Ernest Shackleton

De Wikipedia
Ernest Shackleton
Voz
Vida
Nacimientu Kilkea Castle (en) Traducir15 de febreru de 1874[1]
Nacionalidá Bandera del Reinu Xuníu Reinu Xuníu de Gran Bretaña ya Irlanda
Muerte Puerto Grytvyken (es) Traducir5 de xineru de 1922[1] (47 años)
Sepultura Puerto Grytvyken (es) Traducir
Causa de la muerte infartu de miocardiu[2]
Familia
Padre Henry Shackleton
Madre Henrietta Letitia Sophia Gavan
Casáu con Emily Shackleton (1904 – )[3]
Fíos/es
Hermanos/es
Estudios
Estudios Dulwich College (es) Traducir
Brighton Grammar School (es) Traducir
Llingües falaes inglés[4]
Oficiu esplorador, oficial, viaxeruesplorador polar
Emplegadores The Royal Magazine (en) Traducir
Real Sociedad Geográfica Escocesa (es) Traducir  (1904 –
Premios
Miembru de Royal Geographical Society
Serviciu militar
Cuerpu militar Royal Navy
Graduación teniente de navío (es) Traducir
Lluchó en Primer Guerra Mundial
Guerra civil rusa
IMDb nm0787123
Cambiar los datos en Wikidata
Ernest Shackleton

Ernest Henry Shackleton (15 de febreru de 1874Kilkea Castle (en) Traducir – 5 de xineru de 1922Puerto Grytvyken (es) Traducir) foi un esplorador anglo-irlandés, famosu sobre too pola so espedición de 1914-1916 nel barcu Endurance.

Nació'n Kilkee, County Clare (Irlanda) nel añu 1874. Estudió nel Dulwich College (Londres), ente 1887 y 1890, y foi oficial de la marina mercante.

Espediciones[editar | editar la fonte]

La espedición del Discovery con Scott[editar | editar la fonte]

En 1901 participó na Espedición Nacional Antártica (National Antarctic Expedition), iguada pola Royal Geographical Society. Esta espedición conozse tamién col nome d'espedición del Discovery, porque esi yera'l nome del barcu nel que diben. El xefe de la espedición yera Robert Falcon Scott, otru esploraor polar perconocíu. Tamién diba nella Edward Wilson, ún de los homes que intentaría algamar el Polu Sur na espedición Terra Nova de Scott y morrería nel camín de vuelta col propiu Scott.

En 1902 la espedición Discovery intentó algamar el Polu Sur; Scott, Shackleton y Wilson yeren l'equipu. Nun pudieron llegar, por delles razones. Ente otres, que nun taben bien preparaos; nun yeren espertos colos perros de los trineos nin esquiando. Amás, les espediciones britániques de la época basábanse nel esfuerciu personal y el valor, y nun llevaben comida abonda. Ficieron una nueva marca de "sur más llonxanu" a 82º 17' el 31 d'avientu de 1902, quedando a 857 km del Polu.

Aparte de les penalidaes (a la vuelta sofrieron escorbutu y ceguera de la nieve) dizse que Shackleton y Scott nun pegaben xuntos. Shackleton yera civil, y Scott militar; amás, dizse que Shackleton tenía un calter de xefe "humanu", mentantu Scott yera más bien autoritariu y egocéntricu.

La espedición del Nimrod[editar | editar la fonte]

La siguiente espedición de Schackleton iguóla él mesmu y foi'l xefe. Foi la Espedición Antártica Británica (British Antarctic Expedition), de 1907 a 1909, col envís d'algamar el Polu Sur. Tamién la llamen la Espedición del Nimrod (el barcu emplegáu nella) o la Espedición del Sur Más Llonxanu.

Shackleton iguó la so base na Islla de Ross, y viendo lo mal que yos fuera colos perros na espedición del Discovery (anque fuera pola so culpa), llevó caballos (ponis manchures). Pero esto nun salió bien tampoco.

Nesta espedición esguilaron al Monte Erebus, atoparon ú taba'l Polu Sur magnéticu, y alcontraron el pasu del Glaciar Beardmore, que foi la clave pa poder pasar a la meseta antártica de camín pal Polu Sur. Shackleton y los sos collacios foron les primeres persones que cruzaron la Cordillera Transantártica y anduvieron pola meseta. Pero dieron la vuelta cuando taben a 88º 23' S, a namás que 180 km del Polu.

Shackleton volvió pan casa como un héroe y ficiéronlu caballeru. De la espedición Shackleton dixo: "Meyor ser un monu vivu qu'un lleón muertu". La so decisión de dar vuelta tan cerca del so oxetivu considérase un exemplu de mandu intellixente. En realidá, salvaron la vida por mui poco; nun teníen comida abondo, y aportaron al puertu xusto la nueche enantes del día nel que'l barcu tenía la orde de marchar si nun taben de vuelta.

