Gliese 623

De Wikipedia
Saltar a navegación Saltar a la gueta
Gliese 623
Gliese 623 A
Imaxe de Gliese 623 A y el so tenue acompañante (a la derecha del centru). Creitos: C. Barbieri y NASA/ESA.
Constelación Hércules
Ascensión reuta α 16h 24min 09,32s
Declinación δ +48º 21’ 10,5’’
Distancia 26,2 años lluz
Magnitú visual +10,27
Magnitú absoluta +10,74
Lluminosidá 0,020 soles
Temperatura 3390 K
Masa 0,37 soles
Tipu espectral M3V
Velocidá radial -28,6 km/s

Gliese 623 (GJ 623 / LHS 417 / HIP 80346)[1][2] ye una estrella asitiada na constelación d'Hércules. Tien magnitú aparente +10,27 y nun ye visible a simple vista. Alcuéntrase a 26,2 años lluz del Sistema Solar.

Gliese 623 ye un sistema binariu compuestu por dos nanes coloraes. La componente principal, Gliese 623 A, ye de tipu espectral M3V y tien una temperatura superficial de 3390 K. La so lluminosidá equival al 0,02% de la que tien el Sol[3] y tien una masa de 0,371 ± 0,015 mases solares.[4] La so velocidá de rotación proyeutada ye igual o inferior a 2,9 km/s.[5] Pela so parte, la estrella acompañante, Gliese 623 B, ye una nana colorada bien tenue, que la so lluminosidá ye 60.000 vegaes inferior a la solar. La so masa apenes supón un 11,5 ± 0,23% de la que tien el Sol.[4] El Telescopiu espacial Hubble dexó llograr una imaxe direuta d'esta estrella, considerada una de les más pequeñes de nuesa galaxa.[6]

El periodu orbital del sistema ye de 1365,6 díes y la separación media ente les dos estrelles ye de 1,89 UA. Créese que la metalicidá del sistema ye baxa; coles mesmes, la so velocidá al traviés del espaciu concuerda cola d'una vieya estrella de discu, lo cual lleva implícitu una metalicidá inferior a la solar.[4] Les estrelles conocíes más cercanes a esti sistema son GJ 3991 y Gliese 625, a 4,7 y 5,4 años lluz respeutivamente.[7]

Referencies[editar | editar la fonte]