Estatutu Asturianu de Sabino A. Gendín

El que fore reutor de la Universidá d'Uviéu, Sabino A. Gendín, escribiere un estatutu p'Asturies nel marcu de la campaña autonomista de 1931-1933. Esti estatutu, enforma probe, nun ye l'únicu del que tenemos noticia, yá que sabemos, por exemplu, que Rico Avello y l'Asamblea Federal d'Uviéu teníen escritu tamién un "Estatutu Asturianista" que nun conservamos, y hasta que nun semanariu editáu en Buenos Aires de títulu "Asturias" apaeció l'entamu d'un estatutu p'Asturies, pero ye'l más conocíu de lloñe. La so repercursión foi poca, quciabes porque, como diximos, yera un estatutu qu'atribuyía mui pocos poderes a la Rexón, y malpenes nenguna función verdaderamente política más que pode remocicar les Cartes de los Conceyos; o seique tamién porque provenía d'un espaciu políticu conservador col que l'espaciu autonomista de la dómina nun comulgaba (les piticiones más decidíes d'Autonomía vienen de los seutores federal-agrariu, y en menor midía de los antiguos reformistes).

Sicasí, nun dexa de ser una muestra de que tamién n'Asturies hebo una campaña autonomista con fuercia, qu'hasta consiguió que la diputación nomare a una Comisión pa componer un estatutu oficial, formada pol propiu Rico Avello, Pérez d'Ayala, Menéndez Pidal y Teodomiro Menéndez. Amuesa esto qu'entamaba a espoxigar una conciencia política asturianista que venía desendolcándose dende'l segundu terciu'l sieglu XIX, con campañes autonomistes como la de 1897 o 1918, que desafortunadamente nun dieron en nada pero contribuyeron a formar la base de la que surdiría l'asturianismu post-transición.

Estudiu sobro'l rexonalismu de Sabino A. Gendín nel que s'inxerta la so propuesta estatutaria.

Pasamos agora a ufiertar al públicu'l testu completu del estatutu, tornáu comenientemente al asturianu del castellán.

BASES PAL ESTATUTU REXONAL D'ASTURIES

CAPÍTULU I

La Diputación rexonal. - La so organización.

Base 1ª Constitúise, na anguaño pronvincia d'Uviéu, la Diputación rexonal d'Asturies.

Por decisión de les Diputaciones de Santander y Llión, ratificada en referéndum, aceptaríase la incorporación d'estes provincies, ensin amenorgamientu de les facultaes que tengan les sos Diputaciones, a la Rexón asturiana, pa l'atención de los servicios que figuren nel pautu de la incorporación, y nel que va especificase la forma de contribuyir económicamente a pagar los servicios comunes y la representación de la Diputación montañesa y llionesa na Rexón d'Asturies, a los efeutos mancomunaos.

Base 2ª Empobinará la Diputación rexonal d'Asturies, l'Asamblea de Diputaciones, un Conseyu rexonal y un Presidente. L'Asamblea va escoyese cada cuatro años, y el Conseyu y la Presidencia cada dos.

El Gobernador civil de la Rexón nun va tener intervención dala nel Gobiernu de la Diputación rexonal, como nun se trate d'alderiques, alcuerdos y decisiones que puean producir dalgún alteramientu del orde públicu, o atentar a los pegoyos constitucionales nos que s'afita la República federal.

Base 3ª Va haber una triple representación na Asamblea rexonal: 1ª De los Diputaos d'eleición direuta; 2ª De los Diputaos escoyíos pa les Corporaciones conceyiles , y 3ª De los esbillaos polos Centros asturianos d'América.

Tola Rexón va constituyir un solu Colexu eleutoral, qu'esbillará igual númberu de Diputaos que'l de representantes corporativos. Va usase pa la eleición direuta'l procedimientu de representación proporcional, con recuentu por llista.

Base 4ª Los representantes corporativos van selo por Partíos xudiciales, a razón d'ún por Partíu o por cada 40.000 habitantes o fraición de 15.000 o más habitantes.

