Escudu d'Ayer

L'escudu d'Ayer, conceyu asturianu, ye un escudu dividíu en cuatro partes o cuarteles.

Nel primeru d'ellos, el d'enriba a la izquierda, vense tres castiellos d'oru que faen referencia a los qu'en tiempos pasaos hubo nel conceyu: los de Pel.luno, Soto y El Pino.

Nel segundu, enriba a la derecha, tán representaes les armes de los Quirós per aciu de dos llaves, seis lunetes puestos de tres en tres y tres flores de lis d'oru.

El terceru, abaxo a la izquierda, ta dedicáu a les armes de los Solís, siendo un sol d'oru sobre fondu de gules.

Por último, nel cuartu, abaxo a la derecha, ye pa les armes de les families Castañón y Nembra. Vese una castañal de la que sal un brazu armáu con un calderu colgando d'él.

Nel centru de los cuarteles ta la Cruz de la Victoria n'oru y piedres precioses.

Rematando'l conxuntu atópase la corona real, yá que'l conceyu foi realengu de Doña Urraca "l'asturiana", reina de Navarra, d'Asturies, y Señora d'Ayer.