Clasificación climática de Köppen

De Wikipedia
Mapa actualizáu de los climas según la clasificación Köppen–Geiger.[1]
     Af      Am      As      Aw      BWh      BWk      BSh      BSk      Csa      Csb      Csc      Cwa      Cwb      Cwc      Cfa      Cfb      Cfc      Dsa      Dsb      Dsc      Dsd      Dwa      Dwb      Dwc      Dwd      Dfa      Dfb      Dfc      Dfd      ET      EF

La clasificación climática de Köppen ye ún de los sistemes de clasificación climática más utilizaos. Foi publicáu inicialmente pol climatólogu xermanu-rusu Wladimir Köppen en 1884[2][3], que publicó posteriormente delles modificaciones, ente les que rescamplen les de 1918 y 1936[4][5]. Posteriormente el climatólogu alemán Rudolf Geiger collaboró con Köppen pa realizar dellos cambios más (en 1954 y 1961) na clasificación, que de magar ye nomada delles veces como sistema de clasificación climáticu de Köppen-Geiger[6][7].

Esti modelu foi modificáu, a mediaos de la década de 1960, pola clasificación climática de Trewartha. Esti sistema, que buscó redefinir climáticamente les llatitúes medies p'averase a la zonificación vexetal realmente esistente (modificó, por exemplu, el grupu climáticu C del sistema de Köppen, ampliu enforma) foi revisáu por última vegada en 1980[8].

Significáu de los símbolos[editar | editar la fonte]

Tabla de descripción esquemática de los símbolos
de la clasificación climática Köppen.[1]
Descripción
A f Tropical Selva
m Monzón
w Sabana (húmedu)
s Sabana (secu)
B W Áridu Desiertu
S Estepa
h Caldiu
k Fríu
n Con niebla fecuente[9]
C s Templáu Branu secu
w Iviernu secu
f Ensin estación húmeda
a Branu caldiu
b Branu templáu
c Branu fríu
D s Fríu (continental) Branu secu
w Iviernu secu
f Ensin estación húmeda
a Branu caldiu
b Branu templáu
c Branu fríu
d Branu mui fríu
E T Polar Tundra
F Iviernu eternu (casquete polar)

El esquema de clasificación climática de Köppen divide los climes en cinco grupos climáticos principales: A (tropical), B, (áridu), C (templáu), D (continental -fríu-) y E (polar)[10]. La segunda lletra indica'l patrón de precipitación estacional, y la tercera indica'l nivel de calor[11].

Grupu A: Climes tropicales

Nestos tipos de clima tolos meses del añu tienen una temperatura media de 18ºC o más, con precipitaciones significatives.

  • Af = Clima tropical de selva. Hai una precipitación mensual de más de 60 mm tolos meses del añu.
  • Am = Clima tropical monzónicu. Nel més más secu (qu'aveza a ser nel que coincide'l solsticiu d'iviernu del hemisferiu correspondiente) hai menos de 60 mm de lluvia, pero estes precipitaciones representen más del 4% del total añal.
  • Aw o As = Clima tropical húmedu secu o clima tropical de sabana. El més más secu hai menos de 60 mm de precipitación, y los que hai representen menos del 4% del total de lluvia añal.

Grupu B: Climes secos (áridu y semiáridu)

Estos tipos de clima defínense pola escasez de precipitaciones.

Pa saber a qué tipu pertenez un llugar hai que multiplicar la temperatura media añal (en graos Celsius) por 20, y añader:

a) 280 si el 70% de les precipitaciones apaecen nos meses de primavera y branu (d'abril a setiembre nel Hemisferiu Norte y d'ochobre a marzu nel Hemisferiu Sur), o
b) si caen nesos meses el 30-70% del total de precipitaciones del añu, o
c) 0 si la cantidá de lluvia recoyida nesos meses ye menos del 30% del total del añu.

Si'l total de mm de precipitación añal ta perbaxu del 50% del umbral definíu por esi cálculu, considérase que'l clima ye BW (áridu: clima desérticu), y si ta ente'l 50-100% el clima ye BS (semiáridu: clima estepariu).

Puede incluyise una tercer lletra pa indicar la temperatura. Orixinalmente "h" significaba clima de baxa llatitú (temperatura añal media perriba los 18ºC) y "k" significaba cllima de llatitú media (temperatura añal media perbaxu los 18ºC), pero anguaño aveza a usase la "h" pa indicar que la temperatura media del mes más fríu del añu ta perriba los 0ºC, y la "k" pa indicar que polo menos un mes tien una temperatura media inferior a 0ºC[9][12][13]. La n úsase pa denomar un clima carauterizáu pola presencia de niebles frecuentes. Ente los climes secos podemos estremar los que vienen darréu:

  • BWh = Clima desérticu caldiu
  • BWk = Clima desérticu fríu
  • BWn = Clima desérticu templáu
  • BSh = Clima semiáridu (estepariu) caldiu
  • BSk = Clima semiáridu fríu
  • BSn = Clima semiáridu templáu

Grupu C: Climes templaos

Estos tipos de clima tienen, nel so mes más fríu,una temperatura media d'ente 0ºC y 18ºC, y polo menos ún de los meses del añu tien una temperatura media perriba los 10ºC.

