Saltar al conteníu

Graciana de Barrenechea

De Wikipedia
Graciana de Barrenechea
Vida
Nacimientu Zugarramurdi, circa 1524[1]
Muerte Logroño, setiembre de 1609 (84/85 años)
Familia
Fíos/es
Familia
Cambiar los datos en Wikidata

Graciana de Barrenechea (circa 1524, Zugarramurdi – setiembre de 1609, Logroño) foi una muyer acusada de ser una figura destacada nel cultu al diañu mientres los xuicios que se llevaron a cabu en Navarra pa desaniciar dafechu la bruxería. Morrió en prisión antes del autu de fe de 1610 celebráu en Logroño y nel so llugar fueron quemaos los sos restos y una efixe de so.[2][3]

Biografía

[editar | editar la fonte]

El primer home de Barrenechea foi Juanes, o Joanes, de Yriarte, un pastor, con quien tuvo trés fíes,[4] ente elles Estevanía y María de Yriarte. Estevanía casóse con otru pastor, Juanes (o Joanes) de Goiburu, fíu de Miguel de Goiburu, un pastor de prestíu.[5] El segundu home de Barrenechea yera l'hermanu de Miguel, tamién llamáu Joanes,[4] anque otres fontes afirmen que Barrenechea foi la esposa de Miguel.[2]

Toos vivíen en Zugarramurdi y la so contorna mientres los xuicios de bruxes, y la historiadora Emma Wilby y l'antropólogu Mikel Azurmendi teoricen qu'esta estensa familia foi un puntu focal d'acusaciones de bruxería, por cuenta de que, tiempu atrás, llucharon pola llibertá del pueblu del monesteriu d'Urdazubi, l'autoridá llocal na caza de bruxes. Miguel foi acusáu de ser el cabezaleru del aquelarre y Barrenechea tamién foi acusada de ser "reina de les akelarre[6]", primero que María de Arburu.[7] El primer home y la tercer fía de Barrenechea fueron los únicos miembros de la familia que nun fueron acusaos de bruxería.[8]

Los rexistros de Zugarramurdi presenten quiciabes la primer asociación d'un sapu como animal familiar d'una bruxa, basada principalmente a partir de relatos sobre la ellaboración de venenu de sapu proporcionaos por Barrenechea, María y Juanes de Goiburu cuando fueron obligaos a confesar. Wilby considera relevante que l'oficiu de pastor probablemente implicara l'usu de sapos con fines veterinarios.[6]

L'esconxuru de Francisco de Goya: la bruxa de mariellu puede representar a Graciana de Barrenechea.

Acusaciones de bruxería y muerte

[editar | editar la fonte]

Barrenechea tenía más de 80 años cuando foi acusada de bruxería.[2][6] Cuando'l comisariu del Santu Oficiu y obispu d'Urdax, León Aranibar, entrugó per primer vegada sobre les acusaciones de bruxería, señaló que foi «duldosa y contradictoria nes sos declaraciones».[2][7]

Nes sos confesiones documentaes, Barrenechea supuestamente almitió ser la reina del aquelarre, practicar canibalismu con neños desmembraos y cadabres, y tener una relación amorosa col diañu. Tamién confesó sentir tantos celos d'otra muyer, Marijuán de Odia, pol ciñu del diañu, que dambos envelenaron a Odia con piel de sapu; la muyer morrió trés díes depués.[9][10]

Amás de les confesiones, hubo munches acusaciones contra Barrenechea per parte de neños de la dómina na vivió n'Arraioz, afirmando que los atraía al diañu y trataba de raptalos, lo que provocó múltiples enfrentamientos públicos ente los padres y Barrenechea. Una de les acusaciones, rellatada por María de Echaleco, afirmaba que Barrenechea llevóla pel aire hasta un campu cercanu a una cueva, a la que depués entró y remaneció col diañu. Echaleco dixo qu'invocó'l nome de Cristu, lo que fixo sumir a Barrenechea y el diañu.[9]

Los habitantes d'Arraioz rezaron por ella, y ella estimólo; sicasí, más tarde retratóse de les sos confesiones de bruxería, lo qu'enfocicó a los vecinos. Foi encarcelada mientres un tiempu nel palaciu de Zugarramurdi, pero siguió cola so actitú de confesar y depués retratase. Los aldeanos allegaron entós a Miguel de Narbart, familiar de la Inquisición, pa que la interrogara.

Nel so intentu por facela confesar, Narbart arreyó a Barrenechea a una columna con una cadena alredor del pescuezu. Tenía los pies descalzos, y la xente echába-y agua nos pies, lo que-y provocaba dolor debíu al fríu. Daquién vio que Barrenechea yá nun podía falar, pero entá alendaba; los asistentes animáronla a encamentase a Dios, y entós morrió. Los neños que guardaron la so muerte dixeron que'l demoniu con forma de machu cabrío apaeció al pie d'ella nel momentu que finó.[11]

Los relatos indiquen que la tortura a la que foi sometida Barrenechea pa facela confesar, mientres siguía allegando que yera inocente, llevóla a la muerte na prisión de Logroño. Ente quienes guardaron el so fallecimientu, solo tiense constancia d'una persona que desaprobó la so tortura; les demás restáron-y importancia, achacando'l desenllaz a la so edá, o consideraron que la merecía.[2][11]

