Kwon Ki-ok

Kwon Ki-ok
Vida
Nacimientu	Pyong Yang, 11 de xineru de 1901
Nacionalidá	Corea del Sur
Llingua materna	coreanu
Muerte	Seúl, 19 d'abril de 1988 (87 años)
Estudios
Estudios	Universidá de Zhejiang
Llingües falaes	coreanu
Oficiu	piloto militar (es) , aviation pioneer (en) , aviation writer (en)
Serviciu militar
Graduación	capitán
Lluchó en	Segunda Guerra Mundial
Creencies
Relixón	presbiterianismu

Kwon Ki-ok (11 de xineru de 1901, Pyong Yang – 19 d'abril de 1988, Seúl) foi la primer aviadora coreana, y tamién la primer aviadora de China.

Biografía

Kwon nació na aldega Sangsugu de Pyongyang, siendo la fía menor de Gwon Don-gak y Jang Mun-myeong. Asistió a la Escuela Sunghyeon de Pyongyang, na que graduóse en 1918. Atopó la so pasión por volar nel añu 1917, cuando asistió a una exhibición del pilotu acrobáticu d'Estaos Xuníos Art Smith.

Al añu siguiente, participó nel Movimientu Primeru de Marzu pol que viose obligada a pasar trés selmanes na cárcel. Dempués de la so lliberación, ayudó con actividaes de recaldación de fondos pa l'Asociación de Muyeres Patriótiques de Corea, por esto, la ocupación xaponesa volvió encarcelala, esta vegada por seis meses. Tres la so lliberación, exilióse en China. Instalóse na ciudá de Hangzhou, au estudiaría na Escuela pa Muyeres de Hongdao, liderada por Ellen Peterson. Enrolóse nun cursu de cuatro años pa deprender chinu ya inglés, que completó namái en dos años.

En 1923, xunióse a la Fuercia Aérea de la República de China en siendo encamentada pol Gobiernu provisional de la República de Corea, estudió pilotaxe na provincia de Yunnan, y graduóse en 1925, siendo la única muyer de la promoción. Tres la graduación, tuvo acuartelada en Beixín, pero en 1927 foi treslladada a Nankín. En 1940 algamó'l rangu de Teniente coronel.

En 1940, col fin de la Segunda Guerra Mundial y acabante d'adquirir la independencia coreana, Kwon tornó a Corea, onde'l so rol foi clave pa la creación de la Fuercia Aérea de la República de Corea. Mentanto la Guerra de Corea, Kwon foi miembru del Ministeriu de Defensa de Corea del Sur. Tres el fin de la guerra retiróse de la función publica, foi vicepresidenta de la Asociacion Cultural Chinu-Coreana dende 1966 hasta 1975. Recibió delles reconocencies pol so trabayu, incluyendo una condecoración presidencial en 1968 y la Orde de méritu pa la Fundación Nacional per parte de Corea del Sur.

Finó'l 19 d'abril de 1988, los sos restos atópense nel Campusantu nacional de Seúl.

Legáu

N'agostu de 2003, Kwon foi escoyida como "Activista pola Independencia del Mes" pol Ministeriu d'Asuntos de los Patriotes y Veteranos de Corea del Sur.

En 2005, estrenóse la película Blue Swallow, un docudrama sobre la vida de Park Kyung-won, que foi la primer aviadora civil de Corea. La película promocionábase como "la película sobre la primer aviadora coreana". Tres un llargu alderique, reconocióse a Kwon como la primer aviadora coreana, y el distribuidor viose obligáu a camudar la so campaña de marketing.