Capoeira

Capoeira

Capoeira, o la Danza de la Guerra, de Johann Moritz Rugendas, 1835.
Enfoque	Pataes, golpes, barríos coles piernes, movimientos acrobáticos
País d'orixe	Brasil
Fundador	Esclavos afro-brasilanos
Prauticantes famosos	Mestre Bimba, Vicente Ferreira Pastinha, João Grande, Mestre João Pequeño, Reinaldo Ramos Suassuna, Mestre Acordeon, Mestre Camisa.
Antepasaos	Lluches africanes
Deporte olímpicu	Non

La capoeira ye un arte marcial afro-brasilanu que guaña nos métodos de combate y nes dances de los pueblos africanos de los tiempos de la esclavitú en Brasil. Estrémase de les otres artes marciales pela so vertiente llúdica y davezu acrobática. Les piernes y pies úsense enforma en combate, pero tamién pueden emplegase otres partes del cuerpu como, sobre too, les manes, la cabeza, les rodiyes y los coldos. La capoeira xuégase y/o llúchase de distintes formes, a diferentes altures y a diferentes velocidaes, acompañada de cutiu por instrumentos, cantares y palmaes.

Etimoloxía

Nun se conoz muncho del orixe de la pallabra “capoeira”. Sicasí hai distintes teoríes que traten d'esplicalu. Una diz que vien escurque de la pallabra qu'en llingua tupi-guarani significa “claru” o “campu rasu”, por vese davezu a los esclavos fuxíos entrenando nesos sitios al envís de defendese de los amos que queríen prindalos. Otra versión refierse a la pallabra portuguesa “capoeira”, que designa al piteru y al tipu de cesta de blima que valía pa tresportar a estes aves. Los esclavos diríen al mercáu coles cestes a vender estos animales, aprovechando la oportunidá pa prauticar estos biltos de llucha, qu'habríen llamase capoeira por tresposición cola mercancía que llevaben.

Historia

Aniciu de la capoeira

Ye perdifícil describir con detalle’l nacimientu d'esti arte marcial de magar surdió na clandestinidá, nun dexando por ello cuasi escatafín (documentos, escritos, etc) pa contar la so hestoria.

Dalgunos consideren la capoeira africana dafechu, por mor de que tolo que la constitúi esiste, o esistió, de dalguna manera n’Africa. Ye posible que la capoeira tea mui inspirada nes téuniques de combate de los exércitos del Reinu Kongo, que comprendía los actuales República Democrática d'El Congu, El Congu, Angola y Gabón. Esti arte de guerra a mano vacía aprendíase a los guerreros que teníen que s’enfrentar a los exércitos d'ocupación. Según la Sociedá d'Historiadores del Congo-Brazzaville recibía’l nome de “Ngo-Lo” (“la fuercia de la pantera”, que yera’l tótem tradicional del pueblu Kongo). Pero otros piensen que ye brasilanu dafechu, porque nació nel territoriu de Brasil por muncho que los sos creadores fueren esclavos veníos d'África.

Ensin embargu la versión más aceutada diz que la Capoeira ye de xuru afro-brasilana: mientres hubo esclavitú en Brasil dende’l sieglu XVI, los portugueses estremaron y mezclaron distintes tribus africanes p'amenorgar los riesgos de revueltes; pueblos distintos entraron en contautu, y d'esti atropamientu heteroxeneu nació la primer forma de capoeira, una combinación de lluches y tradiciones africanes nel contestu de la sociedá colonial portuguesa nel Brasil.

Prauticar la capoeira yera una forma de rebelión contra la sociedá esclavista. Los primeros capoeiristes entrenábense na llucha atapando’l so arte marcial baxo l'apariencia d'un xuegu; d'esta miente, cuando los amos asomaben, el calter marcial quedaba esllíu pola música y los cantares, el combate tresformábase de secute nuna mena de baille en forma de xuegu áxil que tracamundiaba la rocea d'aquellos y torgábalos ver la naturaleza bélica de la capoeira al pensar que nun yera más qu'otra “brincadeira” (xuegu o trebeyu) d'esclavos.

