Homero

Bustu imaxinariu d'Homero, copia romana d'un orixinal griegu del sieglu III edC.

Homero ye'l nome atribuyíu al autor de les dos grandes epopeyes de la Grecia Antigua: La Ilíada y La Odisea. Nun se conoz gran cosa d'esti poeta, nin siquier si esistiera.

Una de les teoríes relatives a la so esistencia diz qu'Homero ye'l nomatu de los recitadores de la tradición épica oral. Sicasí, na Grecia Antigua consideraben ciertes les hestories desenvueltes na Ilíada y na Odisea.

Los últimos trabayos filolóxicos y hestóricos sobre La Ilíada afiten la fecha de la so creación nel sieglu VIII. L'estudiu de les menciones xeográfiques na Ilíada espeyen que l'autor conoció detalladamente la costa turca d'anguaño y, en concretu, la Samotracia y el ríu Caistro. Por embargu, les referencies a la península griega son escases y ambigües.

Enllaces esternos

• Homero (n'español)
• Obres d'Homero pa descargar n'idioma orixinal
• Escoyeta d'enllaces sobro Homero (inglés)

• Wikimedia Commons tien conteníu multimedia tocante a Homero.