HC Energía

De Wikipedia
Saltar a navegación Saltar a la gueta

HC Energía (antiguamente Hidroeléctrica del Cantábrico) ye un grupu d'empreses creáu'l 15 de marzu de 1913 baxu'l nome de Sociedá Civil Quitada de Saltos d'Agua de Somiedu y dedicáu a la producción, tresporte, tresformación y distribución d'enerxía llétrica. Hasta 2005 denominóse Hidrocantábrico. Anguaño diversificóse escontra'l gas, les enerxíes anovables y les telecomunicaciones.

Hestoria[editar | editar la fonte]

See central de HC Enerxía n'Uviéu.

La primer instalación xeneradora d'enerxía hidráulica empecipió la so esplotación en 1917, siendo de la empresa Saltos d'Agua de Somiedu. Consistía en tómala d'agües del ríu del Valle, la canal de conducción del ríu Sousas, la Central, la llinia de conducción a Uviéu y Xixón y la subcentral d'Uviéu.

El 25 d'ochobre de 1919 la Xunta axúntase n'Uviéu pa tratar de constituyise en sociedá anónima, por culpa de que se empezara la esplotación de la primer parte del saltu y llográrense al efeutu los beneficios de la llei de 2 de marzu de 1917 sobro proteición a les nueves industries. Establezse como alcuerdo que la Sociedá Civil Quitada de Saltos d'agua de Somiedu siga como tala fasta'l 31 d'avientu de 1919 y la sociedá anónima va empezar la so nueva vida'l día 1 de xineru de 1920 denominándose Hidroeléctrica del Cantábricu - Saltos d'Agua de Somiedu.

L'empresa pasó a llamase darréu Hidroeléctrica del Cantábricu, Hidrocantábrico y a partir de 2005 HC Enerxía n'habiendo ser mercada pola portuguesa EdP.

Empreses del grupu[editar | editar la fonte]

  • Hidroeléctrica del Cantábricu, que desenvuelve l'actividá non regulada de producción o xeneración d'enerxía llétrica.
  • Hidrocantábrico Distribución Eléctrica,que tien por oxetu les actividaes regulaes de tresporte y distribución, según el suministru d'enerxía a veceros suxetos a tarifa.
  • Hidrocantábrico Enerxía, dedicada a l'actividá non regulada de comercialización y suministru d'enerxía a veceros nel mercáu liberalizáu.
  • Naturcorp, arrexunta a: Gas d'Asturies, Naturgas, Gasnalsa, Donostigas, Bilbogas, Gas Figueres, Septentrional de Gas y Naturgas Comercializadora.
  • Neo Enerxía, Foi creada en 2005 a partir de la integración de les actividaes d'enerxíes anovables de HC enerxía (genesa) y EDP (enernova).

Xeneración[editar | editar la fonte]

Nel campu de la xeneración llétrica, HC Enerxía dispon d'instalaciones hidráulicas, térmiques y nucleares, como propietaria al 100% o como participante en sociedá con otres empreses del sector.

Instalaciones hidráuliques[editar | editar la fonte]

