Gran Enciclopedia Asturiana
| Gran Enciclopedia Asturiana | |
|---|---|
| obra de referencia | |
| Datos | |
| Fecha | 1970 |
| Llingua de la obra | castellanu |
| País orixinal |
 España |
| ISBN | ISBN 978-84-7286-130-5 |
| OCLC | 807669100 |
 | |
La Gran Enciclopedia Asturiana (GEA) foi una enciclopedia dedicada al estudiu y divulgación de la realidá histórica, cultural, xeográfica y social d'Asturies. Asoleyada dende 1970, foi impulsada pol editor Silverio Cañada, cola collaboración, ente otros, de Luciano Castañón y José Antonio Mases. Concebida como un proyeutu cultural de gran algame, la obra estructúrase en dellos tomos y recueye milenta entrades redautaes por especialistas de distintos ámbitos del saber.
La enciclopedia supunxo un finxu na sistematización del conocimientu sobre Asturies nel sieglu XX, convirtiéndose nuna referencia básica pa la investigación y la consulta xeneral. Pola so amplitú temática y voluntá de compilar de mou ordenáu los saberes venceyaos al país, la Gran Enciclopedia Asturiana constitúi ún de los proyeutos editoriales más relevantes de la cultura asturiana contemporánea.
Historia
[editar | editar la fonte]La Gran Enciclopedia Asturiana surdió nun contestu cultural nel que entá nun esistiere una obra enciclopédica completa dedicada a Asturies. Mientres los años sesenta y setenta espardíase un crecimientu d'interés pol patrimoniu, la historia y la identidá rexonal, asitiando la necesidá d'una obra que recopilara de mou ordenáu y accesible los conocimientos sobre la tierra, la so xente y la so cultura.[1][2]
En 1970 la enciclopedia asóleyase por iniciativa del editor Silverio Cañada, dirixida por él xunto con Luciano Castañón y José Antonio Mases. Foi concebida como una enciclopedia xeneralista sobro Asturies, organizada nes primeres ediciones en fascículos coleicionables,[3][4] con miles d'entrades redactaes por un ampliu equipu d'especialistes y collaboradores conocedores de distintos ámbitos del saber asturianu.[1][3][5][6] Ente los collaboradores cuéntense persones como Gabriel Santullano, José Antonio Vega, Andrés de la Fuente o Félix Guisasola.[7] Coles ilustraciones de dibuxantes y maquetistes dedicados a la obra, la enciclopedia tuvo como oxetivu recoyer la historia, la xeografía, la sociedá, la cultura, les tradiciones y los protagonistes destacaos del país.[5][6] Foi la segunda enciclopedia d'ámbitu rexonal n'asoleyase, darréu de la Gran Enciclopedia Catalana.[4][7]
La presentación del primer tomó destacaba que la enciclopedia represéntase como continuación d'intentos previos de recoyer conocimientu sobre Asturies —como'l Diccionario Geográfico-Histórico de Asturias de Francisco Martínez Marina o les obres de Xovellanos— pero ensin precedentes pa nivel enciclopédicu global. Esta obra afrontó la tarea de sistematizar miles de fiches d'información, dende la Prehistoria hasta los sos tiempos contemporáneos, dirixéndose a un públicu que quixera saber, tanto de mou divulgativu como más fonderu, sobre distintos aspeutos del país.[5][6]
A lo llargo de los años, la enciclopedia tuvo ampliaciones y actualizaciones. En 1981 apurrió una segunda edición con apéndices que recoyíen cambios y nuevos datos acaecíos nel deceniu ente 1970 y 1980. D'esta manera, la obra siguió ampliándose con índices y nuevos volumes que faciliten l'usu y l'actualización de datos, convirtiéndose dafechu nun referente pa investigadores, biblioteques y llectores interesados na cultura asturiana contemporánea.[5][6]
Impautu cultural
[editar | editar la fonte]La Gran Enciclopedia Asturiana constituyó ún de los proyeutos editoriales más ambiciosos y de mayor trescendencia cultural na historia contemporánea d'Asturies, siendo amás un ésitu en vientes.[3] La so publicación supunxo la primer tentativa sistemática de compilar, ordenar y poner al algame del públicu xeneral el conxuntu del saber venceyáu al país, dende la Prehistoria hasta la actualidá del momentu de la so edición.