Cada Conceyu del Partíu va escoyer un compromisariu, que tien de ser conceyal, y nos Conceyos mayores de 3.000 habitantes, unu por cada 3.000. Les fraiciones van ser despreciaes a efeutos de la escoyeta de compromisarios.

Los compromisarios escoyíos por cada Conceyu - mediante'l sistema de votu restrinxíu si s'escueyen tres o más- van aconceyar nes Consistoriales del de la capital del Partíu pa verificar la eleición de los Diputaos corporativos. La eleición va verificase pol procedimientu mayoritariu s s'escueye ún o dos Diputaos, y de participación de les minoríes por sistema de votu restrinxíu cuando s'escueyan tres o más Diputaos por Partíu.

Va poder votase un númberu de compromisarios y de Diputaos en cadún de los casos qu'arriba s'amuesen, igual al númberu de lo qu'heba qu'escoyer menos unu si son tres o cuatro, menos dos de cuatro a siete, menos tres de siete a diez, menos cuatro de diez a trece, y asina nesta proporción cabera.

Base 5ª El Centru Asturianu de L'Habana va tener una representación na Asamblea de los Diputaos que va escoyer la Xunta del mesmu.

Esta representación podrá facese estensiva al restu Centros asturianos d'América, que cunten más de diez años de funcionamientu, con un representante si tienen 20.000 o más socios y con dos si pasa de 40.000 el númberu d'asociaos.

Base 6ª Van poder ser Diputaos rexonales los ñaturales y fíos de ñaturales de la Rexón, varones o femes, residentes n'esta durante un añu anterior a la data de la eleición, y los demás españoles que cunten con más de cinco años de residencia, faciendo falta en tolos casos tener 25 años cumplíos.

Pa ser Diputaos polos Centros Asturianos d'América basta ser asturianu o fíu d'asturianu siempres que caltenga la nacionalidá española y tener 25 años d'edá.

Base 7ª Van ser eleutores los ñaturales y fíos de ñaturales de la Rexón que vivan na mesma, y los demás españoles con dos años de residencia, que cumplieran 23 años d'edá. El drechu al votu fadráse estensivu a la muyer nel casu de que la República lu conceda pa la eleición de representantes nel Parlamentu español.

Base 8ª El Conseyu rexonal van integralu los representantes de los departamentos alministrativos qu'afite l'Asamblea rexonal.

La Presidencia'l Conseyu va conllevar la xestión del departamentu de Facienda.

Basse 9ª Nun van poder ser Diputaos nin Conseyeros los que tean inhabilitaos criminalmente pa desencolcar cargos públicos, los que tengan intereses contrarios a la Diputación rexonal enantes de verificase les eleiciones, y en cualesquier momentu tratándose de conseyeros, lo que va poder denunciar cualesquier eleutor de la Rexón.

El cargu de Conseyeru rexonal nun ye compatible con cualesquier otru cargu públicu, sacantes el de caderalgu o profesor de los centros docentes que tean n'Uviéu. Los que seyan funcionarios públicos y foren escoyíos Conseyeros quedarán en situación d'escedentes forzosos.

Base 10ª Los cargos de Presidente y demás Conseyeros van ser retribuyíos, y van tener la so residencia n'Uviéu. Los diputaos van esfrutar de dietes pola asistencia a les sesiones.

Mesmo los cargos de los Diputaos como los de Conseyeru y Presidente son reelixibles; n'axuntando'l restu de requisitos pa desendolcalos.

Base 11ª El Presidente y los Conseyeros van ser escoyíos pola Asamblea rexonal ente los Diputaos rexonales y por mayoría absoluta de votos, y si nun hubiere va repetise la votación hasta una tercera na que van selo por mayoría relativa, decidiendo los empates el Presidente de la mesa.

Base 12ª El Presidente de la Diputación rexonal pue ser escoyíu ente persones que nun pertenezan a l'Asamblea; con tal de que tea nel censu eleutoral de la Rexón y nun presente les incapacidaes y incompatibilidaes que s'afiten pa ser Conseyeru rexonal.

Base 13ª Un reglamentu aprobáu pola Asamblea rexonal va regular el funcionamientu de les sesiones del Conseyu.

