Fala del Rebollal

La Fala d'El Rebollar, tamién conocida cenciellamente como palra, ye una variedá dialeutal llocal del estremeñu, una fala de tránsitu ente'l dominiu llingüísticu asturlleonés y el castellanu. Fálase na contorna homónima de la provincia de Salamanca, formada por los conceyos de Navasfrías, El Payu / El Payo, Robleda / Robrea y Villasrubias, con influyencies nel norte de la provincia de Cáceres, y nos pueblos cercanos de la faza portuguesa.

Trazos que concasen col asturlleonés

• Mantenencia aspirada del fonema inicial /F/: ḥígau 'fégadu', ḥambri 'fame', ḥadel 'facer', él ḥadi 'elli fae', ḥoci 'foz'.

• Piesllu xeneral de les vocales átones finales -e > -i: ḥuenti, nochi, dendi, esti, calli 'cai', aḥundi 'afonda'. El piesllu prodúzse tamién nos refesivos ḥugalsi 'fugase', aḥallalsi 'afayase'.

• Piesllu xeneral de les vocales átones finales -o > -u: mesmu, por esu.

• Piesllu xeneral de les vocales átones finales -es > -is: antoncis, raicis.

• Piesllu xeneral de les vocales átones finales -os > -us: queremus, añus.

• Cayida xeneral de la oclusiva sonora /d/: vertúis 'virtudes', metá, defendeol 'defensor', líquiu 'llíquidu'.

• Ensertu del artículu enantes del posesivu: las nuestras callis, los nuestrus dagalis 'los nuesos rapacinos'.

• Mantenencia de la vieya -e llatina: redi 'rede', ḥoci 'foz', ḥazi 'fexe', tosi 'tuse', sedi 'sede', peci 'pexe'.

• Acabu xeneral nel diminutivu –inu: librinu 'llibrín', casina, gatinu 'gatín'.

Trazos que concasen col castellanu

• Non palatización de L-: lengua, lumbri, luna, leyis. Esti trazu torga la posibilidá d'incluyir esta fala dientro del dominiu llingüísticu astur.

• Tiempos verbales compuestos: han cogíu, han síu ḥechas.

• Asitiamientu preverbal de los complementos direutu ya indireutu: Le diji l’utru dia.

Trazos ermunos de la palra

• Cambéu del l > r nos cuelmos trabaos por consonante (cl, pl, bl, fl…): craru, pruma, brandeal 'ablandiar', puebru, fruyil 'fluyer', frol 'flor'.

• Al aviesu cambéu del r > l nel cuelmu pr-: plau 'prau', templanu tempranu'.

• Acabu xeneral de -r cabera etimolóxica’n -l, mesmo que en delles fales del andaluz oriental: puel 'poder', trael 'trayer', amol 'amor'.

Referencies bibliográfiques d'interés

• "El habla de El Rebollar. Descripción" – Ángel Iglesias Ovejero
• "El habla de El Rebollar. Léxico" – Ángel Iglesias Ovejero
• "Robleda. Crónica y descripción del lugar" – José Alonso Pascual
• "Breve descripción de Peñaparda" – José Benito Mateos Pascual
• Revista electrónica "La Gurulla"
• "El corral los mis agüelus", primer llibru lliterario escritu n'esta variedá llingüística

Enllaces esternos

• Ficha de El Rebollar en la página del Turismo del Reino de León
• "El corral los mis agüelus"