Los archivos de la Inquisición sobre l'autu de fe de Logroño amuesen que Barrenechea y Estevanía fueron condergaes xuntes por «tantes coses y muertes que nun pueden detallase na sentencia». La Inquisición consideró a Barrenechea una bruxa especialmente influyente ya impúnxo-y una condena tan severa que, anque morrió antes de ser xulgada, tenía de ser castigada igualmente. Tanto los sos restos como la efixe que la representara nel xuiciu fueron quemaos.[9][7]

Les dos fíes de Barrenechea que fueron acusaes tamién morrieron en prisión y fueron quemaes n'efixe. En 1611, el Conseyu de la Suprema Inquisición absolvió a toles persones que fueren acusaes de bruxería en Logroño, y ente 1612 y 1613 celebróse un xuiciu colectivu na Corte Mayor de Navarra, contra dellos residentes de la rexón acusaos de llanzar amenaces y cometíu ataques nel marcu del so caza de bruxes.[11]

Como tenía'l cargu de familiar de la Inquisición, Narbart gociaba d'inmunidá, pero aun así foi obligáu a testificar nel xuiciu, y el fiscal amenaciólu con cargos d'asesinatu en relación cola muerte de Barrenechea. Los acusaos fueron declaraos culpables y condergaos a periodos d'exiliu de Navarra.[11]

Heriedu

[editar | editar la fonte]
La casa Barrenetxea en Zugarramurdi.

La casa de Barrenechea en Zugarramurdi, cerca de les cueves de les bruxes, ta señalada con una placa que rellata la so sentencia. Les confesiones de Barrenechea amuesen dalgunes de les primeres menciones que venceyen a les bruxes colos sapos, el vampirismu, el canibalismu infantil y les maldiciones. Dellos historiadores del arte sostienen que la figura del mantu mariellu nel cuadru L'esconxuru, de Francisco de Goya, representa a Barrenechea y básase na historia de cómo envelenó al so rival.[7][9][12]

L'actriz Carmen Maura interpretóla na película Las brujas de Zugarramurdi (2013), dirixida por Álex de la Iglesia, una comedia d'horror qu'amuesa a Barrenechea «refalfiándose en rituales llibertarios demoníaco-lúbricos», según pallabres de Mikel Azurmendi que se manifestó particularmente críticu con esta representación de lo asocedío.[13]

Referencies

[editar | editar la fonte]
  1. ↑ URL de la referencia: https://www.argia.eus/argia-astekaria/2709/sorgin-ehiza-lapurdin-eta-nafarroan.
  2. 1 2 3 4 5 «Herri oso baten aurkako erasoa (Caza de brujas en Lapurdi y Navarra. Un ataque contra toda una población)» (eusquera). Argia. Consultáu'l 2025-10-30.
  3. ↑ Gutiérrez, Natxo (2023-11-06). «Las brujas de Zugarramurdi y el Auto de Fe de Logroño» (castellanu). diariodenavarra.es. Consultáu'l 2025-10-30.
  4. 1 2 Llorente, Juan Antonio (1822). Historia critica de la Inquisicion de España: Obra original conforme á lo que resulta de los Archivos del real Consejo de la Suprema, y de los tribunales desl Santo-Oficio de las provincias. Censor.
  5. ↑ Wilby, Emma (2 d'agostu de 2019). Invoking the Akelarre: Voices of the Accused in the Basque Witch-Craze, 1609-1614 (n'inglés). Liverpool University Press. ISBN 978-1-78284-624-6. Consultáu'l 1 de payares de 2025.
  6. 1 2 3 (2019-08-02) Invoking the Akelarre: Voices of the Accused in the Basque Witch-Craze, 1609-1614 (n'inglés).
  7. 1 2 3 4 del Castillo, Alicia (2008-06-22). «Cientos de personas en el primer Día de las Brujas que se celebró en las cuevas» (castellanu). El Diario Vasco. Consultáu'l 2025-11-01.
  8. ↑ (1822) Historia critica de la Inquisicion de España: Obra original conforme á lo que resulta de los Archivos del real Consejo de la Suprema, y de los tribunales desl Santo-Oficio de las provincias (en castellanu).
  9. 1 2 3 4 Lara Alberola, Eva. «Ars Magica -Base de Datos- Graciana de Barrenechea». parnaseo.uv.es. Consultáu'l 2025-11-01.
  10. ↑ Incera, Andrea (2022-10-30) (en castellanu). Brujas en Navarra más allá de Zugarramurdi. Diario de Navarra. https://www.diariodenavarra.es/noticias/vivir/turismo/2022/10/30/zugarramurdi-brujas-navarra-546614-3193.html. Consultáu'l 2025-10-31.
  11. 1 2 3 4 Homza, Lu Ann (2019-06). «When Witches Litigate: New Sources from Early Modern Navarre» (n'inglés). The Journal of Modern History 91 (2):  páxs. 245–275. doi:10.1086/703146. ISSN 0022-2801. https://www.journals.uchicago.edu/doi/10.1086/703146. Consultáu'l 2025-11-01.
  12. ↑ Kirpalov (2023-06-24). «Why Did Francisco Goya Paint Witches?» (inglés). TheCollector. Consultáu'l 2025-10-23.
  13. ↑ (en castellanu) Las brujas de Zugarramurdi (2013) - Reparto y equipo al completo - IMDb, https://www.imdb.com/es-es/title/tt2404738/fullcredits/, consultáu'l 2025-11-01

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Graciana_de_Barrenechea&oldid=4629963»