La capoeira prauticábase tamién nos “quilombos”, abeyos secretos d'esclavos fuxíos creaos en llugares a desencomano pa escapar de los sos verdugos. El más conocíu, “O Quilombo dos Palmares”, duró más d'un sieglu y foi oxetu de numberosos cantares; el so representante más renomáu, Zumbi dos Palmares, foi ún de los cabezaleros de la resistencia de los esclavos africanos.

La capoeira suponía tamién una forma de llinguax corporal: los primeros esclavos, que falaben llingües estremaes y pertenecíen a cultures diferentes, crearíenla casualmente o non como una especie de factor de comunicación interétnica.

Les anteriores son les esplicatives emitíes más de cutiu. Munchos historiadores tentaron d'esplicar les circunstancies de la nacencia de la capoeira, pero nun paez que seya posible facelo d'una manera formal y absoluta.

Periodu poscolonial

Cada vez más conocida y definida na historia de Brasil, la capoeira va sobrevivir hasta la independencia del país en 1822 y el desaniciu (oficial) de la esclavitú en 1888, pero inda sigue siendo mal vista pola autoridá, que l'albidra peligrosa. Úsenla especialmente los lladrones y matones de toa castra, axuntaos en bandes rivales llamaes “maltas de capoeira”; la capoeira prauticábase na cai y los “capoeiristas” o la “capoeira” causaben baruyos, yá que la utilizaben davezu pa iguar les sos cuentes n’enfrentamientos sangrinos.

Cuando la Guerra de la Triple Alianza col Paraguái, Brasil unvió numberosos esclavos y condenaos a lluchar empara de la so llibertá, y munchos capoeiristes morrieron por un país que nun-yos tenía ciñu dalu.

En 1890, al envís de torgar la vaga creciente de la capoeira, instituyóse en Brasil el delitu de “capoeiragem” pa penar a los culpables de prauticar la capoeira. Al que garraben prauticándola prindábenlu y podíen unvialu a trabayos forciaos.

D’esta miente la capoeira caltúvose públicamente atapada bien de tiempu, y esti estáu asumióse nos “códigos” capoeiristes: estos pasaron a ser anónimos y a conocese namái pol so “apelido” o nomatu, a escoyer arbíes llixeres y tresportables, y a facer el toque de la “cavalaria” (caballería) pa sollertar de la llegada de les autoridaes y permitir xispiar a los capoeiristes.

Primeros del sieglu XX

A primeros del sieglu XX la capoeira foi algamando cada vez más popularidá, democratízase y gana en respetabilidá. Foi sofitada po munchos artistes, pensadores y personaxes públicos brasilanos qu'empecipiaron a atalantar la posibilidá de convertila nuna de les manifestaciones populares y culturales brasilanes.

Nos años 1930, Manuel dos Reis Machado, más conocíu como Mestre Bimba, fundó en Salvador de Bahia la primer escuela de capoeira, que llamó “Centro de Cultura Fisica e Capoeira Regional”. Esti ye un socedíu singular, porque daquella la capoeira solamente s’aprendía na cai y, poro, entrenala nuna sala con programes codificaos (son por casu famoses les “ocho secuencies de Mestre Bimba”) yera una novedá y anticipa les munches academies que se van crear de siguío.

La Capoeira Rexonal estrémase de la tradicional porque Mestre Bimba va amesta-y elementos de “Batuque”, una llucha africana que prauticara so padre, y otros elementos esbillaos d'artes marciales estranxeres pa facer una llucha diferente de la capoeira tradicional. Ún de los sos deseos tamién yera llimpiar la imaxe de la capoeira estremándola del bandolerismu y de los problemes de delincuencia de la sociedá brasilana de la dómina. Pa ello sólo aceuta na so academia a persones que seyan p'acreitar un puestu de trabayu o una situación honrada, colo que la primer xeneración d'alumnos son na so mayoría mozos blancos de families riques, lo que daquella yera una forma de respetabilidá.

En 1952 foi quien a atrayer l'atención del presidente brasilanu d'entós, Getulio Vargas, y fai una demostración que va llograr qu'al so términu’l presidente diga que la capoeira ye’l “verdaderu deporte nacional”.

