La foceta d'oru

La foceta d'oru (La serpe d'or, orixinalmente en francés) ye'l segundu álbum de la serie d'Astérix, espublizáu orixinalmente en 1962. Nesti álbum principien les aventures pel mundu d'esti personaxe. Ye'l primer episodiu que trescurre fuera de la redolada de l'aldea.

La versión n'asturianu asoleyó'l 22 d'ochobre de 2014, cola traducción de María Xosé Rodríguez López, de manes de la Editorial Salvat.

Argumentu

Al druida Panorámix ruémpe-y la foceta d'oru qu'emplega pa recoyer l'arfueyu, que namás tien poderes máxicos si se corta con una foceta d'esa mena. Dientro poco, Panorámix va tener qu'asistir al aconceyamientu añal de druides galos que se celebra na Viesca de los Carnutosy nun va poder facelo ensin una foceta d'oru. Fabríquenles en Lutecia, asina qu'Astérix y Obélix van viaxar a esa ciudá pa consiguir úna.

Curiosidaes

Ye'l primer episodiu onde Obélix actúa como claru coprotagonista de la serie, porque nel álbum anterior namás yera un personaxe más bien de calter secundariu (el coprotagonista yera Panorámix). Dende esti álbum, y tovía na actualidá, Obélix ye'l coprotagonista permanente, mentes que Panorámix va convertise nun coprotagonista ocasional de dellos álbumes.

El so viaxe a Lutecia ye una alegoría del provincianu que trunfa na capital, a pesar de qu'históricamente Lutecia nun debía de tener la importancia que tien agora París como tal.

Nesti episodiu preséntense personaxes como Amérix (primu d'Obélix, y fabricante de focetes), Garnesix (amu d'un establecimientu de bébores, y ún de los dirixentes de la banda de traficantes de focetes de la historia, siempre vistíu con xoyes y vistíos caros), el taberneru (de nome desconocíu, propietariu d'una tabierna, que se convierte en testigu inoportunu de les maquinaciones de los traficantes de focetes), Llentéyix (sicariu, miembru de los traficantes) y la Gran Cabeza de los traficantes de focetes (que se descubre a la fin de la historia). El gobernador romanu, Gracus Perastutus, toma les faiciones del actor británicu Charles Laughton.

Toos estos personaxes nun apaecieron nada n'hestories posteriores, sacantes Amérix, que nuna ocasión fixo una visita al pobláu d'Astérix.

Como curiosidá, na páxina 36 del llibru, el formatu de les viñetes camuda, pasando al formatu "strip". Según esplica Uderzo nel llibru "Le livre de Astérix le gaulois", "enquivoquéme cola midida de les fueyes y siguí n'otru formatu hasta'l final de la historia". Dada la sobrecarga de trabayu que teníen entós, nun se modificó.