Antonio Lobato

Antonio Lobato
Vida
Nacimientu	Uviéu, 7 de setiembre de 1965 (58 años)
Nacionalidá	España
Estudios
Llingües falaes	castellanu
Oficiu	periodista, presentador de televisión
IMDb	nm2047802

Antonio Lobato Porras (7 de setiembre de 1965, Uviéu) ye un periodista deportivu asturianu. Ye perconocíu poles sos tresmisiones televisives de la Fórmula 1 n'España.

Biografía

Ñacíu n'Uviéu, llicencióse en ciencies de la información en Madrid. Entamó cola so carrera profesional en 1987, na seición de deportes del diariu ABC. Llueu continuó na radio, trabayando como cronista deportivu, cubriendo acontecimientos deportivos como los Xuegos Olímpicos de Barcelona 92 o delles ediciones de la Vuelta Ciclista a España. Tuvo na Radio España primeru y llueu n'Onda Cero. A la par del so trabayu nesta cabera emisora, estrenóse na televisión en 1991, como agabitador del programa deportivu Campeones de Telecinco.

Dempués de trés años n'Onda Cero, n'ochobre de 1994 anoxó la radio pa metese pa la redaición de deportes d'Informativos Telecinco. En xineru de 1997 pasó a presentar la información deportiva na edición del meyudía d'Informativos Telecinco y en 1999 foi nomáu subdireutor de deportes de la cadena.

En 2001 pasó a presentar La tertulia deportiva, espaciu de debate deportivu emitiu diariamente dempués del informativu vespertín.

En 2004 Telecinco axencióse de los derechos de tresmisión de la Fórmula 1 n'España y Lobato, que xá tresmitiere'l Giro d'Italia en 1995 pa la cadena privada, foi l'elexiu pa facer la cobertura de les carreres. Ello daría-y gran popularidá al periodista, xá que pudo rellatar los dos primeros títulos mundiales d'un pilotu asturianu Fernando Alonso na historia de la Fórmula 1. El surdimientu d'Alonso escopetió les audiencies televisives de les tresmisiones de Telecinco, que s'asitiaren, dende entós, ente los programes más vistos del añu n'España.

Ficiéronse conocíes dalgunes frases de so nos grandes premios, xunto col so collaciu de tresmisión, como: "¡Si parpadean se lo van a perder, porque esto es la Fórmula 1 en estado puro!" (¡Si apestañen van perdeselo, porque esto ye Formula 1 n'estáu puru!), "¡Magic Alonso esta volando literalmente sobre la pista!"(¡Magic Alonso ta alando lliteralmente sobro la pista!), "¡El hijo del viento!"(¡El fiu del vientu!), "¡El rey de la lluvia!"(¡El rei de la muga!), ente otres.

En dos ocasiones Antonio Lobato camudó unes pallabres col rei Xuan Carlos I en direutu mentanto tresmitía les carreres.

Moteyáu popularmente como el calvo de Telecinco (el calvu de Telecinco), Lobato convirtióse nún de los rostros más encantexaos de la cadena privada. Prueba d'ello, en 2006 foi esbilláu pa presentar la tresmisión de las campanaes de Nuechevieya xunto con Carmen Alcayde. Asinamismu, en 2006 dio-y la so voz pal doblax del personax Bob Culatas de la película Cars n'España y pal videuxuegu de PlayStation 2 Formula One 2006, faciendo de comentarista de les carreres. Amás, foi miembru del xuráu de los Premios Príncipe d'Asturies de los Deportes dende l'añu 2002.

En setiembre de 2007 Telecinco estructuró la so estaya d'información deportiva y Lobato foi nomáu subdireutor d'informativos pa eventos y tresmisiones deportives de la cadena, amás de siguir dirixendo y rellatando'l Campeonatu del Mundiu de Fórmula 1.

Dende la temporada 2009 de Fórmula 1, Lobato tresmite les carreres en La Sexta, canal que se fizo colos derechos d'emisión palos siguientes cinco años y colos servicios del periodista.

En payares de 2010, Lobato foi honráu col Premiu Ondas (xunto col equipu de La Sexta) pola so cobertura n'abiertu pala Fórmula 1.

Enllaces esternos

• Antonio Lobato na Internet Movie Database (n'inglés)

• Datos: Q3329893