Unidá

Unidá na manifestación del día de les lletres de 2007

Unidá (o Unidá Andecha Astur - Izquierda Asturiana - Los Verdes/Grupu Verde) ye una coalición elleitoral de calter nacionalista asturianu, d'esquierda y ecoloxista pa les elleiciones autonómiques y municipales de mayu de 2007.

La coalición constitúise definitvamente n'abril de 2007, tres selmanes de negociaciones ente los partíos Izquierda Asturiana y Andecha Astur, referentes del nacionalismu n'Asturies, y cola suma d'un garrapiellu de militantes verdes, descontentos col pautu del partíu Los Verdes d'Asturies con Izquierda Unida, xunto a miembros de plataformes vecinales, a títulu individual.

Nel mesmu mes presenten oficialmente'l so candidatu a la Xunta Xeneral, el reconocíu escritor y mélicu psiquiatra Ignaciu Llope. Asinamesmo, marquen les llinies xenerales del so alcuerdu programáticu, qu'incluyen la defensa de la llingua, cultura ya identidá asturiana; la llucha contra la crisis económico y llaboral que carez Asturies, asina como la corrupción a dellos niveles y los atentaos ecolóxicos que creyen qu'entama'l gobiernu actual; y, en xeneral, la implantación d'un nuevu modelu de desendolcu territorial, a partir d'un Estatutu d'Autonomía nuevu que suponga una ampliación curiosa en comparanza col actual, y que consideren imprescindible.

Magar que l'alcuerdu formalízase como una coalición pa les elleiciones, los responsables de les formaciones implicaes manifestaron yá'l so deseyu de que'l mesmu vaiga más alló d'esti tarrén, dándo-y continuidá a una unidá que creyen que'l nacionalismu asturianu d'esquierda necesitaba dende va años.

Enllaces esternos

• Páxina web oficial d'Unidá