Saltar al conteníu

Greville Texidor

De Wikipedia
Greville Texidor
Vida
Nacimientu Wolverhampton[1], 1902[1]
Muerte Montañas Azules (es) Traducir, 20 d'agostu de 1964[1] (61/62 años)
Causa de la muerte suicidiu
Familia
Madre Editha Greville Prideaux
Estudios
Estudios Cheltenham Ladies' College (en) Traducir
Oficiu
Oficiu novelista, cuentista
Cambiar los datos en Wikidata

Margaret Greville Foster (1902, Wolverhampton – 20 d'agostu de 1964, Montañas Azules (es) Traducir), conocida pol so seudónimu Greville Texidor, foi una escritora de ficción inglesa, destacada pol so trabayu escritu mientres vivía en Nueva Zelanda ente 1940 y 1948.

Biografía

[editar | editar la fonte]

Greville Texidor nació como Margaret Greville Foster en 1902 en Wolverhampton, Inglaterra.[2][3] Dempués de que'l so padre, William Arthur Foster, suicidárase en 1919 por un escándalu llegal, Texidor abandonó la escuela y camudóse a Londres para xunise al mundu artísticu de Hampstead. Acompañó a la so madre, Editha Greville Prideaux Foster, y la so hermana, Kate, dambes pintores.[2][4][5][6]

Trabayó como modelu y actriz en Londres. En 1924, apaeció como Margot Greville na película muda Moonbeam Magic, interpretando'l papel de Miriam.[7] Dempués fixo una xira per Europa y América como corista, onde foi pareya d'un contorsionista.[8][9]

Casóse trés vegaes: con un británicu, un español y un alemán. El so primer matrimoniu terminó dempués de namás dos selmanes.[8]

Conoció al so segundu home, l'español Manuel Texidor, en Buenos Aires. Camudáronse xuntos a España, onde ella vivió mientres dellos años y tuvieron una fía, Christina.[7][8] El so tercer home foi l'alemán Werner Otto Droescher, con quien lluchó del llau de los republicanos na guerra civil española.[2][6]

Tanto n'España como n'Inglaterra, Texidor y el so maríu trabayaron p'ayudar a refuxaos españoles y alemanes.[7]

En 1940, Texidor treslladóse a Nueva Zelanda xuntu con Droescher, la so hermana y la so madre, quien creciera en Nueva Zelanda.[6] Texidor y Droescher tornaron a Inglaterra dende España, pero'l so orixe alemán y la política anarquista de la pareya emburriáron-yos a los márxenes de la sociedá británica na dómina de la Segunda Guerra Mundial, pasando Texidor un mes en prisión nesti periodu.[2][8] Clasificaos como "estranxeros enemigos en tiempos de guerra", la familia empezó una nueva vida en Nueva Zelanda.[4]

Mientres esa etapa, Texidor vivió n'Auckland, la península de Northland y en North Shore City[2] y en 1947, tuvo una segunda fía, Rosamund, con Droescher.[9][10][11]

Una vegada en Nueva Zelanda, Texidor empezó a escribir ficción per primer vegada na so vida.[8]

Les sos obres de ficción curtia imprimiéronse en publicaciones de Nueva Zelanda, Australia ya Inglaterra, como Anvil y Here & Now. El so primer trabayu publicáu en Nueva Zelanda foi en 1942 Home Front y foi oxetu de numberoses antoloxíes.[12][13]

El so primer llibru, la novela These Dark Glasses, foi escritu mientres la so estancia en Nueva Zelanda, pero publicóse en 1949, dempués de qu'abandonara'l país. Trata sobro una escritora comunista que tuviera ayudando a los republicanos n'España, a midida que se desilusionaba cola escena intelectual del sur de Francia.[12]

Nel so trabayu, Texidor apurrió una mirada crítica y cosmopolita a la sociedá neozelandesa de la dómina, qu'atopaba provinciana.[12]

Amás de los sos propios escritos, Texidor tradució lliteratura española al inglés, como poemes de Federico García Lorca.[4]

Texidor camudó de Nueva Zelanda a Australia en 1948 y en 1954 tornó a España. Cuando'l matrimoniu terminó en 1961, volvió a Australia, onde se suicidó pela rodiada de Sydney n'agostu de 1964.[8]

Les sos hestories y noveles arrexuntáronse póstumamente y publicáronse en 1987 na obra In Fifteen Minutes You Can Say a Lot: Selected Fiction. La colección volvió a publicase en 2019 como un clásicu de Victoria University Press.[6]

Otres llectures

[editar | editar la fonte]
  • Schwass, Margot (2019). All the Juicy Pastures: Greville Texidor and New Zealand. Wellington: Victoria University Press. ISBN 9781776562251.

Referencies

[editar | editar la fonte]
  1. ↑ 1,0 1,1 1,2 Afirmao en: The Feminist Companion to Literature in English. Páxina: 1065. Autor: Virginia Blain. Llingua de la obra o nome: inglés. Data d'espublización: 1990.
  2. ↑ 2,0 2,1 2,2 2,3 2,4 Texidor, Greville, https://www.oxfordreference.com/view/10.1093/acref/9780195583489.001.0001/acref-9780195583489-e-1234, consultáu'l 2021-03-02 
  3. ↑ The Penguin history of New Zealand literature.
  4. ↑ 4,0 4,1 4,2 All the Juicy Pastures: Greville Texidor and New Zealand. https://ojs.victoria.ac.nz/jnzs/article/view/6274. 
  5. ↑ «PRIDEAUX, Editha Greville (Mrs E. G. Foster) c.1869–1953». Nineteenth Century New Zealand Artists: A Guide & Handbook. Consultáu'l 2021-03-02.
  6. ↑ 6,0 6,1 6,2 6,3 Edmond (2019-11-29). «The life and the work» (inglés). New Zealand Review of Books Pukapuka Aotearoa. Consultáu'l 2021-03-02.
  7. ↑ 7,0 7,1 7,2 Harvey (2019-06-22). «New books shed light on migrant New Zealand author Greville Texidor» (inglés). Stuff. Consultáu'l 2021-03-02.
  8. ↑ 8,0 8,1 8,2 8,3 8,4 8,5 Stephenson (2019-06-14). «Greville Texidor: The finest writer you've never heard of» (inglés). Stuff. Consultáu'l 2021-03-02.
  9. ↑ 9,0 9,1 Schwass (2019-06-17). «Greville Texidor – All the Juicy Pastures» (inglés). Victoria University Press. Consultáu'l 2021-03-02.
  10. ↑ Texidor (1987). In fifteen minutes you can say a lot : selected fiction.
  11. ↑ RIchards (1995). «A Critical Biography of Maurice Duggan, 1922-1974». Massey University. Consultáu'l 2021-03-01.
  12. ↑ 12,0 12,1 12,2 Benson (Autumn 1997). «Why Is Greville Texidor Part of the Canon?». Deep South. Consultáu'l 2021-03-02.
  13. ↑ Benson, Dale (1999). «'Visual Quality of a Very High Order': Greville Taxidor & the Canon». Journal of New Zealand Literature (JNZL) (17). ISSN 0112-1227. https://www.jstor.org/stable/20112310. 

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Greville_Texidor&oldid=4365300»