Saltar al conteníu

Ernestina de Champourcín

De Wikipedia
Ernestina de Champourcín
Vida
Nacimientu Vitoria, 10 de xunetu de 1904[1]
Nacionalidá España
Muerte Madrid, 27 de marzu de 1999[1] (94 años)
Sepultura Sacramental de San Lorenzo y San José (es) Traducir
Familia
Padre Antonio Michels de Champourcin Tafanell
Casada con Juan José Domenchina
Estudios
Llingües falaes castellanu[1]
Oficiu
Oficiu poeta, escritora
Miembru de Lyceum Club Femenino
Opus Dei (es) Traducir
Movimientu Xeneración del 27
Las Sinsombrero (es) Traducir
Seudónimos Ernestina de Champourcín
Xéneru artísticu poesía
Cambiar los datos en Wikidata

Ernestina Michels de Champourcin y Morán de Loredo (10 de xunetu de 1904, Vitoria – 27 de marzu de 1999, Madrid) foi una poeta española de la Xeneración del 27.[2] Formó parte del grupu de Las Sinsombrero.

Trayectoria

[editar | editar la fonte]

Ernestina Michels de Champourcin y Morán de Loredo nació na cai del Paséu de San Francisco en Vitoria'l 10 de xunetu de 1905, nuna familia católica y tradicionalista, que-y ufiertó una esmerada educación (na que se punxo enfotu na conocencia y usu de distintes llingües) nun ambiente familiar, cultu y aristocráticu, al pie de los sos hermanos.[2][3]

El so padre yera abogáu d'idees monárquiques, d'enclín lliberal-conservadora, Antonio Michels de Champourcin y Tafarrell. Tenía'l títulu de barón de Champourcin, lo qu'atestiguaba que la familia paterna provenía de la Provenza francesa. Pela so parte, Ernestina Morán de Loredo y Castellanos, como se llamaba la so madre, nació en Montevidéu, y yera la única fía d'un militar, asturianu d'ascendencia, con quien viaxó frecuentemente a Europa.

Alredor de los diez años, treslladóse, xuntu col restu de la familia a Madrid, onde foi matriculada nel Colexu del Sagráu Corazón, y recibió preparación por profesores particulares; esaminóse como alumna llibre de bachilleratu nel Institutu Cardenal Cisneros. El so deséu d'estudiar na Universidá viose truncáu debíu en parte a la oposición del so padre, pese al sofitu de la so madre, dispuesta a acompañala a les clases, para cumplir cola norma esistente pa les muyeres menores d'edá.[2]

La so conocencia del francés y del inglés, y la so creatividá, llevóla a empezar dende bien moza a escribir poesía en francés, qu'ella mesma destruyó al plantegase seriamente una vocación lliteraria. El so amor a la llectura y l'ambiente cultu familiar púnxola en contactu colos grandes de la lliteratura universal dende bien pequeña, creciendo colos llibros de Victor Hugo, Lamartine, Musset, Alfred de Vigny, Maurice Maeterlinck, Verlaine y de grandes místicos castellanos, como San Xuan de la Cruz y Santa Teresa de Xesús. Más tarde lleó a Valle-Inclán, Rubén Darío, Concha Espina, Amado Nervo y, sobremanera, Juan Ramón Jiménez. La figura de Juan Ramón Jiménez tien una importancia vital nel desenvolvimientu d'Ernestina como poeta, y ello ye qu'ella siempres lu consideró como'l so maestru.[4]

Como la gran mayoría de representantes de la so xeneración, los primeros testimonios de la so obra poética son poemes sueltos publicaos a partir de 1923 en diverses revistes de la dómina, tales como Manantial, Cartagena Ilustrada o La Libertad. En 1926 María de Maeztu y Concha Méndez fundaron el Lyceum Club Femenino, proponiéndose con ello concenciar a la unidá ente les muyeres, con cuenta de que se ayudara na llucha por intervenir nos problemes culturales y sociales del so tiempu. Esti proyectu interesó a Champourcín, que s'arreyó nél, encargándose de tolo relativo a la lliteratura.[4]

