San

Los san, tamién llamaos khwe, basarwa o bosquimanos, son una etnia que vive nes fasteres averaes al desiertu de Kalahari, principalmente en Namibia y Botsuana. Tán emparentaos colos khoikhois, colos que formen el grupu khoisan.

Les llingües de los sans, falaes por alredor de 100.000 persones, caracterícense como les otres llingües de la familia khoisan, pola presencia de los chasquíos.

Los sans nun tienen una pallabra pa indicar el so pueblu en nenguna de les sos llingües. El términu san vien de la llingua khoikhoi y significa "forasteru" o "primitivu". Los holandeses llamáronlos Bosjesmannen ("xente de la viesca"). Toos estos términos, a los qu'hai qu'amestar el de basarwa usáu en Botswana, son consideraos peyorativos y tienden a sustituyise anguaño pola denominación xenérica khoisan.

Los sans estrémense de los pueblos vecinos, khoikhois y bantús por ser d'estatura pequeña, tener la piel claro y arrugao y güeyos en forma d'almendra. Esti aspectu físicu llevó a munchos etnólogos a suponer que yeren orixinarios d'Asia. Anque esta hipótesis ta anguaño abandonada, nun se conoz el so orixe.

Esti pueblu nómada, que vivía de la caza y de coyer fruta, ocupaba antiguamente les llanaes de Tanzania, Etiopía, Uganda y Sudán del Sur. La llegada sucesiva de los bantús y de los khoikhois nos sieglos XII y XIV fizo menguar la población y desplazólos a les tierres menos hospitalaries. La colonización europea, acabó por reducilos a la miseria.

Anguaño los sans viven nuna de les tierres más dures del planeta, el desiertu de Kalahari. Anque la mayoría tán sedentarizaos, hasta polo menos los años 50 habíalos que siguíen llevando la mesma vida nómada a la gueta de caza y plantes que nel Neolíticu.

El gobiernu de Botswana trata de desplazalos de los sos territorios tradicionales, oficialmente pa que se puedan beneficiar de los progresos de la civilización, anque dalgunos denuncien que se trata en realidá de favorecer el turismu o la prospección diamantera de la compañía De Beers.

La mayor parte de los sans actuales nun tien tierres propies, pero dalgunos d'ellos traten d'alcontrar nueves formes de vida, deprendiendo a cultivar la tierra y curiando rebaños pequeños de cabres. Al mesmu tiempu entamen a crease asociaciones en defensa de los sos derechos como la Cooperativa de Granxeros Nyae Nyae en Namibia o Primeros Pueblos del Kalahari en Botswana.

Referencies[editar | editar la fonte]

Enllaces esternos[editar | editar la fonte]