Groucho Marx

Groucho Marx

Julius Henry Marx, conocíu artísticamente como Groucho Marx (Nueva York, 2 d'ochobre de 1890 - Los Ángeles, 19 d'agostu de 1977) foi un actor, comediante y escritor estaunidense, conocíu principalmente por ser unu de los miembros de la familia cómica Hermanos Marx. Algamó la fama como maestru del humor intelixente.

Vida y obra

Julius Henry Marx nació en Nueva York, criándose nel somantu d'una modesta familia d'inmigrantes alemanes xudíos. So madre yera Miene (Minnie) Schoenberg (1864-1929) qu'emigró a Estaos Xuníos dende Alemaña xunto a so padre y so madre y los sos hermanos. So padre yera Simon (Samuel) Marx (nacíu como Marrix) (1860?-1933), inmigrante alemán, nacíu n'Alsacia cuando formaba parte de Francia y amestada posteriormente al Imperiu Alemán depués la Guerra Franco-Prusiana en 1871, colo que Samuel pasó de ser ciudadanu francés a ciudadanu alemán. Argullosu del so pasáu francés foi conocíu tola so vida como Frenchy.

La familia Marx creció nel barriu neoyorkín de Yorkville, en Manhattan un pequeñu barriu xudíu arrodiáu por comunidaes irlandeses, alemanes y italianes.

Marx debutó nel mundu del espectáculu a los 15 años como cantante solista. Pasáu dalgún tiempu entamó a actuar xunto a los sos hermanos nel vodevil, primero en tríos o cuartetos musicales y finalmente en revistes. La obra Cocoanuts, interpretada de 1925 a 1928, dio a los Marx la so oportunidá en Broadway. Como consecuencia d'esti éxitu, y depués d'escaecer el so fracasáu rodaxe d'una primera y perdida película muda 1921 Humor Risk, firmaron tamién un acuerdu cola Paramount, cola que ficieron varies películes, como Horse Feathers, Duck Soup, y A Night at the Opera ente otres.

Depués de salir de la Paramount, y gracies al productor Irving G. Thalberg, los hermanos Marx entamaron a trabayar cola Metro Goldwyn Mayer, faciendo películes como "A Night at the Opera" y "Horse Feathers". Nos años 50 cada unu de los tres hermanos continuó trabayando independientemente en radio, televisión y cine, siendo Groucho el que más éxito algamó, gracies a la so faceta como escritor y sobre todo gracies a su programa televisivu "You bet your life", col que se fizo realmente famosu nos Estaos Xuníos ente una xgeneración de persones que nunca lo vieren nel teatru y que apenes lu conocíen de dalguna de les sos vieyes películes.

Lo mesmo que los sos hermanos Harppo y Chico son difíciles de reconocer ensin los sos traxes y la peluca ye bien difícil identificar a Groucho ensin les sos gafes, y el so falsu mostachu y ceyes.

Groucho morrió en Los Ángeles por mor d'una neumonía, dexando atrás tres matrimonios, Ruth, Kay y Eden, tres fíos, Arthur, Miriam y Melinda, 18 películes, 14 d'elles xunto a los sos hermanos, y millones d'admiradores.

Groucho Marx foi incineráu, los sos restos guárdense nel Eden Memorial Park, siendo falsu l'epitafi' "Perdonen que nun me llevante pa saludalu" que popularmente se cree que ta na so tumba.[1]

Enllaces esternos

• Biografía especial de Groucho Marx Vida y Obra
• Artículos y Entrevista de Groucho Marx