CAPÍTULU II

Competencia de la Diputación rexonal.

Base 14ª La Diputación rexonal va tener toles funciones que tea anguaño la Diputación provincial, pudiendo facese cargu de la enseñanza secundaria, comercial y industrial - dientro les normes qu'afite l'Estáu-, si bien continuando'l personal d'anguaño comprendíu nos respeutivos escalafones xenerales, a efeutu de lo cual la Diputación va contribuyir a los cargos del Estáu con una participación de los drechos de matrícula de los educandos.

Los edificios del Estáu y el material d'enseñu con destín a los Institutos y el de les Escueles de comerciu y industrial van pasar a ser propiedá de la Rexón.

Base 15ª Van ser amás de la competencia de la Diputación:

a) Constituyir y atender toa clas d'obres d'interés rexonal, como ferrocarriles, puertos, víes y albergues de ganáu, urbanización rural, saneamientu y hixene del campu, etc. calteniéndose dientro de les normes especiales de policía qu'afite pa estos servicios públicos l'Estáu.

b) Repoblar y reglamentar les esplotaciones forestales y fluviales, inclusive organizar una guardería de montes y ríos.

c) El turismu, afitando hoteles en coordinación coles entidaes nacionales o d'otres Rexones.

d) Domentar la cultura y bayura rexonal: academies, museos, escueles y granxes agrícoles, ganaderíes, piscifactoríes, Institutos mineros, etc.

e) Fomentar u organizar instituciones de créitu y cooperatives de venta agrícoles y ganaderes, caxes d'aforros, de seguru escontra'l riesgu agrícola y ganaderu, pósitos mariñanes y otres análogues.

f) El caltenimientu y guarda de los monumentos artísticos.

g) Creación y organización de toa clas d'establecimientos y servicios de beneficiencia, asistencia social y sanidá.

h) Réxime de proteutoráu de les instituciones y patronatos benéfico-privaos de la Rexón, inclusive los docentes, por (incompletu nel orixinal)

i) Regular y dar les concesiones forestales, ictícola y de caza, mines y agües que nun tean acutaes pa la esplotación estatal y siempres qu'esta bayura nun afeute a otres Rexones; y ensin perxuciu del drechu de rescate que tien aquél en casu de guerra, desorde públicu o catástrofes nacionales, y de la llexislación sobre policía y seguridá minera, hidráulica y de la sanitaria de los establecimientos minero-medicinales qu'afite l'Estáu, y del respetu más absolutu de los drechos adquiríos.

j) Intervenir na policía d'abastos, en coordinación col representante del Poder Central y los Alcaldes de los pueblos y dientro de les normes xenerales qu'afite la República.

k) Los servicios xeográficos, meteorolóxicos y estadísticos.

Base 16ª L'Estáu Español delega n'Asamblea rexonal les sos potestaes p'aprobar o reformar les Cartes conceyiles que redacten los Conceyos d'Asturies, que nun quieran acoyese a la llei común.

La Diputación pue facese cargu de los servicios rurales, mediante Comisiones de vecinos delegaes que sustituyan a los Conceyos.

Ye de la responsabilidá de la Diputación autorizar les Mancomunidaes de Conceyos que se quieran organizar pa la prestación de servicios que pertenezan a la competencia rexonal.

Base 17ª Tienen iniciativa pa promover a que se lleve a la práutica dalguna de les funciones de la competencia de la Diputación rexonal y presentar el conseguiente proyeutu d'Ordenanza: a) los Conceyos de cada Partíu xudicial; b) Los Conceyos que representen a más de 100.000 habitantes; c) El 10% de los eleutores.

Si l'Asamblea nun fai de so'l proyeutu deberá sometelu a reférendum popular, considerándose aprobáu si voten favoratiblemente la mayoría de los eleutores. De ser refugáu'l proyeutu nun va poder presentase otru, sobro'l mesmu asuntu o iniciativa conceyil o popular, durante dos años.

L'Asamblea pue aceptar el proyeutu con enmiendes.

