Groombridge 1830

De Wikipedia
Saltar a navegación Saltar a la gueta
Groombridge 1830
Groombridge 1830
Constelación sietestrellu
Ascensión reuta α 11h 52min 58,8s
Declinación δ +37º 43’ 07’’
Distancia 29,7 ± 0,2 años lluz
Magnitú visual +6,42
Magnitú absoluta +6,62
Lluminosidá 0,19 soles
Temperatura 5030 K
Masa 0,60 soles
Radiu 0,64 soles
Tipu espectral G8 VIp
Velocidá radial -98,8 km/s
Otros nomes HD 103085 / HR 4550
HIP 57939 / GJ 451

Groombridge 1830 (CF Ursae Majoris / GJ 451) ye una estrella subenana mariellu-naranxa na constelación del sietestrellu, asitiada al nordeste de Alula Borealis (ν Ursae Majoris) y Alula Australis (ξ Ursae Majoris). Alcuéntrase a 29,7 años lluz de distancia del Sistema Solar. Foi catalogada por Stephen Groombridge na década de 1830 y el so altu movimientu propiu foi señaláu por Friedrich Wilhelm Argelander en 1842.

Como correspuende a una estrella subenana, Groombridge 1830 ye especialmente tenue pa la so tipu espectral (G8). Con una masa 0,6 de mases solares y un radiu de 0,64 radios solares, la so lluminosidá apenes supón el 19% de la del Sol. Al igual que la Estrella de Kapteyn ye una estrella del halo galácticu; éstes apenes suponen ente'l 0,1 y el 0,2% de les estrelles más próximes al Sol. Dempués de la Estrella de Barnard y de la citada Estrella de Kapteyn, Groombridge 1830 ye la estrella que tien un movimientu propiu más altu. Al tar considerablemente más llueñe que dambes significa que la so velocidá tresversal ye mayor. Ello ye que ye'l Sol el que sigue'l movimientu de rotación de la galaxa alredor del centru de la Vía Lláctea; les estrelles de halo, como Goombridge 1830, nun participen d'esti movimientu, permaneciendo «quietes» y paeciendo que se mueven en direición retrógrada a gran velocidá. Al igual qu'otres estrelles de halo, presenta una metalicidá baxa, ente'l 3 y el 10% de la del Sol. Suelen ser estrelles bien antigües, y l'edá de Groombridge 1830 puede superar los 10.000 millones d'años.

Per otra parte, reparáronse fogarales en Groombridge 1830, primeramente atribuyíes a una estrella acandilante acompañante. Anguaño atribúyense a la mesma estrella, que paez tar sola: corresponderíen a un tipu d'erupciones reparaes n'estrelles del tipu espectral F8 a G8, llamaes «superllamaradas», por ser muncho más intenses que les erupciones solares. Esti tipu de fogarales reparáronse n'estrelles análogues como κ1 Ceti y π1 Ursae Majoris.

Ver tamién[editar | editar la fonte]

Referencies[editar | editar la fonte]