Xabiero Cayarga

Xabiero Cayarga (Cangues d'Onís, 1967) ye un escritor en llingua asturiana, llicenciáu en filoloxía inglesa. Anguaño da clases d'español en Dortmund (Alemaña).

En 1994 apaez la novela El boleru de Xabel (Premiu de Narraciones de l'Academia de la Llingua Asturiana), cola que se da a conocer. Ye autor de dellos llibros de cuentos, Les gatileres del cielu (1994), Güelgues sobre'l llagu (1996) y A flor de piel (2000). Tien amás dellos cuentos dispersos en revistes como Lletres Asturianes, Santa Casa, Lliteratura y Sietestrellu y la so narrativa apaez representada na Antoloxía del cuentu asturianu contemporaniu d’Ánxel Álvarez Llano (1994) y na Muestra de nuevos narradores (1997), de Ramón Lluís Bande.

Nel añu 2000 apaez la primera muestra de poesía del autor, El deliriu d'esclavu, ampliu rexistru de composiciones afitaes nos sentimientos y na pasión amorosa. Nesi mesmu añu algama'l X Premiu “Teodoro Cuesta” de Poesía cola obra Pequeña Europa, conxuntu de poemes de tradición variada nos que destaca la gran riqueza espresiva. L'autor fai poesía de dellos fechos cotidianos: una alcordanza, una llectura o un viaxe.

Nel añu 2005 algama el Premiu “Xuan María Acebal” de Poesía col poemariu Les llingües de la Hidra y nel 2006 apaez la so segunda novela, Trastes de bufarda.

Tornaría a la narrativa, cola editorial Trabe, nel añu 2011 al asoleyar El sol negru de Wewelsburg, ambientada n'Alemaña.

Xabiero collabora igualmente con revistes lliteraries como Campo de los Patos y col selmanariu Les Noticies, dientro de la sección A deslláu.