Horiometría

De Wikipedia
Saltar a navegación Saltar a la gueta

Horiometría y horiométricu -a -o son neoloxismos que creó l'equipu d'investigación del Proyeutu ETLEN, del Seminariu de Filoloxía Asturiana de la Universidá d'Uviéu (Asturies, España), encabezáu por Ramón d'Andrés Díaz, Fernando Álvarez-Balbuena García y Xosé Miguel Suárez Fernández. Esos neoloxismos, del griegu ὅριον 'frontera, raya' y μέτρον 'midida', refiérense al midimientu matemático-estadísticu d'una frontera llingüística.

La frontera llingüística nel Eo-Navia (Asturies)[editar | editar la fonte]

El Proyeutu Estudiu de la Transición Llingüística na Zona Eo-Navia, Asturies (ETLEN), entamáu l'añu 2000, propónse midir con arbíes matemático-estadístiques la frontera ente los dominios llingüísticos gallego-portugués y asturlleonés dientro d'Asturies, que vien siendo asitiada nel fexe d'isogloses que recuerre de Norte a Sur la conca del ríu Navia (Asturies). La zona más occidental d'Asturies, ente los ríos Eo y Navia, ye la «faza del Eo-Navia». Ellí fálase un conxuntu de variedaes dialeutales que la dialeutoloxía tien adscrito –por aciu d'evaluación de trazos llingüísticos– al dominiu llingüísticu gallego-portugués. Con más precisión, tien tratáose como un gallegu de transición al asturianu, pola presencia simultánea d'un abondosu númberu de trazos propios del asturlleonés. Les fales del Eo-Navia reciben dellos nomes: gallego-asturianu, gallegu d'Asturies, eonaviegu; en denominación popular, a fala 'la fala', y con un claru conteníu autodespectivu, chapurriao.

Taxonomía horiométrica[editar | editar la fonte]

La horiometría desendolcada pol Proyeutu ETLEN básase na posibilidá de clasificar una gran cantidá de trazos llingüísticos diferenciales, adscribiéndolos al dominiu llingüísticu «oriental» (asturlleonés) o «occidental» (gallego-portugués), descartando los que pertenecen a dambos dominios por nun ufrir base contrastiva, y adscribiendo a la «zona axial» los trazos esclusivos del fexe d'isogloses o gallego-asturianu –cosa qu'ocurre nun númberu escasu de casos–. Estes operaciones taxonómiques fáense tres d'un esame detalláu de la distribución xeográfica de los distintos fenómenos y trazos llingüísticos. Ye interesante constatar que, en xeneral, nun s'atopen dificultaes pa taxonomizar los trazos.

Como fonte de los datos dialeutales, el Proyeutu ETLEN valse d'un cuestionariu iguáu ad hoc pa la investigación, que recueye unos 500 fenómenos llingüísticos que dan pie a más de 2.000 respuestes. La zona encuestada abarca 40 puntos xeográficos (llugares) de los conceyos del Eo-Navia (gallego-asturianu), con delles penetraciones na zona limítrofe del asturianu occidental y del gallegu oriental. El procesamientu de los datos taxatorios horiométricos del Proyeutu ETLEN consíguese gracies a l'aplicación informática CartoDial (Cartografía Dialeutal), desenrollada pol Departamentu d'Informática de la Universidá d'Uviéu en Xixón. Esta aplicación permite visualizar nun mapa de la zona la proporción de trazos «orientales», «occidentales» y «axiales» que correspuende a cada puntu xeográficu. CartoDial permite tamién xenerar mapes dialeutográficos como los d'un atles dialeutal clásicu.

Horiometría y conceptu de dominiu llingüísticu[editar | editar la fonte]

L'equipu del Proyeutu ETLEN concibe la horiometría como una dialeutometría de frontera dialeutal, basada en criterios estrictamente glotolóxicos. La horiometría fúndase nel presupuestu epistemolóxicu de que'l dominiu –como conceptu dialeutolóxicu– ye de naturaleza glotolóxica, quier dicise, ta construyíu con elementos puramente llingüísticos (los trazos o isogloses), y non con elementos de mena sociolóxica o cultural como la conciencia de los falantes o la identidá histórica. Ello ye asina desque'l conceptu d' isoglosa o diferencialidá ente dos trazos adscritos a un mesmu fenómenu, ye tamién de naturaleza glotolóxica; y tamién lo son, polo tanto, el conceptu d' acumulación o fexe d'isogloses, igual que'l d'espaciu de relativa homoxeneidá desllindáu por fexes d'isogloses, ye dicir, el dominiu llingüísticu. En resultes, el conceptu de dominiu implica'l conceptu de frontera o límite ente dominios. Nun hai contradicción ente los conceptos de frontera y continuum. Un continuum dialeutal muestra discontinuidaes o dominios, ente los qu'esisten llendes; una frontera o llende dialeutal pue ser nítida o –como na zona Eo-Navia– tar formada por un estrechu continuum en forma de fexe d'isogloses. En tou casu, dientro d'un continuum fronterizu ye posible establecer, per aciu de taxación horiométrica, proporciones de trazos adscribibles a un dominiu o a otru.

Horiometría y dialeutometría[editar | editar la fonte]

Amás del midimientu horiométricu de la zona Eo-Navia, el Proyeutu ETLEN tamién aborda l'estudiu dialeutométricu diferencial na llinia de la Escuela Dialeutométrica de Salzburgu. Por ello l'ETLEN mándase tamién, pa esti otru midimientu, del programa VDM (Visual DialeutoMetry), adaptáu al proyeutu pol equipu que dirixe'l Dr. Hans Goebl de la Universidá de Salzburgu (Austria).

Bibliografia[editar | editar la fonte]

Ramón d'Andrés Díaz; Fernando Álvarez-Balbuena García & Xosé Miguel Suárez Fernández: «Proyeutu ETLEN para o estudio dialeutográfico e dialeutométrico da zona Eo-Navia, Asturias: fundamentos teóricos», en Actas. Mulleres en Galicia. Galicia e outros pobos da Península. VII Congreso Internacional de Estudos Galegos, Universitat de Barcelona, Barcelona 28 ó 31 de maio de 2003 (edición Helena González Fernández & María Xesús Lama López), A Coruña, Ediciós do Castro, 2007, pp. 749-759. [Disponible en http://dialnet.unirioja.es].

Ramón d'Andrés Díaz & Fernando Álvarez-Balbuena García: «Projecte ETLEN de mesurament de la frontera entre els dominis asturlleonès i gallego-portuguès», en Viatjar amb les Llengües, Conèixer els Parlants. Actes dels XIII Cursos d'Estiu, Castelló, juliol de 2009 (en prensa).