Belarmino Tomás

Homenaxe de Darréu a Belarmino Tomás en Llangréu na cai que lleva'l so nome y énte'l monolitu a la so persona (07-10-2006)

Belarmino Tomás Álvarez (Aguilar de Campos, Valladolid, 1892 - Méxicu, 1950) foi un sindicalista y políticu socialista.

De familia humilde entamó a trabayar ceo na mina. Foi militante del PSOE, secretariu del Sindicatu Mineru Asturianu, voceru de la Federación Internacional de Mineros, conceyal del ayuntamientu de Llangréu y Presidente del Conseyu Soberanu d'Asturies y Lleón.

Revolución d'Ochobre

Foi ún de los cabezaleros de la Revolución de 1934 que foi vencida militarmente pol exercitu de la II República Española na que mandó una columna de milicianos y sedría'l presidente del tercer comité revolucionariu y l'encargáu de negociar col xeneral del exercitu republicanu Eduardo López Ochoa les condiciones de la rendición faciéndolo como xeneral del Exércitu roxu. Ignacio Lavilla en "Los hommbres de Octubre" reproduz el rellatu que'l mesmu Tomás fixere de lo que-y dixera a Ochoa:

"Enantes qu'empencipiemos a tratar de lo que me traye equi, quiero que nun pierda usté de vista que los que tamos frente a frente somos dos xenerales, el de les fuercies gobernamentales, que ye usté, y el de les revolucionaries, que soi yo"

En "1934. La guerra civil empezó en Asturias" d'Ángel Palomino Belarmino apaez como "xeneral en xefe del exercitu roxu d'Asturies".

Na negociación Belarmino Tomás punxo como condiciones, siguiendo'l rellatu de so recoyíu por Lavilla:

"que nun hebia represalies, a nun ser les que remanen de l'aición de los tribunales de Xusticia; qu'en saliendo les fuercies d'Uviéu pa entrar na cuenca nun vaiga nin el Terciu nin los Regulares, pos dempués de lo que vimos si la xente los viere nun saldríen les coses tan bien"

Tres negociar una rendición honrosa foi despedíu pol xeneral Lopez Ochoa con saludu militar nel patiu del edificiu pa plasmu de la prensa elli aconceyaos. En llegando a Sama y dempués d'aconceyase'l Comité Revolucionariu, dende'l balcón del Ayuntamientu de Sama empobinó l'últimu discursu a los revolucionarios ellí aconceyaos informando de les condiciones algamaes. Dempués de momentos d'alderique énte revolucionarios partidarios de caltener la llucha y de los de la rendición decidióse aceutar. Les caberes pallabres de Belarmino Tomás foron, como recueye Juan José Menéndez García:

"Namás que vos dicimos, camaraes, sobre esta cuestión, la nuesa cabera pallabra ye un puxa a los valientes trabayadores d'Asturies y a la revolución social"

Conseyu d'Asturies y Lleón

Foi escoyíu diputáu por Asturies del Frente Popular en febreru de 1936. Demientres la Guerra Civil tuvo al frente de les columnes de mineros que n'agostu atacaron Uviéu.

Foi presidente del Comité d'Asturies del Frente Popular primero y del Conseyu Interprovincial d'Asturies y Lleón y finalmente Presidente del Conseyu Soberanu d'Asturies y Lleón, nel qu'además ocupó la Conseyería de Guerra. El conseyu soberanu editará moneda propio siendo conocíos los billetes popularmente como "Belarminos". Belarmino Tomás quedó en Xixón fasta que diba ser tomada poles tropes nacionales.

Esiliu

El 20 d'ochobre cae'l Conseyu Soberanu y Belarmino Tomás, como munchos asturianos, fuxirá llogrando llegar a Francia treslladaráse depués a Barcelona onde sedrá vicepresidente de l'Agrupación Socialista de Refuxaos Asturianos (ASRA). Tres la cayida de Cataluña esiliaráse a Méxicu onde morrerá.

Bibliografía

• Ignacio Lavilla, "Los hombres de Octubre" , Semana Negra de Xixón, Xixón, 2004.
• Juan José Menéndez García, "Belarmino Tomás, Soberano de Asturias" , Biblioteca Julio Somoza, Temas de Investigación Asturiana n^u24. Silverio Cañada editor, Xixón, 2000.
• Ángel Palomino. "1934.La guerra Civil empezó en Asturias". Colección Documento. Editorial Planeta, Barcelona , 1998