CAPÍTULU III

Funcionamientu de la Diputación rexonal.

Base 18ª L'Asamblea de Diputaos rexonales va escoyer dos Vicepresidentes, que sustituyirán, pol orde nel que foren escoyíos, al Presidente, siempres qu'ésti tenga qu'intervenir nes deliberaciones polos asuntos que tean venceyaos col so departamentu, y nos casos de vacante, ausencia, o cuando'l Presidente quiera apartase d'empobinar los alderiques.

Base 19ª Va aconceyar l'Asamblea dos vegaes al añu, y na fecha na que la Ordenanza xeneral de la Diputación afite, pa iguar la fechura de los presupuestos y aprobar les cuntes, cuando la convoque la Presdiencia o'l Conseyu y cuando lo solicite un terciu del númberu de Diputaos rexonal, y dende llueu cuando heba de constituyise o tenga qu'escoyer el Conseyu.

Base 20ª L'Asamblea va poder escoyer Comisiones pa la preparación de los asuntos, estudiu y redaición de les ponencies. Les Comisiones van poder apellar a téunicos y especialistes de la materia que traten, que van cobrar les dietes y honorarios que l'Asamblea afite, pa la reglamentación de los servicios y establecimientos provinciales, permitiéndoles informar a l'Asamblea, cuando ésta lo requiera.

Base 21ª Ye de la responsabilidá de l'Asamblea: a) Discutir y aprobar los presupuestos que presente'l Conseyu rexonal, les cuntes que rinda la Presidencia, una vegada que les censure'l Conseyu y los reconocimientos, les tresferencies y ampliaciones de créitu; b) L'aprobación de los planos xenerales d'obres, y d'aquelles parciales que requieran facer usu de los privilexos d'espropiación forzosa y que se reserve l'Asamblea nes normes xenerales, asina como los actos qu'afeuten al patrimoniu rexonal y escedan de la cantidá afitada pola Asamblea; c) L'aprobación de la Ordenanza xeneral orgánica de la Diputación rexonal, regulando inclusive'l detalle del procedimientu eleutoral; del Estatutu de los funcionarios rexonales; les normes xenerales u ordenances del réxime de los departamentos alministrativos; y los d'organización de los servicios y establecimientos rexonales, como nun se delegue nel Conseyu; d) La supresión de dichos servicios y establecimientos; c) El réxime de les esplotaciones de la bayura rexonal; y d) Toles demás custiones qu'espresamente-y atribuyan n'esti Estatutu rexonal y nos nomaos reglamentos, ordenances y estatutos.

Base 22ª Al Conseyu va pertenecer: a) Decidir nes materies que-y encargue'l Reglamentu y normes d'establecimientu y servicios rexonales, amás de los especificaos n'esti Estatutu; b) El protectoráu de les instituciones benéfico-privaes; c) Aprobación de les obres nes que nun heban d'usase los trámites d'espropiación forzosa; d) Los actos xurídicos qu'afeuten al patrimoniu rexonal y nun tea reservada la so competencia a l'Asamblea; e) L'aprobación y desendolcu de proyeutos d'obres y servicios, tá cuando nun se dea esta circunstancia, qu'escedan de determinada cantidá según les normes aprobaes al efeutu pola Asamblea; f) Afitar los reglamentos complementarios de les ordenances de los departamentos alministrativos aprobaos y de los servicios y establecimientos rexonales. En suma, les funciones d'índole alministrativa.

L'aprobación y desendolcu d'obres y servicios que nun escedan les cantidaes afitaes nes Ordenances, n'habiendo cantidá presupuestao, déxase a la discreición de los Conseyeros de los departamentos a qu'afeuten, ensin perxuiciu de la so responsabilidá énte l'Asamblea, d'escedese de les llendes del presupuestu o de les normes afitaes al efeutu.

Base 23ª El Presidente del Conseyu va selo de l'Asamblea. Amás va ostentar la representación rexonal. Va tener al so cargu'l réxime internu de la Diputación y refrendará los nomamientos de los cargos que competan a l'Asamblea o al Conseyu. Va empobinar el departamentu de Facienda, siendo, por tanto, l'ordenador de pagos.

