Glaya un país

Glaya un país
Datos
Tipu	álbum d'estudiu
Distribución	discu compautu
Álbum	Dixebra's albums in chronological order (en)
Intérprete	Dixebra
Idioma	asturianu
Xéneru	rock
Sellu discográficu	Discos L'Aguañaz
Productor	Kaki Arkarazo
Fecha publicación	xineru 2000
Duración	45 minutos
Núm. cantares	11 pista musical (es)

Glaya un país ye'l quintu discu del grupu asturianu de rock Dixebra, grabáu nos Estudios ODDS de Xixón y masterizáu nos Katarain d'Azcárate a entamos de 2000 y editáu esi mesmu añu pola compañía discográfica del grupu, Discos L'Aguañaz. La producción corrió a cargu del músicu vascu Kaki Arkarazo.

Glaya un país ye consideráu por munchos siguidores de la banda como'l meyor discu de Dixebra. Supón una importante evolución estilística y téunica con respeutu al anterior trabayu, Dieron en duru, del cualu lo separten unos trés años.

La guitarra meyora'l so soníu y toma nuevos ritmos. Sicasí, la mayor meyora instrumental produzse na gaita, yá que'l grupu sostitúi de magar esti discu la gaita tradicional asturiana pola nueva gaita MIDI inventada y popularizada por José Ángel Hevia. Esto permite algamar una precisión munchu mayor y amás esplorar nueves sonoridaes, coles bayuroses posibilidaes que da l'instrumentu lletrónicu y multitímbricu.

Amás, el gran númberu de collaboraciones de diversos instrumentistes coles que cunta la banda na grabación del discu aporta una gran variedá de matices a los temes. Ye esti l'álbum de Dixebra con mayor diversidá instrumental, yá que'l soníu del grupu vese encontáu por una parte con soníos propios del folk (más qu'en cualaquier otru de los sos trabayos) y por otra con una seición de vientos qu'entama adquirir importancia, como siguirá faciendo en posteriores discos.

Davezu, l'álbum presenta una importante medra de variedá musical nes pieces y de llimpieza y contundencia nel soníu, aspeutu ésti nel que yá l'anterior discu tenía grandes avances.

L'ensame de Dixebra pa esti trabayu foi: Xune (voz), Primi (guitarra), Javi (baxu), Isra (batería) y Fernando (gaita); ye dicir, la mesma que grabara Dieron en duru cola esceición de Fredi nes percusiones.

Nel aspeutu de collaboraciones, esti ye'l discu con más y más conocíos nomes. Ente les voces, Anabel Santiago interpreta una tonada qu'abre'l discu, Fermin Muguruza canta en Wilma Loulé y Xosé Ambás (N'arba) fai lo propiu en La danza, tema onde tamién toca la gaita. Amás, Maxi (Fe de Ratas) y Mapi Quintana aporten coros.

Nel separtáu instrumental, acumulense les collaboraciones de Rubén Bada y Martín Fernandez-Peña (dambos per entós en Xéliba), el primeru con bouzouki y violín y el segundu col cordión diatónicu; Merce Santos (La Bandina) cola zanfonía y la caxa escocesa, Paco Martínez con programaciones y arreglos de vientu; y una seición de vientos qu'apaez en dellos temes, con David Colado y Toño Gómez al trombón, Agus Lara a la trompeta y Eladio Sánchez al saxo. Estos dos últimos realizaríen la xira d'esi añu con Dixebra, pa incorporase definitivamente a la banda en 2001.

Cancioneru

1. Mañana fría
2. Baila'l mileniu
3. Amnesia
4. Vaqueira
5. L'idiota
6. Hestories repetíes
7. La danza
8. Puta vida
9. Búscate a ti mesmu
10. Wilma Loulé
11. La partida

Enllaces esternos

• Páxina del discu na web oficial de Dixebra
• Páxina del discu en Musicbrainz

• Datos: Q5008766