Astenosfera

Astenosfera y corrientes de conveición

La astenosfera (del griegu ἀσθενός, ‘ensin fuerza’ + σφαῖρα, ‘esfera’) ye la zona cimera del mantu terrestre que ta debaxo de la litosfera, aprosimao ente 250 y 660 quilómetros de fondura. La astenosfera ta compuesta por materiales silicataos dúctiles, n'estáu sólidu y semifundíos parcial o totalmente (según la so fondura y/o proximidá a bolses de magma), que dexen la deriva continental y la isostasia. Sobre ella muévense les plaques tectóniques.

Constitución

La litosfera, que constitúi una estensión de la noción de corteza terrestre, tien un grosor mediu de 100 km d'espesor so los océanos y alredor d'ente 150 y 250 kilómetros so los continentes y cratones más antiguos.

Na astenosfera esisten movimientos lentos de conveición que despliquen la deriva continental. Amás, el basaltu de la astenosfera flúi por estrusión a lo llargo de les dorsales oceániques, (lo que fai que s'anueve y espanda constantemente'l fondu oceánicu), mientres que onde la espansión atopa una torga representada por un continente, fúndese baxo ésti, volviendo asina la materia del fondu a fundise nel senu de la astenosfera y mantu más fondu, fenómenu conocíu como subdución.

Pela so parte inferior, la astenosfera va perdiendo les sos propiedaes perbaxo de los 350 km y, progresivamente adquier la rixidez del mantu inferior hacia la profundidá de 850 km.

Hestoria

En 1899, Dutton definió una zona ríxida (corteza o litosfera hasta los 100 kilómetros de profundidá y otra zona feble baxo a la que denominó astenosfera.

Pa desplicar el fenómenu de la isostasia, Joseph Barrell en 1914 afitó la hipótesis sobre la esistencia de la astenosfera, ensin llende inferior, pos desconocíase la esistencia del núcleu.

En 1926, Beno Gutenberg afayó que la velocidá de les ondes sísmiques amenórgase en redol a un 6 % a una profundidá averada ente 100 y 200 km., atribuyéndose la causa a una menor densidá del material.

En 1962 Don Anderson, nun atopó una teoría lo suficientemente convincente tocante al descubrimientu de Gutenberg, una y bones esi nivel ye bien heteroxeneu, amás atopóse notables diferencies na so composición en niveles baxo les cuenques oceániques al respective de los cratones continentales, polo que nun pue considerase una capa universal. Al traviés del estudiu de les ondes sísmiques aniciaes nos ensayos de les bombes nucleares, determinó que la zona de baxa velocidá taría ente 60 y 250 km. de profundidá.

Intentábase atribuyir esta propiedá a la mesma astenosfera. Pero dende'l descubrimientu del Paleomagnetismu y la sismicidá profunda, dambes teoríes quedaron estremaes.

Sicasí, en 1968 John Tuzo Wilson entemeció nuevamente estos conceutos dándo-y un cuerpu teóricu d'escasa validez científica al basar tala teoría sobre la esistencia d'una capa de enlentecimientu de la velocidá de les ondes sísmiques llamada Astenosfera, contestáu por Vladimirovich, que-y retrucó que nun debe de basase única y puramente en pruebes atopaes na xeoloxía de la cuenques oceániques.

Ente 1972 y 1981 Anton Halles trata de xustificar la esistencia de la astenosfera, más por necesidá, que por pruebes científiques fehacientes.

Ente 1975 y 1979 Sengör y Burke alderiquen nuevamente, queda demostrada la esistencia d'una diferencia vultable ente la estructura fonda de los continentes y la de la corteza oceánica, según Sipkin y Jordan. Baxo los cratones más antiguos, éstos algamen una fondura d'hasta 400 km. y la zona d'atenuamientu de la velocidá de les ondes sísmiques ye superior. Deduzse que los continentes pueden tar fondiaos al traviés de quilles (n'inglés, keels) direutamente al nucleu, como si foren raigaños de material más compautu, pero nun torga'l movimientu de los mesmos a gran escala. Entós, foi cuando la astenosfera definióse hasta una profundidá de 660 kilómetros so la superficie.

Duldes sobre la esistencia de la astenosfera

Cuando Wegener definió la so Deriva Continental el motor pa basar el desplazamientu de les plaques continentales básase na esistencia d'un fluxu convectivou nel mantu (depués na astenosfera) pero lo que ye güei, nun hai pruebes abondes sobre la esistencia d'esti fluxu convectivu.

Dende los años noventa, la teoría sobre la esistencia d'esta capa púnxose en dubia, básica pa desplicar la deriva continental y la isostasia según datos nuevos descubiertos, proponiéndose un sistema au la corteza moviérase solidariamente col mantu soxacente hasta'l nucleu terrestre. Propúnxose, coles mesmes, que l'equilibriu isostáticu produciríase ente la parte inferior del mantu (sólidu) y la parte esterior del nucleu terrestre (líquidu). Sicasí, esta postrera propuesta nun cunta con datos abondos al respeutu pa definir la situación.

N'España, el Dr. Francisco Anguita de la Universidá Complutense de Madrid llidera l'alderique sobre la posible inesistencia de la astenosfera.

Bibliografía

• L'orixe de los continentes y océanos, Madrid: Metáfora, ISBN 978-84-95799-15-9 
• Ciencies de la Tierra, una introducción a la xeoloxía física (volume I) (8ª edición), Madrid: UNED/Pearson, ISBN 978-84-8322-665-0 

Enllaces esternos

• Un alderique sobre la astenosfera
• Adiós a la astenosfera. Bye-bye, asthenosphere
• Esta obra remanez de la traducción de Astenosfera de Wikipedia - castellanu, espublizada polos sos editores baxo la Llicencia de documentación llibre de GNU y la Llicencia Creative Commons Atribución-CompartirIgual 3.0 Unported.