Los Bolechas

Los Bolechas
Datos
País d'orixe	?

Los Bolechas ye una serie infantil creada por Pepe Carreiro nel 2000. Depués de publicar 300 álbumes y vender más de 1.500.000 exemplares, Televisión de Galicia adaptó la serie pa televisión. Televisión del Principáu d'Asturies (TPA) estrenó'l 13 de setiembre del 2014 esta serie con un doblaxe al asturianu, convirtiéndose na primer producción infantil doblada al nuestru idioma pola cadena y na segunda depués d'El faru d'Iyán.

La serie ufierta a los neños hestories cercanes a los sos referentes culturales. En Los Bolechas nárrense hestories de la vida cotidiano d'una manera risondera, col oxetivu de que-yos preste a los más pequeños y que, al empar, interioricen conceptos y valores universales de forma curiosa y natural. Los seis hermanos, xunta a la so inseparable mascota Trasgu, un husky siberianu, protagonicen toles hestories, nes que tamién apaecen personaxes secundarios, como los padres, Pá Bolechín y Ma Bolechina, los güelos, amigos, vecinos, etc.

Los personaxes

• Xabel: Xabel ye l'hermanu mayor. Tien 7 años y ye, poro, el más responsable y el que s'encara a les situaciones más abegoses, anque tenga mieu. Ye'l que más rellación tien con Trasgu, el perru la serie; ye bien comilón, dalgo burru y los sos xuguetes favoritos son los moñecos tipu “Supermúsculos”.

• Cloya y Olaya: Cloya xunto con Olaya, la hermana ximielga, ye la segunda n'edá (unos 6 años); ye un revolvín, activa, positiva y un poco frívola; xuega mesmo con coches teledirixíos como con moñeques. Olaya aseméyase a la hermana ximielga pero un poco más seria. Gústan-y los oficios venceyaos tradicionalmente col mundiu masculín: mecánica d'automoción, carpintería, etc.

• Xuacu: Xuacu ye'l terceru n'edá (5 años). Ye cobarde y nun se deja ver esnudu nin na so intimidá. Ye'l más cerebrín de los hermanos y dalgo despistáu; gústen-y los instrumentos de música y los ordenadores, amás d'otros xuguetes de tipu “científicu”.

• Lena: Lena ye la cuarta n'edá (3 años). Ye caprichosa y dalgo cuentista y acusona; un poco sabichega. Tien munchos mimos y gústen-y les princeses y andar con coses de muyeres adultes: bolsos, zapatos de tacón, barra llabios. Los sos xuguetes favoritos son los rellacionados colos salones de peluquería y la estética.

• Tatá: Tatá ye'l más pequeñu la familia (9 meses). Inda nin fala nin anda. Ye un ñácaru seriu, poco dau a les cosess propies de la edá; entrugón; l'acompañante insepartable ye'l chupu; llévase bien con Trasgu, seique, porque nengún de los dos fala.

• Trasgu: Trasgu ye un perru de raza husky siberiana. Anda siempres pente los dueños; la so presencia, anque discreta, fáise notar. Ye un perru de pesu, poco dau a lladrar ensin motivu

• Secundarios: Amás d'estos protagonistes, hai dellos personaxes secundarios, pente los que rescamplen pá y ma: Pá Bolechín y Ma Bolechina, los agüelos maternos y paternos, tíos, primos, amigos, etc.

La serie de televisión

Los Bolechas ye una serie familiar empobinada sobre manera al públicu infantil, que llega a Astures col aval del gran éxitu en Galicia, onde va yá pola cuarta temporada. Los Bolechas emítise tolos sábados y domingos, dende les 9:00 de la mañana. Vacaloria Producciones dobló los 24 capítulos d'esta primer entrega de la serie, protagonizada polos muppets d'estos personaxes. Pero la serie cumple, amás, con un importante papel nel espardimientu y l'espoxigue del asturianu, dao que tolos personaxes –al igual que la web– empleguen la llingua propia d'Asturies. Nel so estrenu, tuvo datos perriba de la media de la programación infantil en castellanu. Asina, el domingu 14 de setiembre, el 7'2% de l'audiencia vio'l capítulu tituláu "La moñeca berrona".

Enllaces esternos

• Wikimedia Commons tien conteníu multimedia tocante a Los Bolechas.

• Datos: Q7249719