Usuariu alderique:Limotecariu/Archivu 1

Bienveníu na mio páxina d'alderique y munches gracies pol to mensaxe

La lletra d y el so apostrofamientu

Bones Etienfr, se bienllegáu a la comunidá,

nun debieras facer usu del apóstrofu na lletra d con númberos, da llugar a enquívocos. Nún testu o desplicación matemática, por exemplu pue enguedeyar enforma les coses: «Seyan d y d' ellementos d'un subconxuntu... el productu d'1....», ye meyor d'esta miente. Tendríes de revertir los cambeos fechos nesi sen hasta agora. --Astur 23:33, 29 xineru 2008 (UTC)

Duldes

Bones Etienfr, date la bienvenida y agradecete la collaboración. Dos cosines cuando entames un alderique has de firmalu y en cuantes a lo de los xentilicios, yo llevo pensando un tiempu en facer esta propuesta pola bayura duldes que tenemos munches vegaes con pallabres que nun tán normalizaes, asina que voi proponer nel Chigre facer una llista de pallabres pa unviala llueu a l'ALLA y que nos retruquen. Un saludu. --VityUvieu 15:23, 30 xineru 2008 (UTC)

Llista de Papes

Tranquilu, en cuantes termine yo la Llista de los Bienes d'Interés cultural d'Asturies que toi preparando, pongome yo a iguar lo que quede. Un saludu! --VityUvieu 00:38, 1 febreru 2008 (UTC)

Guardar páxines

Pues non, que yo sepa, nun esiste nenguna manera de facer eso, lo que si pues ye guardalu nun documentu de word, dir faciendolu y llueu xubilo (cosa que yá tengo fecho yo delles vegaes hehe). Un saludu. --VityUvieu 21:58, 1 febreru 2008 (UTC)

Votaciones

Na política de votaciones nel primer párrafu pon: "Pa poder participar nuna votación, al tiempu d'entamar una votación l'usuariu tien que tener polo menos 100 contribuciones al proyeutu y cuntar con un mes d'antiguedá polo menos (entenderase por un mes 30 díes dende la so primer contribución)." Teníes más de 30 díes cuando votaste, pero non cuando entamó la votación.--Mikel (alderique) 16:59, 12 marzu 2008 (UTC)

San Llinu

Bones, cuando faigas una torna d'un artículu has de copiar les interwikis (los enllaces a otres wikis qu'apaecen a lo cabero del artículu), tamién has d'añedir l'interwiki de la enciclopedia dende lo copies y dexar un enllaz a la nuestra. (Pa entender meyor l'enguedeyu qu'acabo formar, entra nel artículu y velo, si tienes duldes entruga que pa eso tamos). un saludu.--VityUvieu 14:32, 8 abril 2008 (UTC)

El Papa Santu de Roma

Etienfr, ta resultándome bien interesante'l trabayu que tas faciendo colos Papas (nel fondo soi un poco flairón y préstenme bien toles coses de la Ilesia, los flaires y moxos y monxes). Vi les rempuestes que ficiste a los comentarios que punxe sobre los nomes de dellos Papas, y los cambios nel títulu del artículu habrá facelos un alministrador (yo, polo menos, nun los sé facer). Un saludu. --Zato-ino 05:55, 28 mayu 2009 (UTC)

Nomes de países y xentilicios

Veo que tas faciendo los cambeos afayadizos. Gracies pola to collaboración. --VityUvieu 18:18, 6 payares 2010 (UTC)

• Fecho!!!--VityUvieu 14:24, 17 payares 2010 (UTC)

Conciliu vs Conceyu

Estemáu Etienfr, veo que cambiaste la palabra Conciliu pola de Conceyu en dellos sitios de la wiki. Cierto ye que nun apaez nel diccionariu de l'Academia de la Llingua Asturiana, pero pienso qu'a los asturfalantes ayenos al citáu preséu llingüísticu resultará-yos más esclarecedora la palabra Conciliu, a la que de xuro-y darán una connotación relixosa, que la palabra Conceyu que na llingua normalizada significa tántes coses. ¿Cómo dirán los astur falantes que la postura d'un determináu personaxe en materia relixosa ye preconciliar, tal y como lo decíen ayenos al DALLA? Arriendes d'eso les llingües de la nuestra redolada (incluida la vasca) empleen una palabra culta derivada de Concilium, polo que pienso qu'alloñanos d'esa terminoloxía ye separtanos más de la ciudadanía. Por ello creo que nun ye aconseyable cambiu talu. ¿Qué opines?. Un saludu.--Zato-ino 22:30, 21 payares 2010 (UTC)

Estimáu Etienfr, en primer llugar quiero señalar una cosa cola que toi d'acuerdu dientro de la to argumentación: son válidos los exemplos que pones de convivencia de palabres patrimoniales y cultes, polo que nun voi tornar nuevamente sobre ello, aunque me sosprende que me lo tengas qu'esplicar en castellano.

