Diferencies ente revisiones de «Shorinji Kempo»

De Wikipedia
Contenido eliminado Contenido añadido
Sin resumen de edición
Llinia 144: Llinia 144:
== Del ''manji'' (卍: esvástica a dereches) al ''so-en'' (doble círculu) ==
== Del ''manji'' (卍: esvástica a dereches) al ''so-en'' (doble círculu) ==


El ''manji'' usárase como marca del Shorinji Kempo del mesmu mou que s'usó nel budismu per munchos sieglos. Les dos tribes de ''manji'' signifiquen respeutivamente amor (el que xira a dereches) y poder (el que xira a esquierdes), simbolizando asina la filosofía d'unidá del Shorinji Kempo.
El ''manji'' usárase como marca del Shorinji Kempo del mesmu mou que s'usó nel budismu per munchos sieglos. Les dos tribes de ''manji'' signifiquen respeutivamente amor (l' ''omote manji'', que xira a dereches) y poder (l' ''ura manji'', que xira a esquierdes), simbolizando asina la filosofía d'unidá del Shorinji Kempo.


Ensin embargu'l crecimientu de la Organización Mundial de Shorinji Kempo (WSKO) traxo un bon pilancu pal so usu, pol significáu venceyáu a la esvástica nel occidente contemporaniu. Nesta considerancia, la WSKO vieno usando l'ideograma 拳 (''ken'') nos emblemes, o en dellos casos el ''nagare-manji'', que ye un ''manji'' arrondáu de forma que solo llexanamente asemeya una esvástica.
Ensin embargu'l crecimientu de la Organización Mundial de Shorinji Kempo (WSKO) traxo un bon pilancu pal so usu, pol significáu venceyáu a la esvástica nel occidente contemporaniu. Nesta considerancia, la WSKO vieno usando l'ideograma 拳 (''ken'') nos emblemes, o en dellos casos el ''nagare-manji'', que ye un ''manji'' arrondáu de forma que solo llexanamente asemeya una esvástica.

Revisión a fecha de 05:53 30 set 2010

El Shorinji Kempo (少林寺拳法) foi fundáu por Doshin So en Xapón en 1947, como un gyo (行: disciplina d'ameyoramientu recíprocu) o sistema pa entrenar y meyorar a les persones.

Los sos métodos d'entrenamientu básense na filosofía de que "l'espíritu y el cuerpu son lo mesmo" (shin shin ichinyo) y de que poro "l'entrenamientu mental y físicu nun puen dixebrase" (ken zen ichinyo). D'esta miente, el Shorinji Kempo carauterízase por apurrir los tres beneficios de "entrenamientu pa la defensa personal", "entrenamientu de la mente" y "promoción de la salú".

Amás d'un verdaderu budo (武道), el Shorinji Kempo tamién ye un sistema d'educación enveredáu a la "formación de la propia personalidá" (jiko kakuritsu) y a la "promoción de la felicidá mutua" (jita kyoraku) qu'empleguen pal so estudiu programes téunicos bien entamaos y un llibru de testu (Shorinji Kempo Tokuhon).

Les persones que prautiquen Shorinji Kempo llámense kenshi. Los kenshi nun saluden a la xaponesa, sinon con "gassho rei", una forma de saludu d'orixen budista. Gassho rei (que tamién ye una guardia: "gassho gamae") faise con dambes palmes xuntes y llevantaes delantre la cara.

Orgánicamente, el Grupu Shorinji Kempo estrémase nes siguientes cinco estayes corporatives, que tienen por embargu una rellación perciñida:

  • La entidá relixosa Kongo Zen Sohonzan Shorinji, que rixe'l Kongo Zen y los doin onde se prautica en Xapón.
  • La Fundación de la Federación de Shorinji Kempo, que vien ser el nome que recibe l'antigua Federación Xaponesa de Shorinji Kempo desque camudara a fundación.
  • La entidá educativa nomada Colexu Zenrin Gakuen, establecida como una academia que sigue los principios del Shorinji Kempo. El principal de los centros que tien alcuéntrase nel Honbu. Una vez al mes faen en cada rexón un seminariu pa los que nun pueden atender a les clases diaries del Hombu.
  • La WSKO, Organización Mundial de Shorinji Kempo. Pertenecen a ella les seiciones y federaciones de fuera del Xapón.
  • La entidá pa la protección de la propiedá intelectual (Shorinji Kempo Unity).

