Grupu d'Uviéu

De Wikipedia
Saltar a navegación Saltar a la gueta

Grupu d'Uviéu (Grupo de Oviedo en castellanu) foi'l nome tomáu por un grupu de profesores universitarios qu'a finales del sieglu XIX pretendieron compensar les carencies de la Universidá d'Uviéu, daquella una de les más probes d'España. L'enfotu d'esti grupu foi da-y a la Universidá un programa pedagóxicu ya investigador que permitiera anovar l'ideal universitariu.

Considérase que'l Grupu d'Uviéu taba influyenciáu pol krausismu, y pola Institución Llibre d'Enseñanza, onde se formaren dellos de los sos integrantes. La condición pa pertenecer al grupu yera la de ser profesor universitariu y namái'l manifestamientu de valores contrarios al ideal universitariu del grupu (la folgazanería o l'absentismu) causaba la esclusión del mesmu. Los más de los sos integrantes yeren d'ascendencia asturiana, y bastantes d'ellos uvieínos de nacimientu o con un fondu raigañu na ciudá.

Unu de los socesos que carauterizó al grupu, foi'l refugu en bloque de profesores y alumnos de la destitución del rector León Pérez de Salmeán y Mendayo, al que cesaron del so cargu en favor de Rodríguez Arango, impuesto pol Ministru de Fomentu Alejandro Pidal. El refugu coleutivu de la comunidá universitaria al rector nuevu, quedaba latente en que yera l'únicu escluyíu de los conceyos que facía'l restu del claustru universitariu.

Pertenecieron a esti grupu Fermín Canella y Secades, Félix Aramburu y Zuloaga, los hermanos Alas, Rafael Altamira, Adolfo Álvarez Buylla y Adolfo Posada ente munchos otros. Adolfo Posada propunxo escribir un llibru sobre la Universidá que terminará apaeciendo en 1901 como Anales de la Universidad de Oviedo y nél recuéyense dalgunes de les propuestes y proyeutos de dichu coleutivu.

Referencies[editar | editar la fonte]