Base 24ª Los conseyeros sedrán xefes de los sos respeutivos departamentos y del personal a ellos afeutu, que van trabayar dientro de les conseñes presupuestaes y coles atribuciones que-yos dean les ordenances rexonales. Van poder imponer multes que nun escendan les cantidaes que se puean imponer poles faltes penables, a les persones que nun cumplan les normes de los servicios, desixibles na forma qu'afite l'Asamblea.

CAPÍTULU IV

Réxime de los funcionarios.

Base 25ª Cadún de los departamentos va tener un Secretariu-lletráu que va escoyese na forma afitada nel Estatutu de los funcionarios rexonales.

El Secretariu-lletráu de la Presdencia va selo de l'Asamblea y del Conseyu col títulu de Secretariu xeneral de la Diputación rexonal.

Base 26ª Un interventor y un Ayalgueru xeneral de fondos rexonales, coles atribuciones y obligaciones qu'afiten los reglamentos de servicios, van tar a les ordes inmediates de la Presidencia, y van escoyese na forma prevista nel Estatutu de los funcionarios rexonales.

Base 27ª L'Estatutu de los funcionarios rexonales va afitar la forma y condiciones pa entrar nos Cuerpos téunicos, alminsitrativos y subalternos, asina como pa la escoyeta de los cargos especiales, direiciones d'establecimientos y servicios, sacantes que nos reglamentos polos que s'empobien éstos prevengan la so eleición.

El Secretariu, l'Interventor y el Depositariu o Ayalgueru xeneral de la Diputación van pertenecer obligatoriamente a la primer categoría de los Cuerpos organizaos al efeutu pol Estáu nacional.

Base 28ª (Omitida nel orixinal)

Base 29ª Les destituciones del personal solo van poder alcordase, en tolos casos, pol mesmu muérganu que lu escoyó, y mayoría de votos si ye coleutivu, previu espediente, y con garantíes xurídiques énte'l Tribunal contenciosu-alministrativu rexonal.

Base 30ª Va preferise nos cargos subalternos y nos del personal obreru y eventual, los qu'axunten dalgunes d'estes condiciones: a) ser ñatural d'Asturies; b) fíu d'asturianu; c) residente na Rexón nos dos caberos años.

Nos demás cargos que se cubran por concursu va incluyise nes condiciones preferentes el ser natural, fíu d'asturianu, o residente con más de dos años na Rexón.

Por embargu, si les demás Rexones afiten la ñaturalización del personal pa desendolcar cargos nos correspondientes muérganos rexonales, será condición necesaria pal desendolcu de los de la Diputación rexonal d'Asturies tar comprendíu en dalgún de los apartaos del primer párrafu d'esta base.

Si toles Rexones nun desixen la ñaturalización pal desendolcu de funciones públiques rexonales, la incompatibilidá pa exercer cargos na Diputación fadráse efeutiva solo colos ñaturales de les Rexones onde sí se requiera la ñaturalización pa los funcionarios.

CAPÍTULU V

Facienda Rexonal.

Base 31ª La Diputación rexonal va tener entera capacidá p'alquirir, lliberar bienes, y en xeneral realizar cualesquier actu pa les que tea facultada toa persona xurídica.

El presupuestu rexonal va nutrise: a) Poles rentes del patrimoniu rexonal y otros subsidios de calter priváu, donativos, sovenciones, etc.; b) Los drechos y tases polos servicios remuneraos que dea la Diputación; e) Contribuciones pola plusvalía que surda de les finques particulares o entidaes ocasionaes polos servicios o establecimientos rexonales; d) Impuestos qu'hasta'l día de güei tien afitaos la Diputación provincial d'Uviéu, sacantes del de cédules pensionales, que delegará nos Municipios de la Rexón; e) Los impuestos qu'afite con calter progresivu sobro la bayura rexonal, verbi y gracia, sobor la bayura carbonera, desapaeciendo'l 3 por 100 del productu brutu de les Empreses mineres, como impuestu del Estáu, sobro la bayura ganadera, etc.; y f) Por un tantu por cientu cedíu pol Estáu de los sos impuestos y contribuciones, d'alcuerdu cola Rexón, en compensación de los servicios de que se faiga cargu la Diputación rexonal, y qu'hasta la aprobación del Estatutu asturianu la so prestación taba encargada al Estáu.

