Ilesia de San Vicente (Serrapio)
Ilesia de San Vicente (Serrapio) | |
---|---|
Bien d'Interés Cultural | |
ilesia y monumentu | |
![]() | |
Llocalización | |
País | ![]() |
Autonomía | ![]() |
Provincia | ![]() |
Conceyu | ![]() |
Coordenaes | 43°10′01″N 5°38′03″W / 43.166992°N 5.634264°O |
Historia y usu | |
Orixe del nome |
Vicente de Huesca (es) ![]() |
Diócesis | Archidiócesis d'Uviéu |
Patrimoniu | |
BIC | RI-51-0003858[1] |
![]() |
La ilesia de San Vicente de Serrapio ta asitiada na parroquia de Serrapio, nel conceyu d'Ayer. Ocupa un altu con bones vistes del valle mediu del conceyu ayerán, a un quilómetru del pueblu que-y da nome.
La so historia ye llarga. Llevantose, a lo que parez enriba de restos de la dómina de los romanos, a finales del sieglu XII. D'esa época paecen ser la sacristía y los trés ábsides. En fecha desconocida reformáronse les paredes llaterales de la nave y l'imafronte. Na década de los 80 del sieglu XIX añadiéronse-y el cabildru, el bautisteriu y un cuartu, nel poniente del templu, nel que se conserven delles llábanes de dómina romana, y, en 1887, reparáronse l'ábside y les pintures del interior. Pa finar, en 1985 fízose-y una última restauración.
En cuantes a la so estructura, ye de traza románica, y al entamu tenía una única nave. Anguaño tien trés naves, con un triple ábside: el central tien un remate semicircular, y cuadráu los de los llaos, y toos ellos cubren con bóveda de cañón. Techa en madera, con teyáu a dos agües. El cabildru, decimonónicu, ocupaba los llaos sur y este de la ilesia. Anguaño, nostante, namái se conserva con esa función na fastera meridional; el tramu del este zarrose pa formar una especie de nave llateral del templu.
En cuantes a la decoración, rescamplen: l'arcu de trunfu, con dos archivoltes sobre columnes con capiteles con decoración figurativa, zoomórfica y antropomórfica; y la decoración, antropomórfica y figurativa, de la cornisa del ábside central. Dientro del templu hai pintures al fresco, con motivos xeométricos, nel ábside y na sacristía. No que cinca a les llábanes, destaca la dedicada a Júpiter Óptimo y Máximo por los clanes astures de los Arronidaeci y los Coliacini. El testu que contién ye'l siguiente: Iobi Optimo / El Maxumo / Sacrum Arro / Nidaeci et Col / Iacini Pro Sal / Ute Sibi et Su / Is Posverunt.
Foi declarada monumentu histórico-artísticu el 15 de payares de 1983.
Bibliografía
[editar | editar la fonte]- Cobo Arias, Florencio, Cores Rambaud, Miguel, Zarracina Valcarce, Matilde, Guía básica de monumentos asturianos. Uviéu, Serviciu de Publicaciones del Principáu d'Asturies, 1990.
Referencies
[editar | editar la fonte]- ↑ «base de datos de monumentos de Wiki Loves Monuments» (13 payares 2017).