Gorgonea Tertia

De Wikipedia
Saltar a navegación Saltar a la gueta
Gorgonea Tertia
Gorgonea Tertia
Constelación Perseus
Ascensión reuta α 03h 05min 10,6s
Declinación δ +38º 50’ 25’’
Distancia 317 años lluz (aprox)
Magnitú visual +3,39
Magnitú absoluta -1,67
Lluminosidá 3470 soles (bolométrica)
Temperatura 3460 K
Masa 3 soles
Radiu 164 soles
Tipu espectral M4II
Velocidá radial +28,2 km/s

Gorgonea Tertia (ρ Persei / ρ Per / 25 Persei)[1] ye una estrella na constelación de Perséu. El so nome provién de la mitoloxía griega, refiriéndose a les gorgonas rellacionaes col héroe Perséu. Y anque les gorgonas namái yeren trés, na constelación atópense Gorgonea Prima —Algol (β Persei), que representa la cabeza d'Aguamala—, Gorgonea Secunda (π Persei) y Gorgonea Quarta (ω Persei), al pie de Gorgonea Tertia. Los cuatro estrelles nun tienen nenguna rellación ente sigo fora del ámbitu mitolóxicu.

Asitiada a 317 años lluz del Sistema Solar, Gorgonea Tertia ye una fría xigante colorada lluminosa de tipu espectral M4II con una temperatura efectivo de 3460 K. El so diámetru ye unes 164 vegaes mayor qu'el del Sol. Teniendo en cuenta una importante cantidá d'enerxía emitida nel infrarroxu, la so lluminosidá ye 3470 vegaes superior a la solar. Con una masa de 3 mases solares, la so edá envalórase en 440 millones d'años; tien un nucleu inerte de carbonu-oxíxenu y tópase nuna de les últimes fases de la so evolución estelar enantes de convertise nuna nana blanca.[2]

Amás ye una estrella variable semirregular del tipu de μ Cephei, variando la so magnitú aparente ente +3,3 y +4,0 en ciclos de 50 y 1100 díes.

Ver tamién[editar | editar la fonte]

Referencies[editar | editar la fonte]