Elementu químicu

Un elementu químicu ye una sustancia que nun pue dixebrase n'otres más cencielles. Cada elementu químicu ta constituyíu por átomos col mesmu númberu de protones nel so nucleu. Esti númberu ye'l númberu atómicu del elementu. Por exemplu, los átomos del elementu carbonu (C) tienen 6 protones, y los del uraniu (U) tienen 92.

Hai 116 elementos químicos conocíos fasta'l momentu, de los que 93 son naturales y el restu son xeneraos artificialmente. Cada elementu represéntase por un símbolu d'una o dos lletres.

La ordenación d'estos elementos acordies coles sos propiedaes físiques y químiques dio llugar a la nomada tabla periódica. Foi ideada por un químicu rusu, Dmitri Mendeleyev, nel añu 1869. Dende aquella primer tabla que namái tenía 63 elementos hasta la d'anguaño que tien 116, espublizáronse más de setecientes. Les más d'elles caltienen el formatu clásicu, pero tamién les hai con representaciones bien curioses, como la de los elementos ordenaos según lo necesarios que seyan pa la vida.