende'l que se columbra cuasi tol conceyu, parte de Siero ya Uviéu e inclusive los Picos d'Europa.

Apaez documentada per primer vez nun inventariu de bienes datáu en 1220, que yera propiedá del monesteriu de San Pelayu d'Uviéu. Tamién apaez na Nómina de parroquies del llibru becerru de la Catedral d'Uviéu, redactada ente los años 1385 y 1386, onde se diz que'l monesteriu de San Pelayu d'Uviéu presentaba los capellanes de Santa María de Narzana al obispu d'Uviéu y recibía la metá de los diezmos de la parroquia. La ilesia pudo ser construyida pol monesteriu de San Pelayu, puesto que dependía d'esti cenobiu, y amás presenta numberoses conexones estilístiques col románicu d'Uviéu, que se combinen coles propies de los templos vecinos de Villaviciosa.

Arquiteutura

La Ilesia de Santa María de Nazana foi construyida ente finales del sieglu XII y principios del sieglu XIII. La so planta compónse d'una nave rematada nuna cabecera que sigue'l plantegamientu benedictín d'ábside semicircular precedíu d'un tramu rectu presbiterial. L'aparexu emplegáu na fachada, nel ábside y na cabecera ye de sillares bien encuadraos, mientres que les muries llaterales de la nave son de sillarexu, cubiertu anguaño mediante revoque.

Un pequeñu pórticu, adosáu al pical occidental del templu en dómina moderna, protexe la portada, que ta cubierta con un bistechu y consta de tres arquivoltes semicirculares, recorríes por guardapolvu, que reposen en columnes coronaes por capiteles les dos esteriores y en xambes la interior.

La cubierta de la nave ye a dos agües y ta rematada con dos bistechos nos llaos norte y sur, con moldura senciella y canecinos desorniaos. La cabecera, que presenta gran semeyanza cola cercana ilesia de San Esteban d'Aramil (Siero), ta formada por un ábside semicircular, precedíu d'un tramu rectu y cuenta con una cornisa que reposa en canecinos. Ta percorría por una imposta decorada con fueyes de punta de llanza y medies boles, y nel centru'l ábside apaez una ventana compuesta por una arquivolta protexida por guardapolvu y dos columnes remataes con capiteles.

Nel interior, la nave ta cubierta con entramáu de madera a dos agües. En cauna les muries septentrional y meridional abriéronse tres ventanes romániques estreches de remate semicircular. L'arcu de triunfu que da pasu a la cabecera, tien doble arquivolta apuntada protexida por guardapolvu que reposa en tres columnes a cada llau. La cabecera ta cubierta con bóveda de cañón nel tramu rectu y con bóveda de cuartu d'esfera nel ábside, nel que s'asitia la ventana yá mentada enantes.

Ornamentu

Portada

Na portada les arquivoltes tan perfilaes en bocel y tán adornaes mediante zigzag, entrellaciaos y tetrapétales, coles que tamién ta decoráu'l guardapolvu y parte de los cimacios. Na imposta de la izquierda represéntase una escena cinexética na qu'apaez un monteru clavando una llanza a un xabaril, que de la mesma ye acorripiáu por un perru que-y muerde la cerviz. Un numberosu grupu de templos de la zona de Villaviciosa cuenten con escenes de la montería del xabaril, anque la qu'alcontramos en Narzana, magar que'l so esquematismu, ta influyida por otra representación de la Cámara Santa qu'usa'l mesmu esquema compositivu y ta asitiáu tamién nun cimaciu (el que corona'l capitel de Santiago'l Mayor y San Xuan), mientres que les escenes asemeyaes de los templos de Villaviciosa tán siempres nos capiteles.

Enllaces esternos

• Wikimedia Commons tien conteníu multimedia tocante a Ilesia de Santa María de Narzana.

• Datos: Q5911696
• Multimedia: Church of Santa María de Narzana