Nun sen contrariu dafechu al de Mestre Bimba, Vicente Ferreira Pastinha, conocíu como Mestre Pastinha, encarna la corriente que quier caltener en cierta midida la capoeira tradicional, que va llamase “Capoeira Angola”.

Estos finxos son los que permiten a la capoeira remanecer del so veru y afitase anguaño como una de les actividaes deportives más prauticaes polos brasilanos xunto col fútbol, el balón volea y el Jiu-jitsu brasilanu.

La capoeira güei

Col espoxigue de la capoeira, foi surdiendo en Brasil un bon númberu de grupos, y alredor de 1970 ún d'ellos creó un sistema de gordones a asemeyanza de los cintos de color de les artes marciales asiátiques. Ensin embargu nun hai uniformidá ente los distintos grupos de capoeira a respeutive los colores de los gordones. Cada grupu tien una graduación propia de colores. Davezu’l primeru ye’l blancu, que representa la virxinidá, cuando too ta por deprender, pero a veces pue ser verde claro como seña d'un frutu qu'inda nun ta maduru. Y hasta hai grupos onde’l gordón blancu ye’l de los maestros. Esto demuestra les diferencies esistentes ente los grupos.

La década de 1980 y el resurdimientu de los movimientos de concienciación de la negritú afalaron l'apaición de grupos que buscaben acercase a la tradición. Pelos mesmos años van esperdigándose los profesores de capoeira per tol mundu.

A nivel internacional esta disciplina ta mayoritariamente organizada en grupos, caún d'ellos compuestu d'academies y d'escueles. Cada grupu tien les sos propies aspiraciones, práutiques y vezos, pero conservando siempre la base cultural común de la disciplina.

La roda

Berimbau y pandeiro

La principal carauterística, y ilustración perfeuta de la capoeira, ye la roda. La roda (corru) ye’l círculu que formen los capoeiristes nes sos lluches, que se llamen jogos (xuegos).

Na roda tán representaos tolos aspeutos de la capoeira: el marcial, coles sos lluches, y l'artísticu, coles “floreis” (acrobacies), los cantares y los instrumentos típicos de la capoeira. El xuegu simboliza la llucha, el llinguax corporal y la conversación non verbal ente los dos collacios. Esti corru, que llenda l'espaciu de xuegu, presta sobre too pa crear un ambiente atopadizu pal espectáculu. N’efeutu esti corru crea, per aciu de los cantares y ritmos brasilanos, un ambiente folixeru y caldu qu'“enllena d'enerxía” a los capoeiristas que s’enfrenten dientro’l círculu.

Nuna roda típica atópense los instrumentos de música brasilana siguientes:

• Tres berimbaos.
• Dos pandeiros.
• Un atabaque.
• Un agogo.

La persona que tien el berimbau gunga (el de soníu más grave) controla la roda, y ye la que decide’l ritmu de la música y, poro, el tipu de xuegu que tienen que facer los capoeiristes metanes la roda. Decide tamién l'entamu y el final de la roda.

Na Capoeira Angola la composición más avezada ye:

Exemplu d'acompañamientu de Capoeira Angola

• Tres berimbaos.
• Dos pandeiros.
• Un atabaque.
• Un reco-reco.
• Un agogo.

Principalmente hai dos estilos estremaos: Angola y Rexonal. La Capoeira Angola ye la tradicional, nomada asina pol Mestre Pastinha, que pretendía conservar los vezos antiguos qu'esta tenía arreyaos, a la escontra de la creación de la Capoeira Rexonal por Mestre Bimba, que pretendía fradar l'arte de tolo que podía facelu menos afechiscu en combate.

El capoeirista que canta inflúi tamién nel jogo que tien llugar metanes la roda. Al efeutu los cantares qu'acompañen el ritmu tienen davezu munchu xacíu: cuenten una historia que sopelexa dellos valores o, simplemente, carauterístiques de xuegu qu'hai que tratar de reproducir na roda. Un bon capoeirista tien que ser pa interpretar el ritmu y los cantares en visu a facer el xuegu que correspuenda, ello ye, adautar la so velocidá y movimientos al ritmu de los instrumentos, y poner en práutica los valores y carauterístiques de xuegu que seya menester nos cantares. Por exemplu un xuegu enllenu de picardía (mandinga), o d'acrobacies, o inclusive de movimientos d'animales.

