Xuan Carlos I d'España

Juan Carlos I Alfonso Víctor María de Borbón y de Borbón ye l'actual Rei d'España.

Biografía

Ñetu d'Alfonso XIII y fíu de Xuan de Borbón, Conde de Barcelona, nació en Roma, Italia'l 5 de xineru de 1938, onde taba esiliada la so familia dende so salida d'España tres la proclamación de la II República.

Na entrevista de 25 d'agostu de 1948 ente Franco y el Conde de Barcelona alcuérdase que'l Príncipe se tresllade a España pa cursar equí los sos estudios.

Según lo alcordao, cursó en Madrid el bachilleratu. Llueu realizó la so instrucción militar na Academia Xeneral Militar de Zaragoza (1955-1957), na Escuela Naval Militar de Marín en Pontevedra (1957-1958) y finalmente na Academia Xeneral del Aire de San Xavier (Murcia) (1958-1959).

En 1962 casóse con Sofía de Grecia, la cual caltenía, xuntu col entós príncipe Xuan Carlos, una rellación familiar bona con Franco. Con Sofía de Grecia tuvo tres fios: Elena y Cristina, infantes d'España (que ya-y dieron cinco nietos); y Felipe, Príncipe de Asturias y heriedu al tronu.

En virtú de la Llei de Socesión a la Xefatura del Estáu de 26 de xunetu de 1947, foi propuestu por Franco como'l so socesor a títulu de Rei, lo cual foi ratificao poles Cortes en xunetu de 1969, énte les cuales xuró su nomamientu y la defensa de les Llei Fundamentales.

Asumió interinamente la Xefatura del Estáu demientres el franquismu (19 de xunetu a 2 de setiembre de 1974 y 30 d'ochobre a 20 de payares de 1975), por malures de Franco. Tres de la muerte d'ésti, foi proclamáu Rei d'España el 22 de payares de 1975.

El 14 de mayu de 1977 el Conde de Barcelona, resiñó los sos drechos dinásticos hestóricos y la xefatura de la Casa Real na persona de Xuan Carlos, una vez qu'hubo constatao'l compromisu d'esti na instauración de la democracia. Con esta arenuncia reanudábase la dinastía hestórica.

Reináu

Demientres'l so reináu aprobose la Constitución Española (28 d'avientu 1978) que definiendo les funciones del rei, suprime los poderes executivos otorgaos pol franquismu y convierte al rei nun monarca parllamentariu al usu n'Europa Occidental.

D'esta miente, son atribuciones constitucionales del rei: sancionar y promulgar les lleis, disolver les Cortes y convocar eleiciones, proponer y nomar al candidatu a la Presidencia del Gobiernu, exercer la xefatura suprema de les Fuercies Armaes, simbolizar la unidá del Estáu y arbitrar y moderar el furrulamientu de les instituciones.

Ún de los momentos más graves a los que tuvo que facer frente'l rei Xuan Carlos foi l'intentu de güelpe d'estáu de 23 de febreru de 1981, el conocíu como "23-F".

Esi día, demientres la investidura del candidatu a la Presidencia del Gobiernu Leopoldo Calvo Sotelo, prodúxose la toma del Congresu de los Diputaos por parte de fuercies de la Guardia Civil al mandu del Teniente-Coronel Antonio Tejero. Al empar na Capitanía Xeneral de la VI Rexón Millitar (Valencia) el Teniente-Xeneral Jaime Milans del Bosch ocupó les cais de la ciudá con tanques y hubo diversos conatos n'otros puntos, tales comu la toma de los estudios de Televisión Española nel Prado del Rey (Madrid).

La intervención del Rei desautorizando'l güelpe, frenó la insurrección y contribuyó a aumentar el so carisma ente seutores políticos que fasta entós nun yeren mui afines a la forma de gobiernu monárquica.

Predecesor: Alfonso XIII

Rei d'España 1975 -

Socesor: Nel cargu