Vamos a les coses coles que nun concuerdo. Cuando falo d'asturfalantes ayenos al DALLA nun me toi refiriendo a los que dende'l campu del asturianismu cultural critiquen el llabor de l'Academia de la Llingua sinon de los miles d'asturfalantes que tienen un buen conocimientu d'esta fala y que la empleen a diario, pero que nun tienen un interés nin un compromisu especial pa con ella. Esta situación puede prestanos poco, muncho o nada, pero ye la que ye. Por suerte ye asina porque si los únicos asturfalantes fueran los que muestren compromisu cola llingua, ésta taba muerta, yá que somos bien pocos en comparación colos miles d'asturfalantes a los que nun esmolez lo más mínimo'l futuru de la llingua.

No tocante a les faltes d'ortografía qu'apaecen a diario en tolos medios, incluida esta Wikipedia, cuido que son munchos los factores que la pueden esplicar. Unu d'ellos ye que la gran mayoría de los qu'escribimos n'asturiano somos autodidactas, pero tamién pue ser que la normativa académica resulte abegosa.

De la posibilidá de que yo seya partidariu del inventu de lo que tu llames pallabros tipu lloñevisión, nin siquiera voi entrar.

El fechu de que creamos que na Wiki tenga que tar la palabra conciliu nun la convierte nuna enciclopedia escrita no que l'asturianismu vien llamando amestao. Si compruebes, más xente empleó la palabra nesta mesma Wiki, nun fui yo l'únicu qu'escribí sobre temas relixosos y la consideré propia del nuestru sistema llingüísticu.

Por finalizar, sospréndeme que digas que la palabra conciliu nun existe. Cosa bien cierta ye que nun ta recoyida nel Diccionariu de l'Academia, pero d'ehí a decir que nun existe …

Un saludu. --Zato-ino 08:33, 22 payares 2010 (UTC)

Bueno Etienfr, bien sé que l'Academia nun acoyó nel DALLA la palabra conciliu. Ésa nun ye la discusión. La discusión pasaría por saber si'l Diccionariu ye un llabor acabáu o non. Tu mesmu vienes a reconocer que non cuando dices: que tal pallabra "culta" nun esiste n'asturianu, yá que'l propiu DALLA nun la recueye (pel momentu, quiciabes nuna segunda edición sí, pero hasta entós...). Efectivamente, pero si llegara a ocurrir qué querría decir, ¿que la palabra conciliu existe anguaño o que la inventaron los académicos?. Prueba de la fuerza que tien conciliu ente los asturfalantes que trabayaron y trabayen nesta Wiki ye que munchos d'ellos la utilizaron y tovía se puen rastrexar les sos güelgues na enciclopedia. Y ello ye debido a que la xente vien a estremar el conceyu tradicional como reunión de persones pa decidir sobre delles cuestiones del conciliu que ye un conceyu nel que se traten temas relixosos. Esa ye la discusión. Nun creo que por emplear la palabra conciliu temos poniendo en grave peligru a la nuestra llingua. Pa nada.

Per otru llau yo nun m'escudo nel autodidactismu pa xustificar los mios errores, sinon qu'esplico que tantu error en tanta xente tien que tener un aniciu y especulo con que pueda ser l'autodidactismu, o lo abegoso que son delles normes de l'Academia (el tema de los apóstrofos nun me negarás que tienen el so aquel y, menos mal, que desactivaron dellos de los que nun entamu propusieron). Nel mio casu los errores vienen de la falta de procuru cola que n'ocasiones escribo, cosa que nun digo con argullu.

Yo tamién faigo de tripes corazón cuando escribo artículos na Wikipedia (non nestes llinies más informales) a la hora d'aceptar delles coses propuestes pola institución académica. Pienso especialmente nos plurales masculinos n'-es. Nos más de cien númberos yá asoleyaos del Lletres Asturianes nun atopé nin un solu artículu qu’avale esta propuesta. Nun hai papes, nin mapes, nin comunistes, nin nada asemeyao. Ye dalgo que vien acetándose ensin mayor discutiniu (incluso pola riestra d'escritores más críticos cola Academia), pero que yo nun topé nin caleyando per Asturies nin en ningún trabayu científicu, pero que trato de respetar cuando escribo artículos na Wiki, por más que, siempre que puedo, trato d'evitar buscando soluciones que me presten a mi y que seyan gramatical y semáticamente correctes (otra solución que tomo n'ocasiones ye nun escribir un artículu qu'implique necesariamente una cosa cola que nun puedo comulgar… que lu escriba otru).

