Mespilus germanica

Cadapanal

El cadapanal o ciparal (Mespilus germanica L.) ye una especie d'árbol frutal de la familia Rosaceae.

Recibe dellos nomes más como cadapanar, cagampanal, carampanal, suerval, carrampanal, carémpanu, etc. y, magar qu'anguaño ye especie d'escasa distribución n'Asturies, foi relativamente abondosu apocayá.

Descripción y ecoloxía

El cadapanal ye árbol planicaducifoliu de fueya simple; amás, carauterícense por ser simples, alternes, llanciolaes-ovales y colos bordes dentaos o enteros. La corteya esforgaxa en plaques verticales irregulares que se desprienden fácilmente. Algama los 6 m d'altor, anque pue sobrepasar los 8 m. Tien una groma baxa y amplia pertrupa, polo que crea una gran solombra. El frutu llámase cadápanu.

Ye planta procedente del centru y sur d'Europa (poro recibe l'epítetu de germanica) y Asia Menor. Cultívase dende fai unos 3.000 años na rexón del mar Caspio, anque foi unos 200 años e. C. cuando foi espardida pel Imperiu Romanu algamando un mayor territoriu del que tenía. Ye especie propia de clima atlánticu qu'espolleta nos pisos termo- a mesotempláu (de 0 a 800 m) sobre suelos preferentemente ácidos, sueltos, frescos y non llentos. Pue tamién espoxigar sobre sustratu alcalín. Nesti sen, requier un clima templáu, con branos ya iviernos seles.

Etnobotánica

El cadapanal suel inxertase sobre la espinera (Crataegus monogyna) o l'andrinal (Prunus spinosa) pa que'l tueru agarre más puxu. El so frutu, el cadápanu, ha xintase nun estáu de maduración perestremu, casi cuando tán pochos, y tienen un tastu dulce perapreciáu. Maduren pela seronda y, antiguamente, metíense ente la yerba del payar pa favorecer esti procesu. Úsense tamién pa combatir los trestornos intestinales, pudiendo facese con ellos dulces, repostería y llicores. D'otra miente, la so madera ye duro, flexible y muncho resistente al rozamientu.

Hai munchu tracamundiu d'esta especie col niésperu (Eriobotrya japonica), anque los sos frutos y fueyes son dafechu estremaos.