Ríu Suarón

Ríu Suarón
Situación
País	España
Autonomía	Principáu d'Asturies
Tipu	ríu
Coordenaes	43°28′21″N 7°03′07″W / 43.472574°N 7.052002°O
	Ríu Suarón Ríu Suarón (Asturies)
Datos
Desembocadura	Ría del Eo

El ríu Suarón ye un ríu del conceyu asturianu d'A Veiga.

Nace, de la xuntura de los regatos de Lagarteira y A Mina, cerca del llugar d'A Veiga dos Trobos, na parroquia veiguense de Paramios. Dende allí, faciendo revueltes ente praos y viesques de pinos, avanza en direición norte averándose a los llugares de Molexón y Nafaría. Cerca de Meredo, aú lu llamen ríu de Meredo toma direición oeste, magar que dempués de pasar esta población y recibir pela manzorga les agües del ríu Lormes, vuelve tomar direición norte, faciendo de llende col conceyu de Castropol. Vuelve tomar dempués direición oeste y, tres de facer, cerca'l llugar d'El Couso, un pequeñu saltu d'agua nomáu Sestelo, pasa por Armeirín y aporta a Piantón. Ellí hai, sobre elli, una ponte medieval (conocida como ponte romana de Piantón) en bon estáu de conservación. Nel tramu baxu del so calce traviesa la capital del conceyu, aú recibe pela manzorga al ríu Monxardín, hasta desaguar, nuna zona bayurosa en xuncos, nel ríu Eo.

Anguaño, tres de facer delles obres nos caberos años, el ríu ta encauzáu al so paso pola villa veigueña, pero yera avezao, en tiempos pasaos, que'l ríu la inundara cuando había una crecida. Foron especialmente importantes les de los años 1897, 1932, 1959 y 1969. Amás d'elles, enagua munches veces el campu de fútbol d'El Soutón, aú xuega los sos partíos l'Astur Vegadense, que ta asitiáu na so marxe derecha a la entrada d'A Veiga.

Bibliografía[editar | editar la fonte]

VV.AA., Enciclopedia del paisaje de Asturias, p. 897-8. Uviéu, Editorial Prensa Asturiana, 2003.

Referencies[editar | editar la fonte]

Enllaces esternos[editar | editar la fonte]