Hai que se decatar de que la filosofía básica del Shorinji Kempo anicia nel antiguu budismu y les sos téuniques básiques n'antigües formes o téuniques marciales chines que conociera y prauticara'l fundador nos sos años mozos, xunto a otres xaponeses. Sicasí les artes marciales chines vives, como'l Shaolin Kung Fu (少林拳) o'l Tai Chi Chuan, nun tienen que ver col Shorinji Kempo, que ye un arte xaponesa dafechu, un Gendai Budo.

Propósitos

Al fundar el Shorinji Kempo, Doshin So quixo facer non solo una organización qu'incorporara l'entrenamientu mental y el físicu, sinon que tamién quixo educar al pueblu xaponés que quedara desmoralizao dafechu pola Segunda Guerra Mundial. El so oxetivu yera aselar a los que perdieren l'aldu y reconstruyir Xapón pal futuru. De primeres tentó d'enseñar una filosofía basada nel budismu orixinal y el zen, pero naide lu siguió. Entós pensó en siguir l'exemplu de Bodhidharma, al que la tradición atribuyía la fundación del zen como entrenamientu mental y del ekkin-gyo pal entrenamientu físicu. Dambos serán col tiempu los métodos de'entrenamientu principales del Shorinji Kempo.

Amás la parte filosófica del Shorinji Kempo tien los oxetivos d'auto-meyora pa la persona y paz pal mundu mediante la creación d'un coraxe que nunca vence, personalidá armonioso y compasión polos demás. P'aidar a crear una sociedá pacífica ya ideal, el Shorinji Kempo vien aportunando en que caún sía un verdaderu cabezaleru na so área respeutiva.

L'orixe del nome "Shorinji Kempo"

El nome "Shorinji" ye una llectura lliteral de la pallabra china "Templu Shaolin", referida al Monesteriu de Shaolin nel distritu Song Shan (Suuzan Shorinji en xaponés) na provincia china de Henan. Doshin So heredó'l títulu de 21er maestru del sistema Giwamon Ken, que se crei qu'usaren los monxos budistes pa defendese durante'l llevantamientu de la escuela Giwadan o Rebelión Boxer de 1900-1901. Cuando fundó'l so propiu sistema, quixo facer un homenaxe nel nome a esti fechu de la so biografía y a los sos maestros.

Asina mesmo Doshin So quedara enforma impresionáu al ver les pintures na paré de la capiya Byaku-eden nel Templu Shaolin. L'estilu de los monxos budistes prauticando artes marciales abultába-y frescu y vital de manera. Atalantó qu'ehí taba l'orixe de les téuniques marciales qu'había per China.

Nos años 50 de la era Showa (alredor de 1975) llevantóse un monumentu a Doshin So representando la rellación del Templu Shaolin y el Grupu Shorinji Kempo. La película china titulada "少林寺: Templu Shaolin" protagonizada pola estrella d'acción Jet Li filmóse nel mesmu templu col sofitu de miembros del Grupu Shorinji Kempo.

Al paecer la pallabra kempo (拳法) ye raramente utilizada en China. La pronunciación d'estos dos calteres en chinu mandarín ye "quan2 fa3" (les figures 2 y 3 indiquen cuál de los 4 tonos correspuende a estos estos dos calteres). Pero dicía Doshin So que quixo poner ho (法: dharma, verdá) dempués de ken (拳: puñu) porque inclusive'l poder de les téuniques precisa siguir el dharma y la verdá. El nome de Shorinji Kempo fórmase con Templu Shaolin, puñu (referíu a poder y téuniques) y dharma/verdá.