Base 32ª La Diputación pue facese cargu de la recaldación de toos o determinaos ingresos que pertenezan al Estáu español, contribuyendo al Tesoru de la República col tantu por cientu de los ingresos efeutivos acutaos p'aquel, descontada la prima polos servicios recaldatorios, o por cupos concertaos a la manera alcordada güei coles provincies vasques, cupos revisables nos periodos afitaos nel conciertu.

Base 33ª El conveniu o conciertu económicu col Estáu nacional va facese por una Comisión mista de seis representantes del Gobiernu español y seis de l'Asamblea rexonal, que /presidirá'l de más edá (nel orixinal hai un error y esta conclusión ta inxerta nel siguiente párrafu, nel llugar amosáu)/.

Si hubiere unanimidá nos alcuerdos adoptaos cola asistencia de tolos de la Comisión, van cumplise darréu, sacantes que'l /.../ Presidente de la República ponga'l so vetu por dir a la escontra la Constitución o dalguna llei del Estáu español.

Escontra la decisión del Presidente, la Diputación rexonal pue recurrir énte'l Tribunal de Garantíes constitucionales interesando la declaración de constitucionalidá o llegalidá del alcuerdu de la Comisión mista.

Cuando nun heba unanimidá nel alcuerdu de la Comisión, va decidir el Parlamentu nacional llibremente. A tal efeutu, y pa la so ilustración, va unviase a les Cortes les decisiones y los votos particulares soscritos polos miembros de la Comisión mista. Por embargu, la Diputación rexonal pue arrenunciar a la facultá de facese cargu de los servicios del Estáu delegables, si pa ello nun recibe una compensación económica xusta.

Base 34ª Va ser de la competencia de l'Asamblea de la Diputación aprobar los presupuestos.

L'anteproyeutu va presentalu la Presidencia'l Conseyu, y una vegada aprobáu por mayoría absoluta de votos y coles modificaciones introducíes va pasar a l'aprobación de l'Asamblea.

Base 35ª Tolos interesaos o eleutores van poder reclamar nun plazu afitáu escontra'l presupuestu fechu, mesmo de les sos partes de gastos como d'ingresos, y de la Ordenanza de les desixencies del pagu d'impuestos y multes, énte'l Tribunal contenciosu rexonal polos incumplimientos de la llei que se cometieran na tramitación o sobro'l fondu les cuestiones. Dicha sentencia desfavorable va concedese recurusu a la Diputación rexonal énte'l Tribunal Supremu.

Base 36ª Los mesmos trámites que pa l'aprobaciónde los presupuestos van aplicase a los contratos de préstamos, la emisión d'emprestos y l'aprobación de suplementos y tresferencies de créitu.

Base 37ª La Presidencia va rindir cuntes añales énte'l Conseyu y llueu énte l'Asamblea, acutándose a los interesaos y eleutores de la Rexón el recurrir escontra la so aprobación énte'l Tribunal de cuntes de la República, nun plazu d'un añu, tres el que van entendese como finaes, ensin perxuiciu de les responsabilidaes civiles y criminales que se puean facer efeutives nos plazos qu'afite la llexislación de la República.

CAPÍTULU VI

Garantíes xurídiques de los ciudadanos.

Base 38ª Les garantíes xurídiques que s'ufierten a los ciudadanos escontra los alcuerdos y decisiones de los muérganos qu'estructura a Diputación rexonal, son de calter contenciosu-alministrativu o civil, énte'l Tribunal rexonal correspondiente, cuando aquellos causaren estáu, ye dicir, una vegada iguáu, el recursu gubernativu de reposición si se trata de l'Asamblea, o'l d'alzada énte'l muérganu alministrativu superior, si se trata de providencia del Presidente o alcuerdos del Conseyu.

