20th Century Studios

Twentieth (20th) Century Fox ye'l nome curtiu de la Corporación Fílmica Twentieth Century Fox, ye ún de los principales estudios de cine, asitiáu nel área de Century City en Los Ánxeles (California), Estaos Xuníos, xusto al oeste de Beverly Hills. Esti estudiu ye una subsidiaria de News Corporation, el conglomeráu mediáticu controláu por Rupert Murdoch.

Hestoria

La compañía ye'l resultáu d'una fusión en 28 d'avientu de 1934 ente Fox Film Corporation creyada por William Fox en 1912, y Twentieth Century Pictures, creyada en 1933 por Darryl F. Zanuck, Joseph Schenck, Raymond Griffith y William Goetz. William Fox, foi un pioneru na creación de cadenes de sales de cine, entamó a producir películes en 1914, y en 1917 atopó una mina d'oru al ufrir la sensación del cine mudu, Theda Bara. Foi más un empresariu qu'un home d'espectáculu, Fox concentróse n'alquirir y construyir sales; les películes yeren secundaries. Cuando'l soníu aportó al cine, Fox alquirió los drechos d'un procesu alemán pal soníu nes películes que nomó "Movietone", en 1926 empecipió a ufiertar proyeiciones con grabaciones de música y d'efeutos. L'añu siguiente dio aniciu a "Noticies Fox Movietone", una presentación selmanal de noticies que se presentó fasta 1963. La creciente compañía necesitaba espaciu, y en 1926 Fox alquirió trescientos acres nún tarrén ermu al oeste de Beverly Hills ú construyó "Movietone City", l'estudiu meyor equipáu de la so dómina.

Cuando'l so rival Marcus Loew morrió en 1927, Fox intentó mercar les propiedaes de la familia; Loew's Inc., que controlaba más de doscientes sales asina como tamién l'estudiu MGM. Cuando la familia accedió a vender, la fusión de Fox y Loew's Inc. anuncióse en 1929. Pero'l xefe l'estudiu de MGM Louis B. Mayer -que nun foi incluyíu nel tratu- refugó, usando conexones polítiques, fizo un llamáu a la Xunidá anti-monopolios del Departamentu de Xusticia pa que bloquiara la fusión. Cola fortuna favoreciendo a Mayer nuna curiosa forma, Fox sofrió un accidente automovilísticu, y pa en cuando se recobró, la cayía de la bolsa de 1929 escosara cásique tola so fortuna, y punxo fin a la so ansiada fusión.

Sobre-espardíu y vera de la bancarota, Fox foi-y arrebatáu'l so emperiu. Fox Films Corporation, con más de quinientes sales, foi puestu embaxo alministración xudicial; una reorganización regulada pola banca apropióse de la compañía por un tiempu, pero yera nidio qu'una fusión yera la única alternativa pa que la corporación pudiere sobrevivir.

En Warner Brothers, el direutor de producción Darryl Zanuck alcontrábase nuna griesca pol dineru; el puñu duru de los Warner amenoragaren costos na presión baxando los salarios. Cuando Zanuck pidió'l so pagu dafechu, refugaron y el renunció. Díes depués anunció la criación d'una nueva compañía -Twentieth Century Pictures, n'asociación con Joseph Schenck, presidente d'United Artists. Entamó a aperar a mediaos de 1933, estrenando de cuatro a seyes películes al añu al traviés d'United Artists, Twentieth Century foi un ésitu, en parte por mor del sofitu financieru de L. B. Mayer y Nicholas Schenck, l'hermanu de Joseph y direutor de Loew's Inc.

Dos años dempués, Joseph Schenk y la xefatura de Fox Films accordaron la decisión de facer una fusión, Zanuck diba pa direutor de producción y Schenk comu xefe executivu. Los observadores d'esta combinación mur-elefante esperaben que la nueva compañía tomare'l nome de "Fox-Twentieth Century". Pero, tomando'l nome de Twentieth Century-Fox Film Corporation, la nueva compañía creyóse en 28 d'avientu de 1934.

Amás d'una cadena de sales y un estudiu de primer clas con un gran tarrén al delláu, Zanuck y Schenck teníen la impresión de que nun había muncho más de valor na compañía Fox Films. La estrella más grande del estudiu, Will Rogers, morrió nún accidente aereu, selmanes depués de la fusión. La so estrella femenina más dominante, Janet Gaybor, taba cayendo en popularidá. Les promeses masculines más importantes, James Dunn y Spencer Tracy foron despedíos pol so escesivu consumu de bebíes alcohóliques. Entaínando Zanuck contrató a xovenes actores que seríen los que sostuvieron a la compañía per años: Tyrone Power, Don Ameche, Henry Fonda, la patinadora Sonja Henie y Betty Grable. Y na nómina alcontró dos artistes coles qu'algamaría grandes ganancies, Alice Faye y una neña de siete años nomada Shirley Temple.