Hestoria

Doshin So (nacíu en 1911) echó los sos años más nuevos pal norte de China con cuenta de facer daqué polos intereses de la so patria. Xuntóse a l'Axencia d'Intelixencia del Exércitu Xaponés pa recoyer información militar mientres la guerra. Tando allí conoció al maestru Chen Liang, que yera un antiguu shifu de Kita Shorin Byakuren Ken. Mientres aprendía les sos téuniques, Doshin So cumplía la so misión viaxando per Manchuria, y tamién siguía aprendiendo sobre les artes marciales chines que quedaben. Entós el maestru Wen Taizong llevólu a visitar el Templu Shaolin na provincia de Henan, y allí nomólu 21er maestru del Giwamon Ken (Yi He Men Quan).

El 9 d'agostu de 1945 l'Exércitu soviéticu dio en Manchuria y él viose obligáu a vivir un añu so la ocupación de los soviéticos. Acabó asina por reconocer y pescanciar la "naturaleza del ser humanu". Según el so llibru, esto ye perimportante darréu que la política, la llei y la mesma vida dependen toos ellos de los seres humanos.

Dempués de volver de China, pescudó que diba establecer una gran escuela pa la xente mozo. Daquella taba nuna pequeña ciudá llamada Tadotsu, na isla xaponesa de Shikoku, enseñando filosofía budista. Pero nun foi pa convencer a la xente al nun apurrir daqué nuevo o distinto. So fundó'l Shorinji Kempo pa lleva-yos el conceutu de ken zen ichinyo siguiendo a Bodhidharma y usando les téuniques qu'aprendiera en China. Taba seguru d'apurrir a la xente mozo coraxe moral y físicu y una oportunidá d'aprender la filosofía zen pa que llegaren a ser los líderes de la siguiente xeneración.

Asina esparció'l Shorinji Kempo per Xapón per aciu de los sos alumnos, y más tarde per tol mundu. Dempués de la so muerte en 1980, esti llabor acostinólu hasta güei la so fía Yuuki So. Llueu de la so muerte, Doshin So foi llamáu "Kaiso", o fundador y gran maestru.

Anguaño'l Shorinji Kempo prautícase en 33 países de tol mundu. Hay unes 2.900 seiciones que prautiquen en doin (organización del Kongo Zen) o dojo (federación xaponesa y WSKO). Gracies a Yuuki So, la presidenta actual del grupu, ésti ye un arte bien popular ente les muyeres y munches kenshi femenines tan xuniéndose a la organización. En Xapón el Shorinji Kempo ye prauticáu en doin (dojo con un altar pequeñu) que namái furrulen naquel país y tan abiertos pal públicu en xeneral, pero hai tamién dojo asitiaos en ximnasios privaos o públicos, sales de conferencies, campos de deportes, parques, etc. Como nel restu'l mundu, llamen a estos clubes seiciones o shibu.


Finxos
1947 establecióse la entidá relixosa
1948 establecióse la "Sociedá Nippon Hokuha Shorinji Kempo"
1951 principió'l "Kongo zen Sohonzan Shorinji"
1956 establecióse la entidá educativa
1957 establecióse la "Federación de Shorinji Kempo de Tou Xapón"
1963 establecióse la "Federación de Shorinji Kempo de Xapón" como entidá corporativa
1972 establecióse la "Organización Mundial de Shorinji Kempo" (WSKO)
1980 morrió Doshin So
1992 establecióse la "Fundación de la Federación de Shorinji Kempo" como entidá de fundación
1997 celebróse'l 50.u aniversariu
2000 organizóse'l Grupu Shorinji Kempo
2002 el Busen (Academia de Budo Shorinji Kempo) abrió l'institutu
2003 rebautizóse'l Busen pa ser Colexu Zenrin Gakuen
2003 diseñóse la nueva marca so-en y el nuevu logo del Shorinji Kempo
2005 migración del manji al so-en
2007 60.u aniversariu
2008 establecióse l'Institutu Junior de Tou Xapón de la Federación de Shorinji Kempo
2009 el Sekai Taikai (axuntanza mundial) falló n'Indonesia pero celebróse como "taikai" abiertu.

Filosofía

El Shorinji Kempo nun ye un budo al usu o una forma de deporte estremu. Ta dicho que ye un gyo pa los sos prauticantes. Nesta considerancia, dizse que'l Shorinji Kempo ye una enseñanza empobinada a crear líderes que contribuyan a la sociedá, formando'l calter de los seres humanos con basa nun espíritu y cuerpu sanos.

