Helen Marguerite Muir-Wood

De Wikipedia
Helen Marguerite Muir-Wood
Vida
Nacimientu Hampstead1895[1]
Nacionalidá Bandera del Reinu Xuníu Reinu Xuníu
Muerte Hampstead16 de xineru de 1968 (72/73 años)
Estudios
Estudios University College London
Llingües falaes inglés[2]
Oficiu paleontóloga, xeólogamuseóloga
Premios
Cambiar los datos en Wikidata

Helen Marguerite Muir-Wood (1895Hampstead – 16 de xineru de 1968Hampstead) foi una xeóloga, paleontóloga ya historiadora de la Paleontoloxía d'orixe británicu que pasó la so carrera nel Muséu d'Historia Natural de Londres. Ye considerada la principal investigadora de braquiópodos de la so xeneración y foi receptora de la prestixosa Medaya Lyell poles sos contribuciones al campu.

Biografía[editar | editar la fonte]

Nacida n'Hampstead, Inglaterra, Helen Marguerite Muir-Wood estudió Xeoloxía nel Bedford College de la Universidá de Londres cola profesora Catherine Raisin.[3] Dempués ingresó al University College de Londres, onde empecipió la so investigación de los braquiópodos so la supervisión de Edmund Garwood.[4] Consiguió un trabayu a tiempu parcial nel Muséu d'Historia Natural de Londres en 1919, xubiendo ente les files d'asistentes de Xeoloxía hasta convertise na primer muyer nomada conservadora auxiliar de Paleontoloxía en 1955. Retiróse oficialmente en 1961, pero siguió trabayando nel muséu por otros cuatro años.[3]

Muir-Wood yera una autoridá nos animales marinos conocíos como braquiópodos,[4] especialmente nos tipos fósiles que s'atopen nes Islles Britániques, l'Oriente Mediu, la India y Malasia. Publicó estensamente sobre braquiópodos y foi coautora de la seición sobre braquiópodos nel estudiu Treatise on Invertebrate Paleontology (1965).[3]

La Sociedá Xeolóxica de Londres dio-y el Fondu Lyell en 1930 y foi honrada cola Medaya Lyell en 1958. Yá xubilada, recibió la Orde del Imperiu Británicu polos sos servicios al muséu. Finó en Hampstead en 1968.[3]

Obra[editar | editar la fonte]

Ente les sos obres atópense:

  • The British Carboniferous Producti II - Productus, Sensu Stricto: Semireticulatus and Longispinus Groups (1928)
  • The Mesozoic Brachiopoda of the Attock district (1937)
  • Upper Palaeozoic Faunes of North Sikkim (1941) —coautora—
  • Malayan Lower Carboniferons Fossils and Their Bearing on the Visean Palaeogeography of Asia (1948)
  • A History of the Classification of the Phylum Brachiopoda (1955)
  • Morphology: Classification and Life Habits of the Productoidea (1960) —coautora—
  • On the Morphology and Classification of the Brachiopod Suborder Chonetoidea (1962)

Referencies[editar | editar la fonte]

  1. Identificador Archivos Nacionales del Reino Unido: F257080. Apaez como: Helen Marguerite Muir- Wood. Data de consulta: 9 ochobre 2017.
  2. Afirmao en: catálogu de la Biblioteca Nacional Checa. Identificador NKCR AUT: mzk20201072396. Data de consulta: 1r marzu 2022.
  3. 3,0 3,1 3,2 3,3 Ogilvie, Marilyn, y Harvey, Joy (2003). The Biographical Dictionary of Women in Science: Pioneering Lives From Ancient Times to the Mid-20th Century. Routledge. p. 923. ISBN 9781135963439
  4. 4,0 4,1 Burek, Cynthia V.; Higgs, Bettie (2007) The Role of Women in the History of Geology. Londres: Geological Society of London, páx. 107-108. ISBN 9781862392274.