Base 39ª Imperará como procedimientu contenciosu-alministrativu'l qu'afitare l'Estáu con calter xeneral. El recursu contenciosu-alministrativu va poder exercese non solo por quiemn sufriera una lesión nun drechu suxetivu, sinón polos particulares y les corporaciones públiques o asociaciones privaes que tengan un interés direutu nel asuntu.

Base 40ª Amás de la responsabilidá política en que puean incurrir los Conseyeros rexonales, inclusive'l presidente, énte l'Asamblea por estrallimitación llegal o reglamentaria nel exerciciu del cargu, la que va poder deponelos, va poder desixise a los Diputaos en xeneral, pol mal usu que faigan de la so función, la penal y la civil, d'alcuerdu coles normes qu'afite la República.

Nun va poder encargase de los procesos o xuicios escontra los Conseyeros y Diputaos en primer instancia otros Tribunales que los rexonales, si bien siguiendo'l procedimientu xeneral del Estáu, afayáu a la Rexón.

Como procedimientu pa desixir la responsabilidá civil imperará'l que a tales efeutos afite la República.

CAPÍTULU VII

Revisión del Estaatutu rexonal.

Base 41ª La Diputación rexonal d'Asturies va poder revisar y remocicar el so Estatutu, pol mesmu procedimientu siguíu pa la so fechura. En tolos casos requiérese l'aprobación del Parlamentu español y el referéndum por parte de los eleutores de la Rexón. Pa que s'apruebe en referéndum va facer falta la mayoría de los que voten con un quorum de votantes de dos tercios, pues d'otra manera entenderánse refugaes les modificaciones, si nun afita otros requisitos la Constitución del Estáu.

Un reglamentu, qu'afitará la Diputación rexonal, regulará'l procedimientu pa la práutica del reférendum revisionista.

DISPOSICIONES TRANSITORIES.

1ª El Presidente del Gobiernu de la República va facer la primer convocatoria de les eleiciones de los Diputaos direutos y corporativos, usándose pa la de los primeros el censu eleutoral oficial del Estáu nacional. Pa lo socesivo, les eleiciones van ser convocaes pol Presidente rexonal.

2ª L'Estáu español y la Diputación rexonal van alcordar les bases pa la distribución del personal del Estáu qu'al tresferise determinaos servicios tean de formar parte de les plantilles qu'afite la Diputación, sobro la base de la voluntariedá, y de la preferencia por esti orde nes condiciones d'igualdá de categoría y clas: 1º, ser ñatural d'Asturies; 2º, ser fíu d'asturianu; 3º, desendolcar el cargu na Rexón nel momentu d'aprobase les bases; 4º, tener residío n'Asturies más d'un añu.

Les places que nun se cubrieren en réxime de voluntariedá, van verificase en forma alcordada pol Estáu y la Diputación, atendiéndose a les normes anteriores, y poniendo procuru en tou casu pa respetar los drechos suxetivos económicos que tean en posesión de los funcionarios, o aquellos consideraos n'espeutativa d'esfrute, y que corresponden más bien a situaciones de Drechu oxetivu, como los nomaos drechos pasivos, tolo cual va quedar especificao nes normes concordaes.

3º El trespasu de los servicios públicos del Estáu de que se faiga cargu la Rexón, y tenida en cunta la disposición anterior, va facese por Comisiones mistes nomaes pol Conseyu de la República y el Conseyu rexonal, presidíes pol presidente de la Rexón o'l Conseyeru del departamentu correspondiente en quien delegue; una vegada que l'Asamblea rexonal adoptare l'alcuerdu de comprometese a prestar serviciu, y d'aprobase'l conveniu financieru pola Comisión a que se refier la base 33º d'esti Estatutu.

Les Comisiones mistes van determinar l'inventariu de bienes, y drechos que l'Estáu tresfiera a la Rexón. La Diputación rexonal d'Asturies sustituyirá a la Diputación provincial a la hora d'encargase de les obligaciones, cargues y deldes contrayíes por esta, y tamién del pagu de los prechos pasivos qu'imponía la so Facienda.

Uviéu, xunetu de 1932.