L'espíritu y la carne nun son entes dixebraos; por exemplu cuando unu tien malura na mente nun pue tener sanu'l cuerpu. Prauticando la téunica del Shorinji Kempo y aprendiendo la so filosofía, fórmase al empar un cuerpu firme y un espíritu que nunca vence.

Sistema d'entrenamientu

Entrenamientu de la mente (3 métodos): Kiryoku/kisei/kiai

Entrenamientu del cuerpu
L'entrenamientu físicu o mesmamente marcial consta de tres categoríes que son goho (téuniques dures, como puñaes y pataes), juho (téuniques blandies, como controles o proyeiciones) y seiho (téuniques de correición corporal, como axustamientos del llombu). D'esta miente:
Goho (téuniques dures, 8 métodos y 3 tradiciones): Tsuki/uchi/kiri/keri/kari/fumi/taigi/bogi; y Dokko/nyoi/kongo (tradiciones de manexu d'armes qu'anguañu tan fuera de programa)
Juho (téuniques blandies, 10 métodos): Gyaku/nage/katame/shime/hogi/ouatsugi/nukite ho/nukimi ho/shuho/bakuho
Seiho(téuniques de correición corporal): Seikei/seimyaku/seikotsu/kappo

Conocencia: In-yo/kyojitu/tempo/chii/chijutsu/boryaku


Kamae (guardies)
Byakuren 8 guardies: ichiji gamae, taiki gamae, gyaku taki gamae, aiki gamae, fukko gamae, midare gamae, byakuren chudan gamae, llamada davezu kaisoku chudan gamae, hasso gamae
Giwa 9 guardies: gassho gamae, kesshu gamae, chudan gamae, gedan gamae, gyaku gedan gamae, manji gamae, yoko muso gamae, tate muso gamae, nio gamae

Fujin ho (posicionamientos del cuerpu): seitai gamae (dambos encaraos con Byakuren chudan gamae), tai gamae (tando ún allugáu cola pierna esquierda delantre, l'otru cueye la guardia de pierna esquierda delantre), hiraki gamae (tando ún allugáu cola pierna esquierda delantre, l'otru cueye la guardia de pierna derecha delantre)

Umpo ho (pasos)
Tai sabaki (formes de mover el cuerpu)
Ukemi (cayíes, rodamientos): mae ukemi, ushiro ukemi, oten yori okiagari, dai sharin, tombo gaeri

Embu

L' embu ye una combinación de hokei (patrones organizaos de téuniques goho y juho) que tien 6 seiciones. L' embu faise na cancha, nel ximnasiu, nel Taikai o n'otres ocasiones ceremonioses. Por exemplu execútase dacuando llevando un vistíu prietu (hoi) na ceremonia d'entamu del taikai o axuntanza anual.

Nestos patrones hokei un kenshi fai d'atacante (kosha) y otru de defensor (shusha), y llueu cambien los roles y pasen a otra téunica. Dempués de cada téunica fixa, el kenshi fai ren-han-ko (series d'ofienses que siguen a la defensa), que ye un ataque de contra de forma llibre que sigue hasta que l'atacante orixinal bloquea con ésitu y contraataca. Les téuniques juho, como les proyeiciones, van siguíes de katame (téuniques d'inmovilización o arrestu) o kime (téuniques d'acabación con variaos golpes de mano o pataes a puntos nerviosos).

Los embu entamen con gassho rei y faense normalmente como kumi embu (fechos por kenshis en pareya), pero tamién como tandoku embu (fechos por un solu kenshi) y como dantai embu (fechos por 6 o 8 kenshis en grupu). L'embu de Shorinji Kempo ye famosu por cuenta de la so velocidá, fluidez y l'armonía de brenga y guapura.

Nun embukai o taikai d'embus (tornéu), l'embu valórenlu 5 (dacuando 3 n'escoyeta preliminar) xueces que disponen de 60 puntos caún pa les 6 seiciones y 40 puntos caún pa otres considerancies. Un total posible de 300 puntos ye'l máximu, esaniciando les puntuaciones cimeres y les más baxes cuándo xulguen 5 xueces. El kumi embu y el dantai embu execútense dientro d'un plazu máximu d'ente ún y mediu y dos minutos.