Nel contestu del tardofranquismu y la transición democrática, la enciclopedia desempeñó un papel clave na visibilización y dignificación de la identidá asturiana, al dotar al territoriu d'una obra de referencia equiparable a les grandes enciclopedies rexonalistes d'otros territorios del Estáu.[4] El proyeutu, impulsáu por Silverio Cañada, contribuyó a consolidar una conciencia cultural moderna, basada na investigación histórica, la recuperación del patrimoniu y la sistematización del conocimientu científicu sobre la realidá asturiana.
Amás del so valir divulgativu, la obra tuvo relevancia académica. Munches de les sos entraes foron redactaes por especialistes y estudiosos que fixeron aportaciones fundamentales a la historiografía, la etnografía, la toponimia o la biografía asturiana.[4][5][6] D'esta manera, la enciclopedia convirtióse nun instrumentu de consulta habitual pa investigadores, docentes y estudiantes, y en fonte de partida pa trabayos posteriores.
Igualmente, la Gran Enciclopedia Asturiana ayudó a fixar un canon cultural, al determinar qué figures, fechos, llugares y manifestaciones artístiques o sociales merecíen ser incluyíos nuna obra de referencia. Esa función normativa —propia de tola obra enciclopédica— tuvo especial importancia nun momentu de redefinición identitaria y recuperación de la memoria colectiva.[4][7]
Décades dempués de la so primer edición, la enciclopedia siguió siendo considerada una obra emblemática del asturianismu cultural del sieglu XX y un símbolu del esfuerciu por dotar a Asturies d'infraestructures intelectuales propies.[1]
Referencies
[editar | editar la fonte]- 1 2 3 Asturies.com (ed.): «Galicia recupera la enciclopedia de Silverio Cañada» (asturianu) (29 de mayu de 2003). Consultáu'l 2 de marzu de 2026.
- ↑ El País (ed.): «Falleció el editor asturiano Silverio Cañada» (castellanu) (16 de xineru de 1983). Consultáu'l 2 de marzu de 2026.
- 1 2 3 El País (ed.): «Silverio Cañada, editor de la 'Gran Enciclopedia Asturiana'» (castellán) (21 de mayu de 2002). Consultáu'l 4 de marzu de 2026.
- 1 2 3 4 5 Botrel, Jean-François (2002). escritu en Francia. de las Voces, Juan Miguel. ed. «Enciclopedias, identidad y territorios en la España postfranquista». Prensa, impresos y territorios en el mundo hispánico contemporáneo (PILAR): páxs. 31-44. ISBN 2-9516865-1-X. https://dialnet.unirioja.es/servlet/articulo?codigo=2779348. Consultáu'l 4 de marzu de 2026.
- 1 2 3 4 5 Enciclopedia de Oviedo (ed.): «Gran Enciclopedia Asturiana» (castellanu) (20 de xunu de 2010). Consultáu'l 2 de marzu de 2026.
- 1 2 3 4 5 El Comercio (ed.): «Gijón en la Gran Enciclopedia Asturiana» (castellanu) (16 d'ochobre de 2023). Consultáu'l 2 de marzu de 2026.
- 1 2 3 Guillot, Víctor (8 de xineru de 2023). Nortes (ed.): «Silverio Cañada, el editor que dio a los asturianos una enciclopedia» (asturianu). Consultáu'l 4 de marzu de 2026.
Enllaces esternos
[editar | editar la fonte]| Control d'autoridaes |
|
|---|
Datos: Q37989775