Astérix na tierra los pictos

Astérix na tierra los pictos
Astérix chez les pictes
Publicación
Formatu	Álbum d'historietes
Primer edición	N'álbum: 2013
Editorial	Les Editions Albert René
Nº páxines	48, a color
ISBN	978-84-216-7915-9
Conteníu
Tradición	Franco-belxicana
Xéneru	Cómicu
Direición artística
Creador(es)	René Goscinny Albert Uderzo
Guionista(es)	Jean-Yves Ferri
Dibuxante(s)	Didier Conrad
Colorista(es)	Thierry Mébarki, Murielle Leroi y Raphaël Delerue
Serie
Coleición	Astérix el Galu
Númberu	35
Numberación	37
Volume anterior	L'anniversaire d'Astérix et Obélix - Le livre d'or
Volume siguiente	Astérix y el papiru de César
Sitiu web
[editar datos en Wikidata]

Astérix y los pictos (Astérix chez les pictes nel orixinal francés) ye l'álbum númberu 35 de la serie Astérix el Galu, editada por Les Éditions Albert René. Foi publicáu en 2013, saliendo a la venta'l 24 d'ochobre d'esi añu en tol mundu. Ye'l primer álbum d'Astérix que sal espublizáu n'asturianu al mesmu tiempu que l'orixinal francés y que la versión en castellanu. Tamién ye'l primer álbum d'Astérix nel que nun participen nengún de los sos ceadores orixinales; en cuenta d'ellos, Jean-Yves Ferri encárgase del guión y Didier Conrad del dibuxu. N'asturianu ta editáu por Salvat. Foi un ésitu mundial de ventes, con más de 5 millones d'exemplares en menos d'un añu en tol mundu, y foi el llibru más vendíu en Francia en 2013.

Argumentu

La hestoria empecipia na aldea gala en plenu iviernu, tres la cayida d'una gran nevada. Astérix y Obélix van al sableru a pañar ostres, y atópense un gran témpanu de xelu con una persona conxelada dientro. Llévenla a l'aldea, y el druida Panorámix identifícalu polos sos tatuaxes como un pictu de Caledonia (Escocia). Tres desconxelalu recupérase casi satisfactoriamente, solo-y queda una afonía. Los galos deciden devolvelu al so país natal, y acompáñenlu Astérix y Obélix. Mientres la trevesía'l pictu recupera la fala, y preséntase como Mac Llagu, natural d'un llugar llamáu Loch Andloll (indiscutible alusión al rock and roll). Trátase d'un mozu guerreru en disputa con un xefe tribal opuestu al clan al que pertenez, Mac Abá, que raptó a la so novia, Mariselva, y pretende convertise en rei de tolos pictos; amás, esti xefe fixo un pactu colos romanos, los eternos enemigos de los galos. Cuando lleguen a la so aldea, asitiada al llau d'un llagu, apaézse-yos un enorme animal que Obélix identifica como una llóndriga, ensin dulda una representación del mitu del monstruu del llagu Ness. Pela nueche, Astérix y Obélix infíltrense na aldea enemiga y llogren rescatar a Mariselva, masque se pierden nunos túneles soterraños. Al otru día hai una gran xunta de tolos clanes pictos, na que Mac Abá pretende ser escoyíu rei, pero entós apaez Mac Llagu, al que creyíen muertu. Mac Abá acúsalu d'impostor, pero nesi momentu apaecen Astérix y Obélix con Mariselva, y destápense les maquinaciones perpetraes por Mac Abá. Lloñe de rindise, este pide ayuda a los romanos, y empecípiase una batalla campal ente estos y los pictos lleales, ayudaos d'Astérix y Obélix. Tres de la inevitable victoria, los galos tornen pa en casa, onde son agasayaos cola habitual llacuada final.

Como ye vezu, la hestoria esplota tolos tópicos rellacionaos con Escocia, dende'l monstruu del llagu Ness hasta la típica vistimenta con kilt (falda escocesa), pasando pol vezu de beber «agua de malta» (güisqui) o'l llanzamientu de tueros como deporte popular y, por supuestu, los nomes de los personaxes empezaos por Mac.

Personaxes

Arriendes de los protagonistes, Astérix y Obélix, y de los habituales personaxes de l'aldea gala, apaecen los siguientes personaxes nuevos:

• Mac Llagu, guerreru pictu.
• Numberusclausus, censor romanu.
• Grafitolbus, xeneral romanu.
• Zapeanuncius, centurión romanu.
• Aenor, animal paecíu al monstruu del llagu Ness.
• Mac Abá, xefe pictu aliáu de los romanos.
• Mac Uatroele, tíu güelu de Mac Llagu
• Mac Mini, hermanu de Mac Llagu.
• Mac Robiotic, druida pictu.
• Mac Azu, bardu pictu.
• Llixeruhiatus, llexonariu romanu.
• Mariselva, princesa picta.

Tamién apaez nuna viñeta Xulio César, amás de los pirates que suelen atopase Astérix y Obélix nos sos viaxes.

Recepción

L'álbum recibió una acoyida bien desigual per parte de la prensa xeneralista: pa dalgunos yera un ésitu, «bien superior a los últimos álbumes realizaos por Uderzo en solitariu»; pa otros medios, yera respetuosu con toles característiques d'Astérix y tolos ingredientes que fixeron de la serie un ésitu, y que «recupera sutilmente l'espíritu setenteru de la serie». Otros medios afirmaron que ye un álbum prudente", ensin nenguna sorpresa, y qu'a la fin-y dexa a ún «un regustu a dejà-vu», anque «nun hai nada que reprochar» al álbum. N'España y Alemaña foi un ésitu unánime pa la crítica y tamién tuvo mui bones ventes.

N'Asturies escosó la primer edición y hebo faese una segunda, llegando a vender inda más exemplares n'asturianu qu'en castellanu.

El so ésitu de crítica y de ventes a nivel mundial, superando l'oxetivu, arriendes de l'aprobación d'Uderzo, avalaron a los autores pa continuar les aventures de Astérix nel futuru.

Bibliografía

• Jean-Yves Ferri y Didier Conrad, Astérix na tierra los pictos, Editorial Salvat (2013).