Nesi mesmu añu publicó en Madrid la so obra En silencio y unvió a Juan Ramón un exemplar esperando'l xuiciu y crítica del poeta a la so primer obra. Magar nun recibir nenguna contestación, el so camín crucióse col del almiráu poeta y la so muyer, Zenobia Camprubí, en La Granxa de San Ildefonso. A partir d'esti casual alcuentru surdió ente dambos una amistá que la llevó a consideralu'l so mentor, al igual qu'asocedió a los sos compañeros de xeneración.[5] Foi asina cómo entró en contactu con dalgunos de los integrantes de la Xeneración del 27: Rafael Alberti, Federico García Lorca, Luis Cernuda, Jorge Guillén, Pedro Salinas y Vicente Aleixandre. Y amás, debe al so mentor conocer la poesía inglesa clásica y moderna: Keats, Shelley, Blake, Yeats.[4]

A partir de 1927, empieza una etapa na que publica nos periódicos (n'especial nel Heraldo de Madrid y La Época) casi únicamente crítica lliteraria. Nestos artículos publicaos antes de la guerra civil trata cuestiones como la naturaleza de la poesía pura y l'estética de la «poesía nueva» que trabayaben los mozos del 27, grupu del qu'ella se sentía integrante al compartir la mesma concepción de la poesía.[5] Publica los sos primeros llibros en Madrid: En silencio (1926), Ahora (1928), La voz en el viento (1931), Cántico inútil (1936), lo cual fízola ser conocida nel mundu lliterariu de la capital. Puede afayase una evolución na so obra dende un modernismu inicial a la solombra de Juan Ramón Jiménez a una poesía más personal marcada pola temática amorosa envuelta nuna rica sensualidá. Foi escoyida por Gerardo Diego pa la so Antología de 1934, al pie de Josefina de la Torre, siendo les úniques muyeres.[5][3]

Caltuvo una intensa correspondencia cola poeta Carmen Conde, prácticamente ininterrumpida dende xineru de 1928 hasta 1930. A partir d'esi añu, les cartes fueron espaciándose anque la caltuvieron hasta los años ochenta. Sicasí, por circunstancies diverses, caltiénense sobremanera les cartes de Champourcín a Conde.[6]

En 1930, mientres realiza actividaes nel Lyceum Femenín, al igual qu'otres intelectuales de la República, conoz a Juan José Domenchina, poeta y secretariu personal de Manuel Azaña, con quien va contraer matrimoniu'l 6 de payares de 1936.[2]

Poco antes del golpe d'Estáu de 1936 Ernestina publicó la que sería la so única novela, La casa de enfrente, yá qu'amás de esta solo escribió fragmentos d'una novela inconclusa, Mientras allí se muere, na que narra les vivencies esperimentaes nel so trabayu d'enfermera mientres la guerra civil.[2] Los acontecimientos políticos qu'asocedieron xustifiquen que'l so espardimientu quedara tapecíu. Sicasí, esta obra representa un importante finxu na lliteratura escrita por muyeres, pos nella l'autora realiza, al traviés d'una narradora-protagonista, un analís sobro la crianza, educación y socialización de les neñes burgueses nes primeres décades del pasáu sieglu xx. Esta obra permite considerar a Ernestina de Champourcin como moderadamente feminista.[7]

Mientres la Guerra Civil, Juan Ramón y Zenobia, esmolecíos polos neños güérfanos o abandonaos, fundaron una especie de comité denomináu "Protección de Menores". Ernestina xunióse-yos en calidá d'enfermera, pero por cuenta de ciertos problemes con dellos milicianos tuvo que dexalo y entrar como auxiliar d'enfermera nel hospital rexentáu por Dolores Azaña.[2]

Una de les consecuencies del trabayu del so home, como secretariu políticu d'Azaña, foi que'l matrimoniu tuvo qu'abandonar Madrid, empecipiando un periplu que los llevó a Valencia, Barcelona y Francia, onde tuvieron en Toulouse y París, hasta que, finalmente, en 1939, fueron convidaos pol diplomáticu y escritor mexicanu Alfonso Reyes Ochoa, fundador y director de La Casa d'España en Méxicu, convirtiendo esti país nel llugar definitivu del so esiliu.[2][8]