  • Cfa = Clima subtropical húmedu. El mes más fríu tien una temperatura media perriba los 0ºC, y a lo menos un mes tien una temperatura media perriba los 22ºC y cuatro perriba los 10º. Nun hai diferencies significatives de precipitación ente estaciones, nin meses secos nel branu.
  • Cfb = Clima oceánicu templáu. El més más fríu tien una temperatura media perriba los 0ºC, con a lo menos cuatro meses con una temperatura media perriba los 10ºC y dengún con una temperatura media superior a 22ºC. Nun hai diferencies significatives de precipitación ente estaciones.
  • Cfc = Clima oceánicu subpolar. El més más fríu tien una temperatura media perriba los 0ºC, con ente ún y trés meses con una temperatura media perriba los 10ºC. Nun hai diferencies significatives de precipitación ente estaciones.
  • Cwa = Clima subtropical húmedu monzónicu. La media de temperatura del mes más fríu ta perriba los 0ºC, y hai a lo menos un mes con una temperatura media perriba los 22ºC y a lo menos cuatro con una temperatura media de más de 10ºC. El més más húmedu del branu tien polo menos diez veces más cantidá de precipitación que'l más secu del iviernu. Una definición alternativa indica que ye una carauterística d'esti clima que el 70% o más de la precipitación total añal caiga nos seis meses menos fríos.
  • Cwb = Clima subtropical de monte, o clima oceánicu templáu con iviernos secos. El més más fríu tien una temperatura media perriba los 0ºC, y esta nun supera los 22ºC en dengún mes del añu y ta perriba de 10ºC polo menos cuatro meses nel añu. El més más húmedu del branu tien polo menos diez veces más cantidá de precipitación que'l más secu del iviernu. Una definición alternativa indica que ye una carauterística d'esti clima que el 70% o más de la precipitación total añal caiga nos seis meses menos fríos.
  • Cwc = Clima subtropical fríu de monte, o clima oceánicu subpolar con iviernos secos. La temperatura media del mes más fríu ta perriba los 0ºC, y hay ente ún y trés meses nos que la temperatura media ta perriba los 10ºC. El més más húmedu del branu tien polo menos diez veces más cantidá de precipitación que'l más secu del iviernu. Una definición alternativa indica que ye una carauterística d'esti clima que el 70% o más de la precipitación total añal caiga nos seis meses menos fríos.
  • Csa = Clima mediterraneu con branos caldios. El mes más fríu tien una temperatura media perriba los 0ºC, y hay al menos un mes con una media de temperatures perriba los 22ºC y cuatro con temperatura media perriba los 10ºC. Cae polo menos el triple de precipitación nel mes más húmedu del iviernu que nel más secu del branu, y nesti caberu la precipitación ye inferior a 30 mm.
  • Csb = Clima mediterraneu con branos templaos. El mes más fríu tien una temperatura media perriba los 0ºC, y hai cuatro nos que la temperatura media, que nun supera en dengún mes del añu los 22ºC de media, ta perriba los 10ºC. Cae polo menos el triple de precipitación nel mes más húmedu del iviernu que nel más secu del branu, y nesti caberu la precipitación ye inferior a 30 mm.
  • Csc = Clima mediterraneu con branos frescos. La temperatura media del mes más fríu ta perriba los 0ºC, y hai ente ún y tres meses nos que ta perriba los 10ºC. Cae polo menos el triple de precipitación nel mes más húmedu del iviernu que nel más secu del branu, y nesti caberu la precipitación ye inferior a 30 mm.

Grupu D: Climes continentales

Nesti tipu de climas hai polo menos un mes con temperatura media perbaxu los 0ºC, y a lo menos un mes con una media de temperatura perriba los 10ºC.