L’entamu de la roda sigue un ritual precisu. Acabante formar el corru, dos capoeiristes alléguense enclicaos al pie del berimbau central y esperen. Nel intre los instrumentos entren n’aición con un orde bien concretu: el berimbau central escomienza solu, entós los otros acompáñenlu, dempués ye la vez del atabaque, siguíu del pandeiro y, finalmente, del agogo. Cuando tolos instrumentos tán tocando, un capoeirista escomienza a cantar: canta les coples solu, y tol corru repite los estribillos a coru. Solamente cuando la roda canta’l primer estribillu los dos capoeiristes que taben al aguarde pueden entamar a “xugar”. Siguidamente cualesquier de los otros capoeiristes pue garrar la vez d'ún de los dos protagonistes enclicándose primero al pie del berimbau central.

Escueles

La capoeira apriéndese nel sen d'escueles especializaes, llamaes academies, onde reina una xerarquía mui precisa ente’l Mestre y los alumnos. Perbaxo’l maestru ta’l contramaestre (o mestrando), siguíu del profesor, l'instructor y el monitor (o graduado). Los monitores pueden entamar a dar clases a los rapacinos o aidar a daquién con más grau, pero xeneralmente ye dende’l grau d'instructor cuando se dan clases de capoeira. La disciplina y el respetu mutuos son valores fundamentales nesta práutica.

Na capoeira deportiva los distintos niveles téunicos d'un capoeirista pueden tar reconocíos (neto que nel yudu o nel kárate) pola concesión d'un gordón de color, correspondiendo cada color a un grau o nivel de conocencia (téunica, hestoria, cantares, instrumentos, etc.). El grau non solamente reconoz capacidaes téuniques del prauticante, sinón que tamién recompensa’l so nivel de dedicación o implicación cola so escuela o grupu (organización, participación n’exhibiciones, etc.)

Hai grupos, sobre too los más tradicionales, que nun utilicen graos. Cuando lo faen, el númberu de graos y los colores de los gordones correspondientes nun son idénticos pa tolos grupos. Los que prautiquen la Capoeira Angola nun utilicen graos nin gordones.

Batizado

El Batizado (bautismu) ye’l pasu de grau. Pa ello apáutase davezu una selmana o menos de práutiques, cola intervención de persones de nivel veníes de tol mundu. Tien que tar presente un mestre. Pa cada nivel los alumnos tresnen pequeños espectáculos de danza, de cantares, de música… o demostraciones de capoeira colos profesores y instructores.

Apéllase a los alumnos pol so “nome de capoeira”. Llueu, unu a unu, van xugando con ún de los profesores, hasta que los valten, al envís de ser introducíos al mundu de la capoeira y asina recibir el primer gordón. Acabante pasar tolos del mesmu nivel, los alumnos xueguen ente ellos. Dempués se-yos da’l gordón (equivalente, por analoxía, a un cintu n’otres artes marciales).

Maculelê

El maculelê ye parte de la vida y hestoria de la capoeira.

El maculelê ye una danza prauticada en toles academies o escueles de capoeira. Los sos guaños tán nos cortadores de caña d'azucre qu'usaben los machetes pal entrenamientu. El ritmu nesta danza ponlu l'atabaque. Los xugadores entamen una roda alredor del atabaque. Faen la ginga al ritmu del instrumentu y esfronen ente ellos unos palos llamaos grimas que lleven en cada mano, fechos tradicionalmente de madera de “biribá” (rollinia mucosa). Nel orixe los xugadores de maculelê emplegaben machetes o sables, sustituyíos güei por palos por motivos de seguridá, masque dellos grupos xueguen tovía con armes blanques.

Samba de Roda

La samba de roda ye otra forma de danza prauticada na capoeira, col ritmu marcáu pol son del berimbau, del pandeiro y del atabaque.

