Sama (Llangréu)

43° 17' 40" N, 05° 40' 55" W

Casa'l conceyu, en Sama

Sama ye una parroquia del conceyu asturianu de Llangréu. Asitiada na fastera meridional del mesmu, llenda cola parroquia de La Felguera al norte y noreste, cola de Lada al oeste, cola de Ciañu al sur y col conceyu de Samartín del Rei Aurelio al oeste. La so parte urbana conforma el distritu de Sama, ún de los seis qu'integren la ciudá de Llangréu. Aparte d'ella, compriende los núcleos de población que vienen darréu: Artosa, La Cabaña, El Cabañín, La Cantera, Los Cuarteles de la Güeria, Costadarcu, El Felguerosu, La Güeria, Les Yanes, El Maeral, La Peña, La Raposa, Rondera, Ronderina, La Sienra, El Valle, Cuetos, La Foyaca, La H.uecara, Pertegal, Les Pieces, El Pontón, El Prau l'Americanu, El Ponticu y Xarrota. La estensión de la parroquia, que la so ilesia ta dedicada a Santiagu, ye de 5,47 km², y la so población, escluyíos los habitantes del distritu urbanu, qu'apaecen nes estadístiques axuntaos a los de los otros distritos, ye de 428 habitantes (INE, 2010).

El mercáu celébrase los llunes, y el principal nucleu comercial ye la cai Dorado. A orielles del ríu Nalón ta allugáu'l Parque Dorado, de planta asemeyada a tolos de la cuenca del Nalón. La ilesia cabezalera de parroquia ye d'estilu neogóticu, reconstruyida depués de la Revolución de 1934 con inscripción "Cayíos por Dios y por España"; esto resulta estraño dada la natura revolucionaria qu'acompañó a estes tierres en dellos asocedimientos pasaos. En dalgunes de les sos muries puen vese pintaes de la mena: "Mines a cielu abiertu NON", per aciu de la tradición minera, deficitaria na rexón, que requirió l'intervencionismu estatal pal so caltenimientu, con bien de protestes, paros, güelgues y revueltes.

Sama abeya anguaño la Casa'l Conceyu de Llangréu y ye'l segundu nucleu de población del Valle del Nalón. Les sos fiestes son: Santiago (xunetu), Los Güevos Pintos (Pascua) y San Xuan (xunu, nel barriu La Llera).

Semeyes

• 
  Casa'l conceyu
• 
  Ilesia de Santiagu

Edificios d'interés

• Casa del Conceyu
• Ilesia de Santiago
• Edificiu Banco Herrero
• Casa Cuca
• Edificiu de la Montera
• Antigües escueles Dorado

Bibliografía

• Espediente colos topónimos oficiales de Llangréu
• VV.AA., Diccionario geográfico de Asturias. Editorial Prensa Asturiana, Uviéu, 2000.