  • Dfa = Clima continental húmedu con branos caldios. La temperatura media del mes más fríu ta perbaxu los 0ºC, y hai a lo menos un mes nel que la temperatura media ta perriba los 22ºC y a lo menos cuatro nos que ta perriba los 10ºC. Nun hai diferencies significatives de precipitación ente estaciones.
  • Dfb = Clima continental húmedu con branos templaos. El mes más fríu tien una temperatura media perbaxu los 0ºC, hai cuatro meses polo menos nos que ta perriba los 10ºC y nun hai dengún nos que tea perriba los 22ºC. Nun hai diferencies significatives de precipitación ente estaciones.
  • Dfc = Clima subárticu. La temperatura media del mes más fríu ta perbaxu los 0ºC, y hai 1-3 meses nos que supera los 10ºC. Nun hai diferencies significatives de precipitación ente estaciones.
  • Dfd = Clima subárticu con fríu estremu. La temperatura media del mes más fríu ta perbaxu los -38ºC, pero supera los 10ºC ente ún y trés meses al añu. Nun hai diferencies significatives de precipitación ente estaciones.
  • Dwa = Clima continental húmedu con influencia del monzón y branu caldiu. El mes más fríu tien una temperatura media perbaxu los 0ºC, y hai polo menos cuatro meses con medias superiores a los 10ºC y a lo menos ún nos que ta perriba los 22ºC. El més más húmedu del branu tien polo menos diez veces más cantidá de precipitación que'l más secu del iviernu. Una definición alternativa indica que ye una carauterística d'esti clima que el 70% o más de la precipitación total añal caiga nos seis meses menos fríos.
  • Dwb = Clima continental húmedu con influencia del monzón y branu templáu. La temperatura media del mes más fríu ta perbaxu los 0ºC, hai cuatro meses nos que ta perriba los 10ºC y en dengún d'ellos supérense los 22ºC de temperatura media. El més más húmedu del branu tien polo menos diez veces más cantidá de precipitación que'l más secu del iviernu. Una definición alternativa indica que ye una carauterística d'esti clima que el 70% o más de la precipitación total añal caiga nos seis meses menos fríos.
  • Dwc = Clima subárticu con influencia del monzón. El mes más fríu tien una temperatura media perbaxu los 0ºC, y n'ente ún y trés d'ellos ta perriba los 10ºC. El més más húmedu del branu tien polo menos diez veces más cantidá de precipitación que'l más secu del iviernu. Una definición alternativa indica que ye una carauterística d'esti clima que el 70% o más de la precipitación total añal caiga nos seis meses menos fríos.
  • Dwd = Clima subárticu con influencia del monzón y fríu estremu. La temperatura media del mes más fríu ta perbaxu los -38ºC, y hai ente ún y trés meses con temperatura media de más de 10ºC. El més más húmedu del branu tien polo menos diez veces más cantidá de precipitación que'l más secu del iviernu. Una definición alternativa indica que ye una carauterística d'esti clima que el 70% o más de la precipitación total añal caiga nos seis meses menos fríos.
  • Dsa = Clima continental con branos caldios y secos. La temperatura media del mes más fríu ta perbaxu los 0ºC, y hai cuatro o más meses con una temperatura media de más de 10ºC y polo menos ún con una media de más de 22ºC de temperatura. Cae polo menos el triple de precipitación nel mes más húmedu del iviernu que nel más secu del branu, y nesti caberu la precipitación ye inferior a 30 mm.
  • Dsb = Clima continental con branos templaos y secos. La temperatura media del mes más fríu ta perbaxu los 0ºC, y hai cuatro o más meses con una temperatura media de más de 10ºC. Amás, la temperatura media nun ye superior a 22ºC en dengún mes del añu. Cae polo menos el triple de precipitación nel mes más húmedu del iviernu que nel más secu del branu, y nesti caberu la precipitación ye inferior a 30 mm.
  • Dsc = Clima subárticu con branos secos. La temperatura media del mes más fríu ta perbaxu los -38ºC, y hai ente ún y trés meses con temperatura media de más de 10ºC. Cae polo menos el triple de precipitación nel mes más húmedu del iviernu que nel más secu del branu, y nesti caberu la precipitación ye inferior a 30 mm.
  • Dsd = Clima subárticu con fríu estremu y branos secos. La temperatura media del mes más fríu ta perbaxu los -38ºC, y hai ente ún y trés meses con temperatura media de más de 10ºC. Cae polo menos el triple de precipitación nel mes más húmedu del iviernu que nel más secu del branu, y nesti caberu la precipitación ye inferior a 30 mm.

Grupu E: Climes polares y alpinos

Nesti tipu de climas la temperatura media ta perbaxu los 10ºC tolos meses del añu.

  • ET = Clima de tundra. La temperatura media del mes menos fríu ta ente los 0ºC y los 10ºC.
  • EF = Clima del casquete polar. Clima con iviernu eternu, con temperatures medies inferiores a los 0ºC demientres tol añu.

Esquema[editar | editar la fonte]

Grupu A: Climes tropicales[editar | editar la fonte]

Los climes tropicales caracterícense pola presencia constante de temperatures altes a nivel de la mar y en cotes baxes d'altitú. Tolos meses del añu tienen una temperatura media perriba los 18ºC. Dientro d'ellos estrémense los siguientes subtipos:

Clima tropical de selva (Af)[editar | editar la fonte]

Torre de Kuala Lumpur.

Nesti subclima, qu'apaez básicamente na franxa que marquen l'ecuador y los 10º de llatitú norte y sur, tolos meses hay una precipitación media de más de 60 mm. Esti clima ta domináu pol sistema de baxes presiones conocíu como zona de calma ecuatorial tol añu, polo que nun hai estaciones naturales en términos de cambeos térmicos y d'humedá. Ente les poblaciones que tienen esti tipu de clima podemos citar: Apia (Samoa), Georgetown (Guyana), Honiara (Islles Salomón), Kampala (Uganda), Kuala Lumpur (Malasia), Medellín (Colombia) y Singapur.

Dalgunos de los llugares que tiene esti tipu de clima son uniforme y monótonamente húmedos tol añu (por exemplu na costa pacífica americana dende Ecuador a Costa Rica), mentantu qu'hai otros nos ye más húmeda la temporada na que nos díes son más llargos y hai más hores de lluz diurna (Palembang (Indonesia)) y dellos nos qu'asocede lo contrario y son más húmedos los meses con menos lluz diurna y díes más cortos (Sitiawan (Malasia)).