  • Central hidroeléctrica de La Malva: asitiada nel términu municipal de Somiedu, los sos dos primeros grupos entraron en funcionamientu nel 1917, y constituyíen la primer instalación de la Sociedá Civil Quitada de Saltos d'Agua de Somiedu. Nel 1924 punxéronse en marcha dos nuevos grupos. Ta abastecida pelos ríos Abargane y Saliencia, amás de pelos llagos de Somiedu y tien una potencia instalada de 9.14 MW.
  • Central hidroeléctrica de Riérala: asitiada tamién en Somiedu, los sos dos primeros grupos entraron en funcionamientu en 1946. El terceru nun lo fadría hasta 1956. Abastezse pelos ríos Somiedu y Saliencia y tien una potencia instalada de 7.82 MW.
  • Central hidroeléctrica de Miranda: asitiada nel términu municipal de Balmonte, constitúi xuntu coles dos anteriores l'aprovechamientu hidráulico integral de la cuenca de los ríos Pigüeña - Somiedu. Los sos cuatro grupos entraron en funcionamientu nel 1962. Nuna obra d'inxeniería escelente pa la dómina, la central de Miranda abastezse pel ríu Pigüeña y por pequeños regueros que se capten al traviés del túnel de 22 km que xune'l banzáu de Covacho cola central. Tien instalada una potencia de 64.8 MW.
  • Central hidroeléctrica de La Florida: Dos de los sos grupos entraron en funcionamientu nel 1952; y el terceru nel 1960. Ta asitiada nel términu municipal de Tinéu y se abastace al traviés del banzáu de Pilotuerto, nel Ríu Narcea. La potencia instalada ye de 8 MW.
  • Central hidroeléctrica de Priañes: Tien trés grupos, dos de los cual fueron puestos en serviciu nel 1952; el terceru en 1967. Se abastace del Ríu Nalón al traviés de la presa del mesmu nome y del Ríu Nora al traviés de la presa del furacón. Asítiase mui cerca de la confluencia de dambos ríos, nel términu municipal d'Uviéu. La potencia instalada ye de 18.43 MW.
  • Central hidroeléctrica de Grandas de Salime: HC Enerxía comparte la titularidá d'esta central con Electra de Viesgo, güei perteneciente al grupu alemán E.ON, al traviés de la sociedá Saltos del Navia C.B. Nel momentu de la so construcción, constituyía'l mayor banzáu de toa España y el segundu d'Europa. Les obres empezaron en rematando la Segunda Guerra Mundial y estendiéronse hasta 1954, añu d'entrada en serviciu de los sos cuatro grupos. La so potencia instalada ye de 112 MW. Ta abastecida pel Ríu Navia.
  • Central hidroeléctrica de La Barca: Xuntu cola Central hidroeléctrica de La Florida, constitúi l'únicu aprovechamientu hidroeléctrico a gran escala del Ríu Narcea. Entró en funcionamientu nel 1967 con dos grupos, faciéndolo un terceru en 1974. Asítiase na llende ente los términos municipales de Tinéu y Balmonte y tien una potencia instalada de 57.7 MW.
  • Central hidroeléctrica de Proaza: Asitiada nel términu municipal del mesmu nome, los sos dos grupos fueron puestos en marcha en 1968 con una potencia de 48 MW. Abastezse dende'l Ríu Trubia.
  • Central hidroeléctrica de Tañes: Esta central presenta la peculiaridá de ser reversible. Asítiase nel términu municipal de Sobrescobiu y abastezse de la Presa de Tañes y la Presa de Rusecu, asitiada agües enriba la primer y agües embaxo la segunda. Cuando la central entra en funcionamientu, nes hores punta de consumu eléctricu, l'agua embalsada en Tañes faise pasar poles turbinas y darréu se embalsa de nuevu en Rioseco. Mientres les hores abargane, nes que la ufierta supera a la demanda, esto ye, hai escedentes d'enerxía, l'agua de Rioseco bómbiase de nuevu a Tañes pa empecipiar de nuevu'l ciclu. Empezó a construyise en 1970 y foi puesta en funcionamientu en 1978. Les sos agües son les del Ríu Nalón. Tien 123 MW en xeneración y 114.5 en bombio.

Instalaciones térmiques[editar | editar la fonte]

Les centrales eléctriques propiedá de HC Enerxía qu'utilicen combustibles fósiles como fonte d'enerxía principal son les vinientes:

  • Central térmica de Soto de Ribera: Allugada na marxe esquierda del Ríu Nalón, na contorna de la confluencia d'ésti col Ríu Caudal, nel términu municipal de La Ribera. Llegó a cuntar con 3 unidaes xeneradores, puestes en funcionamientu nel 1966, 1967 y 1984, con potencies de 67, 257 y 360 MW respeutivamente. El Ministeriu d'Industria aprobó, en payares de 2007, el zarru del Grupu I dempués de funcionar 191.130 hores nes sos más de cuarenta años d'esistencia. En septiembre de 2008, entró en funcionamientu un nuevu grupu (Soto 4) de ciclu combináu, de 418 MW, siendo'l primeru d'estes caractérísticas que s'instala nel Principáu d'Asturies.
  • Central térmica d'Aboño: Asitiada na contorna de la Ría d'Aboño, nel pueblu homónimo, perteeciente al conceyu de Carreño anque bien próximu a Xixón. Tien dos unidaes xeneradores puestes en serviciu nel 1974 y 1985, con potencies de 366 y 560 MW respeutivamente.
  • Central de ciclu combináu de Castejón: Allugada nel términu municipal de Castejón, Navarra. Entró en funcionamientu nel 2002 con una potencia instalada de 390 MW. HC comparte la titularidá con otres empreses del sector.

Instalaciones nucleares[editar | editar la fonte]

  • Central nuclear de Trillo: Asitiada nel términu municipal del mesmu nome, na Provincia de Guadalajara, HC tien una participación del 15,5%, equivalente a 165 MW.

Ver tamién[editar | editar la fonte]

Enllaces esternos[editar | editar la fonte]