Lourdes Álvarez

Lourdes Álvarez nació en 1961 en L'Agüeria d’Urbiés (Mieres) y ta llicenciada en Filoloxía Hispánica.

Collaboró desde moza en delles revistes lliteraries como Cuélebre Literario, Malku, Adréi o Lletres Asturianes. Lourdes Álvarez ta incluyía en toles antoloxíes poétiques d’estos últimos años: Xosé Bolado, Antoloxía poética del Resurdimientu; Ricardo Labra, Muestra corregida y aumentada de la poesía en Asturias; José Ángel Cilleruelo, Nórdica; y Leopoldo Sánchez Torre, Les muyeres y los díes de la poesía asturiana contemporánea.

Ye autora de dellos llibros de poesía: Aldabes del olvidu (1991), Cálices de la nueche (1992), Mares d’añil (Ganador ex aequo del Premiu “Teodoro Cuesta” de Poesía 1992) y Poesía escoyida. 1985-1997 (1997). En 1994 gana otra vez el “Teodoro Cuesta” col poemariu Como aquella que yeres. Del añu 2006 ye Mediando distancies, volume qu'axunta dellos de los llibros de l'autora. Equí apaez per vez primera espublizáu integramente'l poemariu Como aquella que yeres.

Lourdes Álvarez ye una de les meyores voces de la poesía asturiana del Surdimientu. Autora de voz singular y única, la so obra poética ta caracterizada pol calter simbolista y pola bayura d'imaxenes abstractes.

Tien tamién dalguna traducción: fizo la versión al asturiano de la narración infantil Otto ye un rinoceronte, d’O. L. Kirkegaard y tornó'l llibru de relatos Un sudaca na corte, de Daniel Moyano.