La espedición del Endurance[editar | editar la fonte]

La Espedición Imperial Transantártica (Imperial Trans-Antarctcic Expedition) salió de Londres el 1 d'agostu de 1914. Roald Amundsen ya algamara'l Polu Sur, polo que nun tenía xacíu intentalo otra vegada; l'oxetivu d'esta espedición (tamién nomada "del Endurance" por ser el nome del barcu nel que diben) yera ser los primeros en cruzar el continente antárticu. Dizse que pa buscar tripulantes Shackleton puso un famosu anunciu nel periódicu: "Búsquense homes pa viaxe peligrosu. Paga pequeña. Fríu tremendu. Llargos meses d'oscuridá completa. Peligru constante. Ye duldoso volver sanos y salvos. Honor y reconocimientu en casu d'ésitu." Pero nun tá demostrao qu'esto seya verdá (naide nun atopó'l periódicu col anunciu).

Esta vegada, envede dir a la Islla de Ross (cerca Nueva Zelanda) diben desembarcar na Bahía Vahsel, nel otru llau (cerca Arxentina y Chile), nel Mar de Weddell, y cruzar pel Polu Sur dica la Islla de Ross. Pero cuando taben cerca Vahsel, el xelu atrapó'l barcu (el 18 de xineru de 1915) y nun pudieron aportar a tierra.

Entamó entós la increíble aventura de Shackleton y los sos homes. El barcu foi arrastráu dapoco pola placa de xelu, primero pal Sur y llueu pal Norte. El 1 de mayu fízose de nueche (pa cuatro meses). El 27 d'ochobre Shackleton mandó dexar el barcu, y el 21 de payares el xelu terminó de romper el barcu, que se hundió.

Entós el campamentu entamó a viaxar sol témpanu nel que taben, arrastráu a la deriva pola corriente, porque nun yeren a avanzar a pie. Tuvieron qu'acabar matando y comiendo los perros que quedaben. El 31 de marzu de 1916 el témpanu (que diba fundiéndose según diben pal Norte) rompió, y cásique pierden les barques.

El 7 d'abril vieron la Islla Elefante, y el 9 montaron nes tres barques que teníen con tolo que pudieron llevar. Dempués de lluchar una selmana contra'l mar, aportaron a la islla'l 16 d'abril. Llevaben yá 15 meses atrapaos nel xelu.

Na islla nun había cásique nada que facer, y Shackleton decidió garrar una barca (el James Caird) y dir a les Islles Xeorxa del Sur, que taba a 1.300 km nún de los mares más peligrosos del mundu. Con otros 5 homes salió'l día 24, y dempués de 17 días de lluchar coles tormentes, nun viaxe que pue considerase cuasi imposible de facer (y más nuna barca de 7m), aportaron a la costa oeste de Xeorxa del Sur.

El problema yera que la parte onde había xente na islla yera l'este, onde había estaciones balleneres. Shackleton, Worsley y Crean tuvieron que cruzar los montes y los glaciares de la islla (que taben completamente inesploraos) y dempués d'un viaxe perpeligrosu de 36 hores seguíes aportaron a la estación de Stromness.

Pa rescatar a los sos collacios de Islla Elefante, tuvieron que facer dellos intentos porque'l xelu nun dexaba a los barcos algamar la islla. Tamién hebo problemes políticos; el mundu taba inmersu na Primer Guerra Mundial, y yera perdifícil alcontrar un barcu que pudiera dedicase al rescate. Al final, consiguieron rescatar a la tripulación de Islla Elefante col Yelcho, un barcu chilenu, el 30 d'agostu de 1916. Pasaren 22 meses dende que salieren de les Islles Xeorxa del Sur dica la Bahía Vahsel.

Nengún de los 28 homes de Shackleton morrió na espedición. Aparte del so valor históricu o como aventura, la espedición del Endurance recuérdase comu un exemplu de lideralgu. Hai que pensar que'l equipu tuvo 22 meses nel xelu, pasando tremendos peligros y penalidaes, ensin muncho que facer. Shackleton consiguió mantenelos a toos xuníos, da-yos rutines y disciplina pa soportar la tremenda preba sicolóxica, iguar los grupos colos homes más afayaízos en cada casu pa que nun chocaren ente ellos (en circunstancies nes que sería perfácil que xurdieren discusiones), y sofitar la so moral pa que nun se viniesen abaxo magar nun saber qué diba ser dellos.

Tumba de Shackleton.

La cabera espedición[editar | editar la fonte]

El 5 de xineru de 1922 Shackleton morrió d'un ataque al corazón nel so barcu, Quest, alredor de Islles Xeorxa del Sur cuando diba pa otra espedición na Antártida. Taben llevando'l so calabre pa Inglaterra, pero la so viuda pidió que lu enterraren en Grytviken, na mesma Xeorxa del Sur, onde lu enterraron el 5 de marzu.

Referencies[editar | editar la fonte]

  1. 1,0 1,1 Biblioteca Nacional de Francia. «autoridaes BNF» (francés). Consultáu'l 10 ochobre 2015.
  2. URL de la referencia: http://www.bbc.co.uk/history/historic_figures/shackleton_ernest.shtml.
  3. 3,0 3,1 Afirmao en: Kindred Britain.
  4. Biblioteca Nacional de Francia. «autoridaes BNF» (francés). Consultáu'l 10 ochobre 2015.

Enllaces esternos[editar | editar la fonte]