Los capoeiristes faen una roda. La samba de roda nun ta reglamentada, sinón que ye llibre. Ye un mediu pa que los xugadores s’espresen, pa entamar xaréu ente ellos. Prauticada por tolos capoeiristes, precisa un xuegu rápidu de piernes que rique munches hores de práutica.

Dalgunos movimientos de capoeira

Roda de capoeira na cai

• La ginga ye’l movimientu más básicu. Más o menos pue comparase a la guardia del boxéu o de les artes marciales, pero la ginga ye más complexa, porque tampoco nun ye fixa. La base de la ginga domínase fácil al cabu de 2 o 3 selmanes. Sicasí esti movimientu nun para enxamás d'ameyorase pol prauticante, per aciu de sutiles diferencies adquiríes cola esperiencia. Estes diferencies pueden carauterizar en parte’l so “estilu” particular.

Posiciones

• Negativa
• Cocorinha

Acrobacies

• Aú (rueda)
• Aú sem mão (rueda ensin manes)
• Aú de costas
• Aú giratória (rueda na que se fai una voltiada sobre la segunda mano)
• Mola, borrão
• Helicóptero
• Macaco, (una sola mano posa en suelu pa dase impulsu p'atrás; nun ye preciso saltar)
• Macaco em pé
• Meia-lua reversão
• Queda de rins
• Aú batido (figura clásica consistente en dar una patada tando sobre una mano)
• Salto mortal (saltu p'atrás)

Golpes

• Martelo, ye una patada solmenada echando una pierna p'atrás y llanzándola direutamente p'alantre col empeine sobre’l llau del oponente.
• Armada, ye una patada solmenada echando una pierna p'atrás, prauticando una voltiada del llau de la pierna atrasada y llanzando ésta xirando alredor del pie de pivote.
• Rabo-de-arraia / (armada de costas)
• Armada pulada
• Cabeçada (testerada, golpe cola cabeza)
• Meia-lua de compasso, ye una patada llevando entrambes manes al suelu ente les piernes (una delantre y otra detrás d'elles) y llanzando la pierna contraria al brazu adelantráu, como nel movimientu d'un compás.
• Meia-lua de frente
• Parafuso
• Envergado
• Chapa / pisão / esporão
• Chapa giratória / pisão rodado
• Bênção (bendición), ye una patada frontal cola planta’l pie de cara al adversariu, llamada Chapa en Capoeira Angola.
• Ponteira (aguya), patada frontal cola punta’l pie de cara al adversariu.
• Queixada
• Gancho
• Chapéu de couro (sombreru de cueru)
• Martelo de chão (martiellu de suelu), martiellu llanzáu después d'una “negativa”.

Esquites

• Cocorinha, ye un esquite enclicándose y poniendo dambes manes a dambos llaos de la cara.
• Negativa, ye un esquite sentándose sobre un calcañu, col otru pie puestu a un llau, la rodiya doblada.
• Negativa d'Angola
• Esquiva de lado
• Esquiva de tronco
• Esquiva de frente

Otros

• Rasteira : con una pierna p'atrás a respeutive la otra, hai que tomar impulsu y de secute enclicase cola pierna de delantre. La pierna doblada emplégase pa xirar mientres que la otra “envuelve” p'alantre pa faer cayer al adversariu.
• Galopante
• Tapa: ye solmena-y una mocada al oponente.

Bibliografía

• Martin Villalba, Pedro J. "Ao som do berimbau: Capoeira arte marcial de Brasil" Ed. Alas, 2003. ISBN 84-203-0425-5 www.aosomdoberimbau.com
• Almeida, Bira. "Capoeira, a Brazilian art form. History, philosophy and practice". North Atlantic Books, 1986. ISBN 978-0-938190-29-5
• Torres Negro, Leonardo. "Capoeira, arte marcial de Brasil". Ed. Alas, 2000. ISBN 978-84-203-0377-2

Enllaces esternos

• ABADA-Capoeira Brasil - Mestre Camisa
• Links d'ABADA-Capoeira n'España
• Comunidá On-Line Capoeira
• Mestres Brasil
• Grupu Capoeira Muzenza en Méxicu y Brasil
• Axé Capoeira

• Datos: Q159452
• Multimedia: Capoeira