[NOTA. El conceptu de non estacionalidá fai referencia a l'ausencia, na zona tropical, de grandes diferencies no que cinca a les hores de lluz diurna y les temperatures a lo llargo del añu. Hai cambeos cíclicos añales, pero nun son tan predecibles como los de la zona templada del planeta, y nun se rellacionen cola temperatura sinón cola disponibilidá d'agua, seya d'orixe pluvial o soterránea. La respuesta de los vexetales, de los animales (alimentación, reproducción, ciclos migratorios...) y humana (agricultura, caza, recolección, pesca...) adáutase a esta "estacionalidá" tropical. Dafechamente, nes fasteres tropicales d'América Central y del Sur la estación húmeda ye nomada "iviernu" con independencia d'en cuálu hemisferiu teamos, magar que nes zones perriba del ecuador coincida col branu del Hemisferiu Norte, y la estación seca ye nomada "branu" magar que coincida col iviernu del Hemisferiu Norte.]

Clima tropical monzónicu (Am)[editar | editar la fonte]

Esti clima ye'l resultáu de l'aición de los vientos monzónicos, que camuden la so direición nes diferentes estaciones. Nesti clima hai un més secu (xeneralmente durante'l solsticiu d'iviernu correspondiente a cada llau del ecuador, o inmediatamente dempués) nel que la lluvia, magar que supera'l 4% del total de precipitación, nun supera los 60 mm[8]. Ente les poblaciones que tienen esti tipu de clima podemos citar: Chittagong (Bangladesh), Conacri (Guinea), Douala (Camerún), Freetown (Sierra Leone), Xakarta (Indonesia), Libreville (Gabón), Malabu (Guinea Ecuatorial), Miami (Estaos Xuníos), Manaos (Brasil) o Santu Domingu (República Dominicana).

Clima tropical húmedu y secu o clima tropical de sabana (Aw o As)[editar | editar la fonte]

Catedral de Maputu (Mozambique).

Nesti clima hai una estación seca marcada, na que'l mes más secu tien una precipitación total menor de 60 mm y menor del 4% del total de lluvia añal[8].

La mayoría de les poblaciones que tienen esti clima tán en llatitúes d'ente los 10º y los 20º (norte o sur). Sicasí, hai otros climes nestes llatitúes. Actualmente la costa del mar Caribe, dende' golfu d'Urabá (na llende ente Colombia y Panamá) hasta'l delta del ríu Orinoco, yá nel océanu Atlánticu, presenta llargos periodos secos. El casu estremu (con clima BSh, carauterizáu por precipitaciones escases ya errátiques) represéntenlu amplies zones de la península de Guajira y la rexón de Coro, al oeste de Venezuela; estes dos penínsules, les más septentrionales d'América del Sur, recibe menos de 300 mm de precipitación total anual, concentrada amás en 2-3 meses. Estes condiciones climátiques estiéndense peles Antilles Mayores y Menores, formándose asina'l cinturón secu caribeñu. La duración y severidá de la estación seca son menores tierra adientro. Nel cursu del ríu Amazones, que fluye en direición este xusto perbaxu la llinia l'ecuador, el clima yá ye Af. Al este de los Andes, ente'l Caribe secu y l'húmedu Amazones alcuéntrense los llanos o sabanas venezolanos, que-y dan el nome a esti clima.

Ente les poblaciones que tienen esti tipu de clima podemos citar: Abidjan (Costa de Marfil), Abuya (Nixeria), Accra (Ghana), Asunción (Paraguái), Banxul (Gambia), Bangkok (Tailandia), Bujumbura (Burundi), Caraques (Venezuela), Chennai (India), Ciudá de Guatemala, L'Habana (Cuba), Darwin (Australia), Kingston (Xamaica), Kolkata (India), Maputu (Mozambique), Ciudá de Panamá o Rio de Janeiro (Brasil).

Delles veces úsase As en cuenta de Aw pa denomar esti clima cuando la estación seca producese na época del añu con más hores de lluz diurna. Esto pasa en Ḥawai, el noroeste de la República Dominicana, África oriental y la costa nororiental de Brasil. Na mayoría de los llugares con clima tropical de sabana, por embargu, la estación seca ocurre na época del añu colos díes más cortos por culpa del fenómenu conocíu como sombra orográfica, qu'apaez nos meses con más hores de lluz diurna. Ente les poblaciones que tienen esti tipu de clima (As) podemos citar Recife (Brasil), Trincomalee (Sri Lanka) o Mombasa (Kenya).

Grupu B: Climes secos (áridu y semiáridu)[editar | editar la fonte]

Estos climes caracterícense por tener un nivel de precipitación añal inferior a un valor umbral equivalente al potencial d'evotrespiración[8]. Esi valor umbral (en mm) calcúlase multiplicando la temperatura media añal en graos Celsius y añadiendo:

a) 280 si el 70% de les precipitaciones apaecen nos meses de primavera y branu (d'abril a setiembre nel Hemisferiu Norte y d'ochobre a marzu nel Hemisferiu Sur), o
b) si caen nesos meses el 30-70% del total de precipitaciones del añu, o
c) 0 si la cantidá de lluvia recoyida nesos meses ye menos del 30% del total del añu.

Si la precipitación anual ta perbaxu del 50% d'esi umbral el clima clasifícase como BW, clima áridu o desérticu; y si ta ente'l 50 y el 100% d'esa cantidá clasifícase como BS??, semiáridu o estepariu.

Puede incluyise una tercer lletra pa indicar la temperatura. Orixinalmente "h" significaba clima de baxa llatitú (temperatura añal media perriba los 18ºC) y "k" significaba cllima de llatitú media (temperatura añal media perbaxu los 18ºC), pero anguaño aveza a usase la "h" pa indicar que la temperatura media del mes más fríu del añu ta perriba los 0ºC, y la "k" pa indicar que polo menos un mes tien una temperatura media inferior a 0ºC.

