Roi-Namur

Allugamientu Atolón Kwajalein

Coordenaes 9°23′46″N 167°28′33″E

Roi-Namur /ˌrɔɪ-nəˈmʊər/ ye una islla de la parte norte del atolón Kwajalein nes Islles Marshall. Anguaño ye una pieza importante del Sitiu de Prebes de Defensa de Misiles Balísticos Ronald Reagan (n’inglés Ronald Reagan Ballistic Missile Defense Test Site -más conocíu como RTS Reagan Test Site-) qu’agospia dellos sistemes de radar emplegaos pa rastrar y carauterizar vehículos de reentrada de misiles y los sos dispositivos de penetración.

Índiz

1. Xeografía

2. Hestoria

3. Anguaño

Xeografía

L’atolón de Kwajalein ye’l corazón de les islles Marshall. Atópase a unos 3900 km de Ḥawai. L’atolón consta de 97 islles y cubre un área de 6,33 km cuadraos. Enzarra una de les llagunes más grandes del mundu con un área de 839 kilómetros cuadraos. Roi-Namur ye la segunda islla más grande y ta allugada nel estremu norte del atolón de Kwajalein. Consiste en dos cuerpos d’islla más grandes qu’inicialmente taben coneutaos por una estrecha faza de tierra. Demientres la ocupación norteamericana, esta zona rellenóse n’avientu de 1944 xuniéndoles definitivamente. Agora les dos islles amestaes llámense Roi-Namur, con un área aproximáu de 2,6 km². En Roi (en marshallés: Ruot, [rʷuɔ͡ʌtˠ]), al oeste, atópense les “Playes Verdes) y l’Aeropuertu Internacional Freefligt mientres en Namur (en marshallés Nim̧ur, [nʲi͡ɯmˠɯ͡ur)]), al este, tán les “Playes Coloraes”. Amás del aeropuertu, hai una conexón en barcu dende la costa sur, dende Namur hasta Enubirr. P’hacia’l sudeste, l’atolón continúa coles islles Ennugarret y Enumennet, y p’hacia’l sudeste, namás depués d’unos 3 km con Ennuebing.

Hestoria

El Tratáu de Tordesillas de 1494 cedió la propiedá de tola Micronesia a España, siendo en 1525 Alonso de Salazar el primer européu en divisar l’atolón Bokak perteneciente a les anguaño conocíes como islles Marshall. Sicasí, foi en 1788 cuando recibieron la visita del inglés John Marshall y tomaron el so nome. Alemaña anexonó les islles Marshall en 1885 pero nun allugó funcionarios del gobiernu dica 1906, delegando l’alministración del territoriu a un grupu de poderoses compañíes comerciales alemanes. Baxo’l Tratáu de Versalles, Xapón féxose cargu de les Marshall depués de la Primera Guerra Mundial colonizándoles estensamente, y desendolcando y fortificando grandes bases en munches de les islles. Roi-Namur foi l’oxetivu de la 4ª División de Marines de los EE.UU na Batalla de Kwajalein a principios de febreru de 1944. Depués de la conquista norteamericana, la Marina de los EE.UU rellenó la estrecha faza esistente ente les dos islles dando como resultáu la so forma actual. Por mor del allugamientu de Roi-Namur, foi llugar esbilláu pola Axencia de Proyeutos d’Investigación Avanzada de Defensa (nes sigles n’inglés DARPA) pa una serie d’esperimentos de radar como parte de los proyeutu Defender y PRESS. Estos esperimentos trabayaron col envís d’ameyorar la precisión del equipu de radar pa qu’un misil enemigu pudiera ser reconocíu al reingresar n’atmósfera. En 1985, Roi-Namur, foi incluyíu como Monumentu Históricu Nacional nel Rexistru Nacional de Llugares Hestóricos.

Anguaño

N’actualidá, alredor de 120 emplegaos norteamericanos y marshalleses del RTS viven en Roi-Namur. Na parte de Roi tán los apartamentos y les instalaciones recreatives con un campu de golf de 9 fuexos, una piscina, club de merguyu, cine, xuegos de pelota y l’aeropuertu internacional Freefligt. Ésti ye un aeródromu pequeñu con una única pista que s’usa principalmente pal tresporte de pasaxeros. Hai trabayadores diurnos que van en ferry dende la islla d’Enniburr. La parte de Namur ye’l llar de les estaciones de siguimientu de radar ALCOR, ALTAIR, MMW y TRADEX. Hai una pequeña instalación de llanzamientu en Roi-Namur. Los cohetes llanzaos equí son davezu cohetes sonda (lleven instrumentos pa estudiar l’atmósfera o realizar observaciones astronómiques) qu’ascienden más allá de l’atmósfera pero tienen poco algame. Hai escatafinos esboronaos de fortines xaponeses alredor de Roi-Namur.