Antaño na hestoria del Shorinji Kempo nun había dengún reglamentu pa facer los embu. Nesta considerancia, l'embu yera bien potente y práuticu darréu que lu facíen de xemes en cuando, ad hoc y a querer.

La pareya de más sonadía na hestoria del embu foron Masuomi Nakano y Toshio Misaki, que'l so embu rúxese qu'ablucara a Doshin So.

Unyoho (randori o combate)

Nel Shorinji Kempo, endenantes al unyoho llamábenlu randori, y yera como una competición de llucha. Tres munchos accidentes nun randori ensin proteición de cabeza, la organización pescudó y ameyoró proteutores qu'incluyíen proteición de cabeza, cuerpu y coquiya. Adoptóse tamién un sistema de dar a cada kenshi una función d'ofiensa o defensa pa la so seguranza.

La valoración faise non yá por puntos d'ataque sinon tamién dende'l puntu de vista de les téuniques de defensa y los contraataques. Tamién, pa ser consideraes al valorar l'unyoho, son perimportantes les maneres de los kenshi.

Graos marciales (bukai) y graos filosóficos (hokai)

A partir del 1er dan (cintu negru de primer grau) hai dos graduaciones pa cualificar los pasos de la formación física y filosófica.

Exemplos de dan y hokai correspondiente:

1er dan ('shodan) -> Junkenshi
2u dan (nidan) -> Shokenshi
3er dan ('sandan) -> Chukenshi
4u dan (yondan) -> Seikenshi
5u dan (godan) -> Daikenshi

Dempués d'algamar el 1er, 2u y 3er dan (graos bukai) y facer unos cursinos preceutivos, los kenshi saquen automáticamente'l Junkenshi, Shokenshi y Chukenshi respeutivamente (graos hokai).

De 1er a 3er dan los esames faense nel sen de cada seición local o federación nacional. Pero pa los graos 4u dan y p'arriba hai que facer esames especiales entamaos por WSKO. Xeneralmente un kenshi con 4u dan (yondan) y p'arriba ye un profesor pero a los kenshi con 5u dan (godan) y p'arriba llámenlos oficialmente sensei. Amás el kenshi qu'algama'l 4u dan tamién algama automáticamente'l Seikenshi.

Oficina Central del Shorinji Kempo (honbu)

Les oficines centrales tan na ciudá de Tadotsu, prefeutura de Kagawa (na isla de Shikoku), en Xapón.

Edificios:

Hondo (dojo/sala principal)
Kodo (sala de conferencies, tres de la que tan soterraos los güesos y cenices de Doshin So)
Rensei dojo (antiguu primer dojo)
Shokudo (comedor)
Daiganto (torre conmemorativa)
Zenrin Gakuen (colexu)

Del manji (卍: esvástica a dereches) al so-en (doble círculu)

El manji usárase como marca del Shorinji Kempo del mesmu mou que s'usó nel budismu per munchos sieglos. Les dos tribes de manji signifiquen respeutivamente amor (l' omote manji, que xira a dereches) y poder (l' ura manji, que xira a esquierdes), simbolizando asina la filosofía d'unidá del Shorinji Kempo.

Ensin embargu'l crecimientu de la Organización Mundial de Shorinji Kempo (WSKO) traxo un bon pilancu pal so usu, pol significáu venceyáu a la esvástica nel occidente contemporaniu. Nesta considerancia, la WSKO vieno usando l'ideograma 拳 (ken) nos emblemes, o en dellos casos el nagare-manji, que ye un manji arrondáu de forma que solo llexanamente asemeya una esvástica.

Nel 2005, el Grupu Shorinji Kempo emplegó la nueva marca como símbolu nuevu de xunión de les organizaciones de Shorinji Kempo de tol mundu.

La nueva marca llámenla so-en (doble círculu) y vien siendo la forma postrera d'un par de manji.

La marca so-en ta dirixida y los sos derechos acutaos por Shorinji Kempo Unity. Esta marca hai que la poner como emblema nos dogi (ropa del Shorinji Kempo, chaquetes y pantalones), nos obi (cintos) y nos hoi (vistíu ceremoniosu negru).