Palacio de Gobierno de Perú, en Lima.

Les árees desértiques asitiaes nes fasteres costeres de los continentes en llatitúes tropicales o próximes a los trópicos caracterícense por tener, pola aición de les corrientes oceániques fríes, temperatures más fríes que les que s'atopen en cualesquier otru llugar de llatitú similar y niebla y nubes baxes frecuentes, pese a que tán ente los llugares más secos de la Tierra en términos de precipitación anual recibida. Esti clima nómase, a veces, BWn[9][12][13]. La categoría homónima nel clima semiáridu, BSn, alcuéntrase nes zones esteparies costeres[9][12][13] .

Ente les poblaciones que tienen clima áridu o desérticu podemos citar: Alice Springs (Australia) (BWh), Bagdag (Iraq) (BWh), Phoenix (EEXX) (BWh), Las Vegas (EEXX) (BWh), Las Palmas de Gran Canaria (España) (BWh), La Meca (Arabia Saudita) (BWh), El Cairu (Exiptu) (BWh), Damascu (Siria) (BWk), Walvis Bay (Namibia) (BWn) y Lima (Perú) (BWn)

Y dalgunes de les más poblaes con clima semiáridu o estepariu son: Alicante y Santa Cruz de Tenerife (España) (BSh), Maracaibo (Venezuela) (BSh), Nicosia (Xipre) (BSh), Trípoli (Libia) (BSh), Luanda (Angola) (BSh), Bakú (Azerbaixán) (BSk), Kabul (Afganistán) (BSk), Comodoro Rivadavia (Arxentina) (BSk) y Sana'a (Yeme) (BSn).

Dalgunes veces añádese una cuarta lletra pa señalar si la mitad "braniega" o "ivernal" del añu ye más húmeda que la otra metá. Pa determinalu el més con más precipitación tienen que caer polo menos 60 mm si tolos meses del añu tienen una temperatura media perriba los 18ºC, y 30 mm si non, y amás, el 70% de la precipitación añal total tien que ser recoyida na mesma metá del añu na que ta'l mes más húmedu. Cuando concurren estes circunstancies añádese una cuarta lletra, qu'indica cuando ye la temporada seca. Asina, el clima de Ḥartum (Sudán) etiquétase como BWhw, Alexandría (Exiptu) como BWhs y Xining (China) como BSkw. Nos llugares nos que nun se cumplen les condiciones citaes nun s'añade una cuarta lletra.

Grupu C: Climes templaos[editar | editar la fonte]

Los climes templaos, nel sistema Köppen modernu, defínense como aquellos que tienen una temperatura media, nel so mes más fríu, perriba de los -3ºC (o, notres versiones, de los 0ºC, como yá se dixera) pero perbaxu de los 18ºC. Esta temperatura de -3ºC coincide aproximadamente col territoriu que pasa col suelu xelao o cubiertu de nieve un mes al añu o más.

La segunda lletra indica'l patrón de precipitación:

  • w indica iviernos fríos, nos que la precipitación media del mes más secu del iviernu ye menos del 10% de la precipitación media del mes más húmedu del branu.
  • s indica que hai polo menos trés veces más lluvia nel mes más húmedu del iviernu que nel mes más secu del branu.
  • f indica que hai precipitaciones significativas en toles estaciones.

La tercer lletra indica el grau de calor nel branu. La a indica que la temperatura media del més mas caldiu del branu ta perriba de los 22ºC, y la b que ta perbaxu d'esa cifra.

Climes mediterraneos[editar | editar la fonte]

Estos climes apaecen, habitualmente, nes fasteres occidentales de los continentes, ente les llatitúes de los 30º y los 45º[14]. Estos climes tán na rexón del frente polar n'iviernu, y poro tienen temperatures moderaes con tiempu variable y lluviosu. Los branos son secos y caldios, pol predominiu de los sistemes d'altes presiones subtropicales, sacante nes zones más averaes a les costes, nos que l'aición de les corrientes oceániques fríes, que magar que pueden traer niebla eviten la llegada de les lluvies, suaviza les temperatures[8].

Ente les poblaciones nes qu'alcontramos el clima mediterraneu típicu (Csa) podemos citar: Beirut (El Líbanu), Xerusalén (Israel), Arxel (Arxelia), Roma y Nápoles (Italia), Palma de Mallorca y Madrid (España), Antalya (Turquía), Duxambé (Taxiquistán), Los Angeles (EEXX), y Perth y Adelaide (Australia).

Los branos secos apaecen tamién notres zones que nun s'asocien habitualmente con un clima mediterraneu típicu. Como'l so mes más caldiu nun alcanza los 22ºC de temperatura media, clasifíquense como clima mediterraneu con branu templáu (Csb)[1]. Dalgunes d'estes zones tienen un clima peraveráu al oceánicu (Cfb), esceptu porque los sos patrones climáticos braniegos cumplen los requisitos necesarios pa ser incluyíos nesta categoría Köppen. Dellos llugares que pertenecen a la categoría Csb son: Santiago (Chile), A Coruña (España), Porto (Portugal), San Francisco y Seattle (EEXX) y Ciudá del Cabu (República Sudafricana).