Magar que nun primer momentu escribió numberosos versos pa revistes como Romance y Rueca, la so actividá creativa amenorga énte les necesidaes económiques que-y fixeron centrar la so actividá nel trabayu de traductora pal Fondu de Cultura Económica y d'intérprete pa l'Asociación de Personal Técnico de Conferencies Internacionales.[9]

La so etapa en Méxicu ye una de les más prolífiques; publicó Presencia a oscuras (1952), Cárcel de los sentidos (1960) y El nombre que me diste (1960).[2] Nos años 50 conoz l'Opus Dei y collabora n'actividaes de promoción social nun barriu marxinal; pocu dempués solicitó l'almisión nesa institución de la Ilesia.[10]

El so mentor Juan Ramón Jiménez trabayaba como amestáu cultural na embaxada española n'Estaos Xuníos y otros componentes del grupu del 27 se exiliaron tamién a América como foi'l casu, ente otros, d'Emilio Prados y Luis Cernuda.[9] Magar tou, el cambéu nun foi fácil. El matrimoniu nun tuvo fíos, y sobrollevaron de forma bien distinta l'esgayamientu de los sos raigaños. Mientres Juan José Domenchina nun llevó bien la so nueva vida como exiliáu y morrió en 1959, ella llegó a tener fuertes sentimientos d'enraigono con esta la so nueva “patria”.[9] Ye nesti momentu cuando la relixosidá vivida mientres la so niñez apínase, dando a la so obra un misticismu desconocíu hasta'l momentu. Publica Hai-kais espirituales (1967), Cartas cerradas (1968) y Poemas del ser y del estar (1972).[9]

En 1972 tornó a España. Morrió'l 27 de marzu de 1999 en Madrid.

Referencies

[editar | editar la fonte]
  1. ↑ 1,0 1,1 1,2 Afirmao en: autoridaes BNF. Identificador BnF: 12271280h. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
  2. ↑ 2,0 2,1 2,2 2,3 2,4 2,5 2,6 2,7 Escritores.org. «De Champourcín Morán, Ernestina» (castellanu). www.escritores.org. Consultáu'l 30 d'abril de 2018.
  3. ↑ 3,0 3,1 «Edith Checa: Ernestina de Champourcín - nº 9 Espéculo». pendientedemigracion.ucm.es. Consultáu'l 30 d'abril de 2018.
  4. ↑ 4,0 4,1 4,2 Rosa Fernández Urtasun. «Ernestina de Champourcín: una voz diferente en la Generación del 27».
  5. ↑ 5,0 5,1 5,2 «PoesíaDigital». www.poesiadigital.es. Consultáu'l 30 d'abril de 2018.
  6. ↑ (2007) Rosa Fernández Urtasun: Epistolario. Madrid: Castalia. ISBN 978-84-9740-235-4.
  7. ↑ «¡¡Ábrete libro!! - Foro sobre libros y autores • Ver Tema - La casa de enfrente - Ernestina de Champourcin» (castellanu). www.abretelibro.com. Consultáu'l 30 d'abril de 2018.
  8. ↑ «CVC. El Trujamán. Historia. Traduciendo desde el exilio (1): Ernestina de Champourcín, por Josefina Cornejo.» (castellanu). cvc.cervantes.es. Consultáu'l 30 d'abril de 2018.
  9. ↑ 9,0 9,1 9,2 9,3 «Opus Dei. Ernestina de Champourcin de la Generación del 27, exiliada republicana, supernumeraria del Opus Dei». www.conelpapa.com. Archiváu dende l'orixinal, el 14 d'avientu de 2017. Consultáu'l 30 d'abril de 2018.
  10. ↑ «‘Del exilio a Dios’, nueva biografía de la poeta Ernestina de Champourcin» (castellanu). opusdei.org. Consultáu'l 2021-05-20.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Ernestina_de_Champourcín&oldid=4358625»