Por razones d'edá conozo buena parte de la riestra de bibliografía que propones y tengo na mio biblioteca dellos de los trabayos citaos. Una de les ayalgues d'esa biblioteca ye la coleción completa del boletín Lletres Asturianes onde hai munches posibilidaes d'atopar la palabra sobre la que discutimos en delles de les miles de páxines yá escrites. Pero nun se trata de facer esti llabor, trátase de discutir de manera razonable y dende'l convencimientu de que ningunu de los dos somos enemigos de la llingua, sinon persones con planteamientos estremaos. Tuve la suerte de criame nun ambiente asturfalante y de nacer nun tiempu nel que la llingua tovía taba presente nes calles de les barriaes urbanes, conocí xente de munches partes d'Asturies y d'estremaos llabores profesionales. Arriendes d'eso también tuve la oportunidá económica de tener una buena biblioteca y aprender más coses. Sigo n’ello… Un saludu. --Zato-ino 13:06, 22 payares 2010 (UTC)

Bueno Etienfr, voi puntualizar delles coses. Insisto en que si una palabra nun la recueye'l diccionariu nun quier decir que nun exista, quier decir que l'academia correspondiente nun la reconoz. Palabres castellanes como carajo o coño nun taben recoyíes nel Diccionario de la RAE hasta que Camilo José Cela trabayó por ello, pero que nun tuvieran nesi Diccionario nun quier decir, y anecio nello, que nun existieran (vaya si existíen y si yeren castellanes). Pero voi puntualizar un par de coses con relación a l'acusación de diglosia:

Primero: A la vista de la definición qu'aporta'l DALLA (Coesistencia de dos llingües nun mesmu país, nuna mesma rexón, que nun tienen la mesma valoración social, el mesmu usu) nun veo que la mio propuesta seya diglósica. Lo que yo planteo ye que la palabra conciliu ye asturiana, lo mesmo que conceyu o xunta (la llingua asturiana dispón d'una buena riestra de palabres qu'indiquen reunión o aconceyamientu de persones con estremaos fines: carmenexu, fila, andecha, esfoyaza, veloriu, polavila, magüestu, …) y aporta matices a la más xenérica conceyu. Pero yo planteo utilizar una o otra palabra non n'estremaos contestos sociales sinon ante estremaos actos. Considero a les dos igualmente afayadices pa un testu cultu. Evidentemente la llingua asturiana tien cultismos y vulgarismos. Yo o tu, nuna reunión de chigre con amigos o nel entornu familiar, podríamos utilizar la palabra beateríu pa referinos a un conceyu ecuménicu o conciliu, pero sería impensable utilizala nesta Wiki y ello nun implicaría diglosia de ningún tipu, simplemente utilizamos los recursos que nos ufierta la llingüa. Y siguiendo cola relixón tenemos la palabra cónclave que tamién ye un conceyu de relixosos, pero aporta unos matices que nun tien la palabra conciliu nin conceyu ecuménicu. Qu'utilicemos la palabra conceyu pa referinos a una reunión de vecinos, de socios o de políticos y la de conciliu o cónclave pa falar d'una reunión de relixosos nun ye diglosia.

Segundo: Tengo pa mi que l'únicu asomu de diglosia qu'apaeció nesta discusión fue la utilización que ficiste de la fala castellana pa defender la to postura na to primer intervención. Podría dar la sensación de que nun pensabes que la nuestra llingua tuviera recursos abondos como pa poder dar una esplicación afayadiza de lo que pretendíes.

Un saludu. --Zato-ino 08:02, 23 payares 2010 (UTC)

Bueno Etienfr, siento que quieras dar por finalizáu esti pequeñu debate qu'entamamos estos días. Termines convidándome/retándome a que revierta les tos correciones y avisándome de que tu volverás a revertiles nuevamente y asina entrar nuna espiral ensin mayor sentíu. Nun toi andechando na wikipedia con vocación censora y prueba d'ello ye que podría correxir ensin mayor complicación los cambios que ficiste y puntu, pero preferí entamar una conversación virtual contigo y intercambiar puntos de vista (quiciás ye la educación franquista que recibí, qu'afaló en mi la creencia de que yera posible discrepar y sacar coses provechoses de la discrepancia). Ello ye qu'atopé'l cambiu que ficiste de conciliu por conceyu na entrada relativa a los Hermanos de les Escueles Cristianes un artículu nel que trabayé hai yá cuatro años y mediu (fue unu de los primeros que cree) y fícelo con bien de procuru por tratase de xente que trató d'educar a una xeneración de rapazos nun institutu d'un barriu xixonés, ente los que lóxicamente m'encuentro. Siempre esperé que los artículos qu'entamé fueran convenientemente ampliaos por otros collaboradores de la wiki, casi nunca fue asina, lo más que se conseguía yera que daquién ficiera delles correciones ortográfiques o cambiar palabres o espresiones correctamente escrites por otres que casaben meyor col so conceptu normalizador.

Sinceramente pensé que te prestaría entrar a debatir sobre la, polo menos aparente, contradición que supón aceptar la palabra cónclave y non conciliu, disfrutar cola variedá de posibilidaes que nos ufierta la llingua asturiana pa referise a estremaos tipos d'aconceyamientos (pa trabayar, pa divertise, pa tomar decisiones, p'alimentase, ...) o ver esa otra posibilidá más familiar o vulgar de llamar beateríu a un aconceyamientu de relixosos. Veo que nun ye asina y siéntolo. Un saludu. --Zato-ino 07:16, 24 payares 2010 (UTC)