El clima mediterraneu con branu fríu (Csc) apaez en tierres altes adxacentes a zones costeres con clima Csb, nes que la fuerte influencia marítima impide que la temperatura media nos meses ivernales caiga perbaxu los 0ºC. Esti clima ye raru d'atopar, y apaez principalmente en fazas aislladas de la cordelera de les Cascades y los Andes, amás d'en puntos perconcretos de la costa del Atlánticu Norte y en zones altes de Ḥawai.

Climes subtropicales húmedos[editar | editar la fonte]

Tokyo Skytree.

Estos climes apaecen habitualmente nes fasteres orientales de los continentes, xeneralmente en llatitúes d'ente 25º y 40º. Al contrariu que los climes mediterráneos de branu secu nestos hai un fluxu d'aire caldiu y húmedu dende los trópicos qu'aporta humedá y calor nos meses del branu. Por esti motivu el branu, y non como asocede nel clima mediterraneu, nel que ye'l iviernu, ye nestos climas la estación más húmeda.

El monzón y los vientos subtropicales xeneren un fluxu en direición sur que, dende los trópicos, lleva aire caldiu y húmedu al sur de les fasteres orientales de los continentes. Esti fluxu ye'l que trae les tormentes braniegues, frecuentes y de corta duración, tan carauterístiques de los climes subtropicales más meridionales, como los que tienen el sur de los Estaos Xuníos, el sur de China y Xapón[8].

Dalgunos de los llugares nos que hai un clima subtropical húmedu (Cfa) son: Buenos Aires (Arxentina), São Paulo (Brasil), Brisbane y Sydney (Australia), Orlando y Washington DC (EEXX), Belgráu (Serbia), Lugano (Suiza), Sochi (Rusia), Shanghai y Nanjing (China), Tokiu y Osaka (Xapón), Venecia (Italia) y Durban (República Sudafricana).

El clima subtropical húmedu d'iviernu secu (monzónicu) ta influenciáu pol monzón, y tien el patrón clásicu d'iviernu secu y branu húmedu que s'asocia colos climes monzónicos tropicales. Alcontramos esti clima (Cwa), por exemplu, en Lusaka (Zambia), Santiago del Estero (Arxentina), Islamabad (Paquistán), Nueva Delhi (India), Katmandú (Nepal), Ḥong Kong, Ḥanói (Vietnam) y Guadalajara (Méxicu).

Climes oceánicos[editar | editar la fonte]

Los climes oceánicos templaos (Cfb) apaecen habitualmente nes llatitúes medies (ente los 40º y los 60º) de la fastera occidental de los continentes. Xeneralmente sitúense inmediatamente más al norte o al sur (depende del hemisferiu) de los climes mediterráneos, anque n'Australia y l'estremu d'África del Sur son contiguos a climes templaos, y apaecen a llatitúes menores. Pol contrariu, n'Europa occidental apaez n'árees costeres más septentrionales, concretamente hasta los 63ºN de llatitú, en Noruega.

Estos climes tán dominaos tol añu pol frente polar, y eso provoca tiempu variable y mui nubláu. Los branos son frescos pola aición de les corrientes oceániques fríes, pero a pesar de l'abondanza de nubes, los iviernos son más suaves que notros climes qu'apaecen nes mesmes llatitúes. Tamién alcontramos climes Cfb en puntos concretos, a gran altitú, de zones tropicales subtropicales, nes que habría un clima tropical de la selva si nun fora pola altitú.

Ente los llugares nos qu'alcontramos clima oceánicu templáu (Cfb) tenemos: París y Burdeos (Francia), Copenḥague (Dinamarca), Berlín y Munich (Alemaña), Londres (Reinu Xuníu), Bilbao (España), Budapest (Hungría), Wellington y Auckland (Nueva Zelanda), Melbourne (Australia), Port Elizabeth (República Sudafricana), Mar del Plata (Arxentina) y Valdivia (Chile).

El clima oceánicu subpolar (Cfc) apaez más en direición al polu (o a altitúes mayores) que los climes templaos marítimos, y tán confinaos a faces costeres estreches de les márxenes occidentales más averaes al polu de los continentes y, especialmente nel Hemisferiu Norte, nes islles que hai frente a eses costes. Apaez en dambos hemisferios, xeneralmente ente les llatitúes 60º y 70º norte y sur[8]. Hai un clima oceánicu subpolar en Reikiavik (Islandia), Punta Arenas (Chile) o Unalaska (EEXX).

Grupu D: Climes continentales[editar | editar la fonte]

Estos climes caracterícense por tener una temperatura media perriba los 10ºC nos meses más caldios, y na temperatura media, nel so mes más fríu, perbaxu los -3ºC (o, en dalgunes versiones, como yá se dixera, 0ºC). Apaecen xeneralmente nel interior de los continentes o nes sos fasteres costeres nororientales, normalmente al norte del paralelu 40ºN. Nel Hemisferiu Sur estos climes son perraros pola práutica ausencia de tierra nes llatitúes ente los 40º y los 60º sur, y llimítense namái a llugares concretos asitiaos a gran altitú.

Clima continental húmedu con branos caldios[editar | editar la fonte]

Arcu de la Rexunificación (Pyongyang, Corea del Norte).

