Grecia Otomana
La mayoría del territoriu de l'actual Grecia formó parte, en dalgún momentu de la so historia, del Imperiu otomanu. El periodu de dominiu otomanu de Grecia duró dende mediaos del sieglu XV hasta que, tres la Guerra d'Independencia de Grecia, proclamose la Primer República Helénica en 1822, y ye conocíu en Grecia como Turcocracia[1]. El norte de Grecia, y tamién les illes septentrionales y orientales del mar Exéu y la islla de Creta, siguieron siendo otomanas hasta finales del sieglu XIX y principios del XX. Les rexones del Epiru y Tesalia incorporáronse a Grecia en 1878-1881 (magar que los otomanos recuperáronles brevemente en 1897), y Macedonia occidental, Macedonia y Macedonia oriental incorporáronse a Grecia en 1912-13, de resultes de les Guerres de los Balcanes. Creta, pela so banda, algamó l'autonomía dientro l'Imperiu en 1898, y axuntose a Grecia en 1913, tamién de resultes de les guerres de los Balcanes, y lo mesmo pasó coles restantes islles del Exéu qu'anguaño pertenecen a Grecia, sacante les islles del Dodecanesu. La fastera de Tracia qu'anguaño pertenez a Grecia foi ganada por Bulgaria na Guerra de los Balcanes, y cedida a Grecia en 1919, tres de la Primer Guerra Mundial. Les islles del Dodecanesu, finalmente, foron cedíes por Italia (que las ocupara demientres la Guerra ítalo-turca de 1911-12) a Grecia en 1947, tres de la Segunda Guerra Mundial. Hai que denotar, tamién, qu'hebo dalgunos territorios actualmente griegos que nun tuvieron incorporaos al territoriu otomanu (les islles Xóniques y otres posesiones temporales de la República de Venecia pertenecientes al Stato da Mar), y que, la península de Mani, nel Peloponeso, magar que taba embaxu la soberanía otomana, nun tuvo completamente integrada nel so Imperiu.
La mayor ciudá de la Grecia Otomana, y tamién de los últimos tiempos de la Grecia Bizantina, yera Tesalónica, que perteneció al Imperiu otomanu demientres dos periodos: ente 1387 y 1403, y llueu dende 1430 a 1912. Cuando Atenas sustituyó a Nafplio como la nueva capital del reinu de Grecia en 1834, yera, con 7.000 habitantes, una ciudá pequeña comparada con Patras (15.000 habitantes) y la entonces otomana Tesalónica (60.000 habitantes)[2].
L'Imperiu romanu d'oriente, que gobernó la mayoría del territoriu de llingua griega durante 1100 años, quedó mui debilitáu dempués de la Cuarta Cruzada de 1204. Tres derrotar a los serbios, los otomanos capturaron Constantinopla en 1453, y perpoco dempués ocuparon los restos del Imperiu bizantín: Atenas foi conquistada en 1456, y el Peloponeso en 1460. A principios del sieglu XVI tola Grecia continental y la mayoría de les islles del Exéu taben en manos de los turcos, sacante delles ciudaes portuaries que controlaba Venecia: Nauplia, Monemvasia, Parga y Modona. Les montañes de Grecia, sicasí, nun foron realmente conquistaes, y convirtiéronse nún refuxu pa los griegos que queríen escapar del gobiernu turcu y entamaron una guerra de guerrilles escontra ellos[3]. Les islles Cíclades, que teníen l'estatus de vasallaxe dende la década de 1530, foron anexionaes dafechu en 1579. Chipre pasó a ser otomana en 1571, y los venecianos arregláronseles pa conservar Creta hasta 1669. Les islles Xóniques, sacante Kefalonia (ocupada en 1479-81 y 1485-1500), nunca foron gobernaes polos otomanos, permanecieron embaxu'l gobiernu de Venecia y foron el llugar nel que nació'l modernu estáu griegu, cola creación de la República de les Islles Xóniques en 1800.
La Grecia otomana yera una sociedá multiétnica, magar que'l sistema otomanu de los millets (un sistema d'autogobiernu xudicial pa les estremaes comunidaes relixoses) nun correspuende cola idea contemporánea de multiculturalismu[4]. Los griegos tuvieron dellos privilexos y llibertaes, pero tamién sufrieron los abusos d'unos funcionarios sobre los que'l llonxanu gobiernu tenía namái un control relativu[5]. Pesie a la pérdida de la so independencia política, los griegos siguieron controlando el comerciu y los negocios del país. La consolidación del poder otomanu nos sieglos XV y XVI permitió que'l Mediterraneu fuera seguru pa la navegación, y los marinos griegos convirtiéronse nos transportistes marítimos del Imperiu y ficieron grandes fortunes[6]. Tres de la derrota turca na batalla de Lepanto, por embargu, los barcos griegos convirtiéronse davezu nel oxetivu de los ataques de pirates católicos, especialmente españoles y malteses[6].
Los cinco sieglos de dominiu otomanu tuvieron un impacto fondu na sociedá griega, porque provocó l'apaición d'unes élites nueves. L'antigua aristocracia terrateniente griega, que dominó tradicionalmente'l país nel tiempu de los bizantinos, tuvo un destín tráxicu y quedó casi completamente destruyida. So llugar no cimero de la pirámide social de la Grecia ocupáronlo los prokritoi, que yeren nomaos kocabasis polos otomanos. Estos yeran en su mayoría burócratas y recaldadores d'impuestos, con mui mala reputación pola so corrupción y nepotismu. D'otra banda, los fanariotes ocuparon un llugar importante na capital imperial, Constantinopla, como homes de negocios y diplomáticos, y la Ilesia Ortodoxa Griega y el Patriarca Ecuménicu de Constantinopla algamaron gran poder gracies a la protección del sultán, porque teníen el control relixosu sobre tola populación ortodoxa del imperiu, tanto de la que falaba griegu como la que falaba albanés, llatín o llingües eslaves.
Referencies
[editar | editar la fonte]- ↑ Merry, B. [Bruce]. (2004). Encyclopedia of Modern Greek Literature, p. 442. Bloomsbury Academic. ISBN 9780313308130
- ↑ Greece Is. (2018, 18 de setiembre). On This Day in 1834 Athens Became the Greek Capital. Greece-Is.com.
- ↑ World and its peoples, p. 1478. Marshall Cavendish Reference, 2009. ISBN 978-0-7614-7902-4. "Los cleptos eran descendientes de griegos qu'afuxeron a les montañes pa escapar de los turcos nel sieglu XV, y que permanecieron activos como bandíos hasta'l sieglu XIX."
- ↑ Maurus Reinkowski, "Ottoman "Multiculturalism"? The Example of the Confessional System in Lebanon". Lecture, Istanbul, 1997. Edited by the Orient-Institut der Deutschen Morgenlandischen Gesellschaft, Beirut, 1999, pp. 15, 16.
- ↑ Dakin, D. [Douglas]. (1973). The Greek Struggle for Independence, 1821-1833, p. 16. University of California Press. ISBN 9780520023420
- 1 2 «Introduction».