Francisco el tamboriteiru

De Wikipedia
Saltar a navegación Saltar a la gueta
Francisco el tamboriteiru
Vida
Nacimientu 1914
Nacionalidá Bandera d'España España
Fallecimientu

1990

(75/76 años)
Estudios
Llingües castellán
Oficiu
Cambiar los datos en Wikidata

Francisco, el tamboriteiru (1914 - 1990) foi'l nomatu col que se conocía a Francisco Rodríguez García, tamboriteru de Ḷḷarón y La Vilieḷḷa (Cangas del Narcea).

Delles notes biográfiques[editar | editar la fonte]

Nacíu en 1914, "cuando la Gran Guerra", como a él-y gustaba dicir, morrió na seronda de 1990 nun accidente de tráficu. Francisco yera home de munchos oficios, albañil y carpinteru sobre too, y entendíu en tolos temes de la cultural tradicional que supo tresmitir a toos aquellos que con esi interés s'acercaron a la so casa.

Pero lo d'él yera la xipla. Podemos dicir que Francisco nació pa ser tamboriteiru (instrumentista de xipla y tambor). Cuando tenía diez años probó cola gaita, pero nun-y gustó, anque llegó a tocala dalgo. Al otru añu dixo que quería deprender a tocar la xipla y el tambor y asina foi como empecipió la principal dedicación de la so vida y pola que foi apreciáu y conocíu. Los llunes pela mañana marchaba colo puesto y poco más hasta Tormaleo n'Ibias, "un montón de kilómetros pel monte" y quedaba ellí tola selmana deprendiendo a tocar con Francisco Rellán ("El Tíu Vitán"), el so "maestru", como a él-y gustaba llamalu. Al acabar la selmana volvía pal so pueblu y el llunes otra vuelta pa Tormaleo, aspáu por deprender a tocar la xipla. Y asina tuvo un tiempu hasta que deprendió lo que-y facía falta. Llueu practicaba mientres taba de pregueru pel monte y, al cabu, acabó convirtiéndose nuna auténtica figura na fastera suroccidental asturiana y el noroccidente de Lleón, qu'abarca'l sur del conceyu de Cangas del Narcea, Degaña, la montaña d'Ibias y el Vaḷḷe de Fornieḷḷa.

La xipla y el tambor[editar | editar la fonte]

La xipla ye una flauta de madera con bisel que nun tien llingüeta na embocadura. Presenta trés furacos nel otru estremu, dos perriba y unu perbaxo y tien una llargura de dos palmos, unos 41 cm. Ye enforma asemeyada a otras flautes como la maragata, el pito zamoranu, la gaita charra o'l txistu vascu. Nun esisten constructores anguaño n'Asturies y les que se tocan son del tipu maragatu o bercianu de la parte de Lleón. El so ámbitu xeográficu nel suroccidente asturianu vien a coincidir col de La Danza.

L'instrumentista toca cola mano esquierda la xipla y cola otra marca'l ritmu col tambor, colocándolu de mediu llau per d'arriba la cintura.

Según esplica'l profesor Dámaso Ledesma, la xipla saca cuatro notes, que quinteando, dan una escala diatónica ayudada colos armónicos 2u, 3u y 4u de la nota fundamental.

Anque los últimos tambores conocíos usaos por tamboriteros como Francisco o Domingo d'El Reboḷḷal son de tipu redoblante con llaves metáliques pa tensalos, los que tocaben otros tamboriteros anteriores, como Rufino y el "Tíu Vitán", yeren d'estilu tradicional, de diferentes tamaños y tensáu de cuerda.