Esti clima (Dfa) apaez xeneralmente ente los paralelos 35º-45º, y tien temperatures medies nel mes más caldiu de más de 22ºC. Les zones con esti clima tienden a ser muncho más secas n'Europa que n'América del Norte. Ente los llugares con esti clima podemos citar, ente más otros, Sapporo (Xapón), Chicago y Boston (EEXX), Bucarest (Rumanía) y Volgogradu (Rusia).

N'Asia esti clima estiéndese más al sur que nel restu los continentes pola influyencia del sistema d'altes presiones de Siberia, que provoca que los iviernos seyan secos; los branos, pola influyencia de la circulación monzónica, pueden ser perhúmedos. A esti clima llámase-y Clima continental húmedu con influencia del monzón y branu caldiu (Dwa). Ente los llugares con esti clima podemos citar, ente más otros, Pyongyang (Corea del Norte), Seúl (Corea del Sur), y Beijing y Tianjin (China).

El clima continental con branos caldios y secos (Dsa), finalmente, apaez en zones altes axacentes a otres, más baxes, con climes mediterráneos con branu caldiu (Csa)[8]. Bixkek (Kirguistán), Muş (Turquía) y Cambridge (Idaho, EEXX) son dellos de los llugares incluyíos nesti tipu de clima.

Clima continental húmedu con branu templáu (clima hemiboreal)[editar | editar la fonte]

Los climes Dfb yDwb son contiguos, en direición a los polos, a los climes continentales con branu caldiu, xeneralmente nes llatitúes asitiaes ente los paralelos 45º y 55ºN, n'América del Norte y Asia. N'Europa del Este y Asia estiéndese a llatitúes mayores, ente los climes templaos marítimos y los continentales subárticos, alcanzando los 65º de llatitú norte en dellos llugares[8]. El clima Dfb alcontrámoslo n'Oslu (Noruega), Ḥélsinki (Finlandia), Moscú y Kaliningradu (Rusia), Bratislava (Eslovaquia), Ottawa (Canadá) y Portland (Maine, EEXX). El Dwb, pela so banda, atopámoslu en Heihe (China), Irkutsk y Vladivostok (Rusia) o el Monte Rushmore (EEXX).

El clima continental con branos templaos y secos (Dsb) aparez en fasteres asemeyaes al Dsa, magar que a altitúes y llatitúes mayores, y principalmente n'América del Norte, aú los climes mediterráneos estiéndense más al norte que n'Eurasia. Alcontramos esti tipu de clima en Roghun (Taxiquistán), Sivas (Turquía) y Flagstaff y South Lake Tahoe (EEXX).

Climes subárticos o boreales[editar | editar la fonte]

Los climes Dfc, Dsc y Dwc apaecen en llatitúes mayores que les de los otros climes del grupu D, xeneralmente ente los paralelos 50º y 65ºN. En dalgunos llugares estiéndese inclusive hasta'l paralelu 70ºN[8]. Ente les poblaciones nes qu'alcontramos estos climes podemos citar: Yellowknife y Labrador City (Canadá), Anchorage y Fairbanks (EEXX), Charlotte Pass (Australia), Murmansk (Rusia) y St. Moritz (Suiza), toos con clima Dfc; Brian Head y Homer (EEXX), con clima Dsc; y Mörön (Mongolia) y Lukla (Nepal), con clima Dwc.

Los climes subárticos con fríu estremu (Dfd,Dwd,Dsd) tienen iviernos perfríos, con temperatures perbaxu los -38ºC nel mes más fríu. Son tipos de clima que namái se dan en Siberia, y los llugares asitiaos neses fasteres tienen alcanzao sonadía como sinónimos de fríu estremu: Yakutsk (Dfd), Verjoyansk (Dfd), Omyakon (Dwd)...

Grupu E: Climes polares[editar | editar la fonte]

Los climes polares son aquellos nos que la temperatura media más caldia en cualesquier mes del añu ta perbaxu 10ºC. Estrémense dos dientro d'ellos: el clima de tundra y el d'iviernu eternu.

Nel clima de tundra (ET y ETf) el mes más caldiu tien una temperatura media d'ente 0ºC y 10ºC. Esti clima apaez nes fasteres más septentrionales de les mases continentales d'Eurasia y América del Norte, amás de nes islles averaes a elles. Esto asocede xeneralmente más al norte del paralelu 70º, magar que puede apaecer más al sur en llugares puntuales. El clima "ET" puede alcontrase tamién en delles islles cerca la Converxencia Antártica, y a grandes altitudes en dellos puntos asitiaos fuera de les rexones polares. Dellos llugares con esti clima son: la islla Campbell (Nueva Zelanda), les islles Kerguelen (Francia), la islla Macquarie (Australia), les islles del Príncipe Eduardo (República Sudafricana), el monte Rainier (Estaos Xuníos), Ushuaia (Arxentina) o Nagqu (China).

Base Esperanza (Antártida).

Delles veces añádese-y una tercer lletra, minúscula, a los climes ET, estremándose asina ente ETf, ETs y ETw, si' branu o l'iviernu ye claramente más secu que la otra metá del añu. Cuando s'inclúi esta tercer lletra aplíquense los estándares usaos pa los grupos C y D, cola condición adicional de que'l mes más húmedu tien que tener una media de lluvia de polo menos 30 mm (los climes del grupu E pueden ser tan secos o más que los del grupu B no que cinca a la precipitación cayida, pero la so tasa d'evaporación ye munchu menor).

