Banda de Gaitas El Trasno

Amestar enllaces
De Wikipedia
Banda de Gaitas El Trasno
Datos
Tipu Banda de gaites
Xéneru música tradicional
Orixinarios de Cuaña
Fecha fundación 1999
Tipu de gaites Asturiana
Cambiar los datos en Wikidata

La Banda de Gaitas El Trasno ta asitiada nel conceyu de Cuaña. Naz nel añu 1999 na escuela de Música Tradicional del Conceyu. Ta conformada por una ventena de componentes, estremaos nes dos seiciones carauterístiques de les bandes de gaites: gaita (en Do) y percusión (caxa, timbal y bombu). Los integrantes d'El Trasno son alumnos de Javier Tejedor, músicu que ye'l direutor de la formación cuañesa. A lo llargo d'estos años de trayeutoria foron munches les actuaciones de la banda; non solo pela zona occidental asturiana, onde centren l'actividá más llocal, sinón tamién per tol territoriu asturianu, amás de participar en festivales n'otros sitios d'España y Europa, como Alemaña, Francia, Irlanda o Portugal. Tamién collaboraron en dalguna grabación discográfica y en conciertos de grupos de música folk y rock.

Axeitín[editar | editar la fonte]

Tres 15 años d'actividá, nel añu 2013 deciden empezar la grabación del so primer discu, Axeitín, que sal a la venta a finales del mes d'avientu del 2013. La pallabra axeitín ye una pallabra en gallegoasturianu escoyida pola banda pol so significáu: con suavidá, moviéndose despacio, términos qu'encaxen perfectamente col percorríu y evolución de la banda, que publica esti discu como resultáu de la cristalización d'un trabayu llargu de munchos años.

Ta producíu por Javier Tejedor y, pa la so grabación nos estudios TUTU de Corvera, la Banda de Gaitas El Trasno quixo acompañase de músicos asturianos de primer nivel, como Rubén Bada (bouzuki y violín), José Manuel Tejedor (gaita), Israel Sanchez (batería), Juanjo Díaz (percusión), Rubén Álvarez (guitarra), Sergio Rodríguez (baxu) o Kike Dembinsky (voz). Axeitín compónse de 11 temes más un bonus track. Ente ellos hai pieces tradicionales asturianes, composiciones nueves, toes elles de Javier Tejedor, y melodíes d'otros llugares como Bretaña o Irlanda. Dientro del discu destaquen dos cantares acompañaos de voz: La Capitana, tema del músicu y escritor xixonés Carlos Rubiera y Volviche, tema compuestu por Javier Tejedor con lletra en gallegoasturianu del poeta tapiegu Xosé Miguel Suárez Fernández.


Esti álbum, representáu por Volviche, ganó en marzu del 2014 el premiu AMAS al Meyor Cantar Folk[1]y el Premiu al Meyor Cantar[2], entamáu pola Conseyería d'Educación, Cultura y Deporte del Principáu d'Asturies. Col Premiu al Meyor Cantar, la banda fixo nel 2014 una xira de conciertos per Asturies, acompañaos polos músicos habituales, onde pasaron per escenarios como'l Centru Niemeyer d'Avilés, el Teatru Filarmónica d'Uviéu o'l Festival Intercéltico d'Occidente de Tapia, amás de tocar en Candás nos actos institucionales del Día d'Asturies. Depués d'esti premiu, la banda representó a Asturies nel Festival Liet international de Llingües Minoritaries na ciudá alemana d'Oldemburgu'l 12 d'avientu del 2014, onde interpretó'l tema Volviche.

Festival Intercélticu de Lorient 2015[editar | editar la fonte]

N'agostu del 2015, forma parte de la delegación asturiana nel Festival Intercélticu de Lorient (Francia), participando en desfiles y conciertos, ente ellos ún nel Espace Marine, acompañaos de la voz de Silvia Quesada. El día 15 d'agostu gana ante dellos rivales de Bretaña, Irlanda y Escocia'l Troféu Internacional Guiness de Percusión, celebráu dientro de les actividaes del festival. La seición de percusión de la banda interpretó una versión nueva del so Solo number five, con tres caxes, dos timbales, un bombu, un tambor tradicional, trés panderetes, una txalaparta y unos tubos a manera d'acompañamientu melódicu.

Premios[editar | editar la fonte]

  • AMAS 2014 al Meyor Cantar Folk por Volviche.
  • Troféu Internacional Guinness de Percusión del Festival Intercélticu de Lorient 2015, por Solo number five.[3].
  • AMAS 2021 na categoría de Gaita.

Referencies[editar | editar la fonte]

  1. ↑ Premiu AMAS (noticia n'asturianu).
  2. ↑ Premiu al Meyor Cantar (noticia n'asturianu).
  3. ↑ Noticia del premiu (en castellanu).

Enllaces esternos[editar | editar la fonte]

  • [1] Facebook de la Banda de Gaitas El Trasno.
  • [2] Escuela de Música Tradicional del Conceyu de Cuaña.
  • [3] Canal de la Banda de Gaitas El Trasno en YouTube
Sacáu de «https://ast.wikipedia.org/w/index.php?title=Banda_de_Gaitas_El_Trasno&oldid=4018824»