El clima ETf ye una variante más fría y más continental del clima de tundra. Magar que tienen carauterístiques comunes col clima d'iviernu eternu, entá pueden vese nes zones con esti clima temperatures medies perriba los 0ºC. Ente los llugares que tienen esti tipu de clima podemos citar: Nanortalik (Groenlandia), Eureka o Iqaluit (Canadá), Svalbard (Noruega), islla Dikson o Mys Shmidta (Rusia), el monte Fuji (Xapón), Murghab (Taxiquistán) o la Base Esperanza (Antártida).

El clima d'iviernu eternu o de casquete polar (EF) ye'l dominante na Antártida y l'interior de Groenlandia, pero apaez tamién n'altitúes estremes en diverses cordeleres montañoses. Les temperatures medies nun superen los 0ºC dengún mes del añu en sitios como'l monte Ararat (Turquía), el Everest (China-Nepal), o les estaciones antártiques de Byrd, McMurdo o Vostok.

Les lletres de precipitación estacional cuasi nunca se-y añaden a los climas EF, principalmente por la dificultá d'estremar ente la nieve que cai y la que ye llevantada pol vientu, una y bones la nieve ye la única fonte d'humedá nesos climes.

Mapes climáticos Köppen rexonales[editar | editar la fonte]

Todos los mapes usen los 0º C como llende pa definir los climes templaos, y los 18º C temperatura media añal pa estremar ente los climes secos caldios y fríos[1].

Referencies[editar | editar la fonte]

  1. 1,0 1,1 1,2 1,3 «Updated world map of the Köppen–Geiger climate classification». Hydrol. Earth Syst. Sci. 11:  páxs. 1633–1644. 2007. doi:10.5194/hess-11-1633-2007. ISSN 1027-5606. http://www.hydrol-earth-syst-sci.net/11/1633/2007/hess-11-1633-2007.html.  (enllace direutu: Final Revised Paper)
  2. Köppen, Wladimir (1884). «Die Wärmezonen der Erde, nach der Dauer der heissen, gemässigten und kalten Zeit und nach der Wirkung der Wärme auf die organische Welt betrachtet». Meteorologische Zeitschrift 20 (3):  páxs. 351–360. 2011. doi:10.1127/0941-2948/2011/105. Bibcode2011MetZe..20..351K. http://koeppen-geiger.vu-wien.ac.at/koeppen.htm. 
  3. «Comments on: 'The thermal zones of the Earth' by Wladimir Köppen (1884)». Meteorologische Zeitschrift 20 (3):  páxs. 361–365. 2011. doi:10.1127/0941-2948/2011/0258. Bibcode2011MetZe..20..361R. http://www.ingentaconnect.com/content/schweiz/mz/2011/00000020/00000003/art00010. 
  4. Köppen, Wladimir, «Klassification der Klimate nach Temperatur, Niederschlag and Jahreslauf», Klassification der Klimate nach Temperatur, Niederschlag and Jahreslauf, 64 
  5. Köppen, Wladimir, «Das geographische System der Klimate», en Köppen, Wladimir; Geiger, Rudolf, Das geographische System der Klimate, 1, Berlin, http://koeppen-geiger.vu-wien.ac.at/pdf/Koppen_1936.pdf 
  6. «Klassifikation der Klimate nach W. Köppen», Landolt-Börnstein – Zahlenwerte und Funktionen aus Physik, Chemie, Astronomie, Geophysik und Technik, alte Serie (Berlin) 3, 1954 
  7. Überarbeitete Neuausgabe von Geiger, R.: Köppen-Geiger / Klima der Erde, 1961  (Wandkarte 1:16 Mill.) – Klett-Perthes, Gotha.
  8. 8,00 8,01 8,02 8,03 8,04 8,05 8,06 8,07 8,08 8,09 McKnight, Tom L; Hess, Darrel (2000) Physical Geography: A Landscape Appreciation. ISBN 0-13-020263-0.
  9. 9,0 9,1 9,2 9,3 «The climate of the coast and fog zone in the Tarapacá Region, Atacama Desert, Chile». Atmospheric Research 87 (3-4):  páxs. 301-311. 2008. doi:10.1016/j.atmosres.2007.11.011. https://www.sciencedirect.com/science/article/pii/S0169809507002098. Consultáu'l 21 January 2018. 
  10. «Koppen climate classification | climatology» (n'inglés). Encyclopedia Britannica. https://www.britannica.com/science/Koppen-climate-classification. Consultáu'l 21 de xineru de 2018. 
  11. «Köppen climate classification» (inglés). Consultáu'l 2017-08-04.
  12. 12,0 12,1 12,2 «CLASIFICACIÓN CLIMÁTICA DE KÖPPEN» (spanish). Universidá de Chile. Archiváu dende l'orixinal, el 21 January 2018. Consultáu'l 21 January 2018.
  13. 13,0 13,1 13,2 «Capitulo 15. Climas de Chile» (spanish). Meteorología Descriptiva y Aplicaciones en Chile páx. 427. Archiváu dende l'orixinal, el 22 January 2018. Consultáu'l 22 January 2018.
  14. Melvin R. George. «Mediterranean Climate». UCRangelands. University of California. Consultáu'l 22 de xineru de 2018.