Saltar al conteníu

Encarnación Magaña Gómez

De Wikipedia
Encarnación Magaña Gómez
Vida
Nacimientu Tabernas[1], 30 de payares de 1921[1]
Nacionalidá España
Muerte Almería[2], 11 d'agostu de 1942[1] (20 años)
Causa de la muerte mancada por arma de fueu[1]
Estudios
Llingües falaes castellanu
Oficiu
Oficiu anarquista
Miembru de Confederación Nacional del Trabayu
Federación Ibérica de Juventudes Libertarias (es) Traducir
Mujeres Libres (es) Traducir
Cambiar los datos en Wikidata

Encarnación Magaña Gómez (30 de payares de 1921, Tabernas – 11 d'agostu de 1942, Almería), conocida tamién como Encarnita Magaña y como Encarnación García Córdoba, foi una anarquista llibertaria española que morrió fusilada en siendo xulgada nel Parte Inglés, lo que la convirtió na única muyer fusilada mientres la posguerra na provincia de Almería.[6][7]

Biografía

[editar | editar la fonte]

Magaña nació na llocalidá almeriense de Tabernas el 30 de payares de 1921.[7] Quedó güérfana a edá temprana al finar la so madre, Dolores Gómez Soriano, ama de casa, y el so padre José Magaña Rosa, xornaleru.[6] Tres ello, foi adoptada por Rafael García Montesinos y Epifanía Córdoba Tortosa, recibiendo tamién los sos apellíos.[8]

Desenvolvió'l so compromisu políticu ya intelectual na so mocedá, ingresando na Federación Ibérica de Mocedaes Llibertaries, una organización xuvenil anarquista onde foi secretaria y dempués presidenta interina de Muyeres Llibres.[6][7] Amás perteneció a la Confederación Nacional del Trabayu y trabayó como dependienta de la Llibrería Inglesa d'Almería.[9] Tres el final de la guerra Magaña empezó la so oposición al franquismu de manera organizada.[8][9]

Casó con José Hernández Ojeda, xunto al que realizó actividaes de baturiciu y propaganda. Magaña entamó nel Teatru Cervantes d'Almería'l festival benéficu de la Solidaridá Internacional Antifascista, amás de les visites a los milicianos anarquistes nos frentes de Granada para lleva-yos prensa y comida. El 3 d'agostu de 1939, ingresó per primer vegada na cárcel provincial de muyeres d'Almería, la llamada Gachás colorás, dende onde siguió cola so actividá política al serviciu del Socorru Coloráu Internacional ente los presos políticos antifascistes y l'esterior.[6][10] Foi puesta en llibertá en primavera de 1940.[6]

El Parte Inglés

[editar | editar la fonte]

Aprovechando'l so trabayu na Llibrería Inglesa, Magaña, al pie d'otros antifascistes dirixíos por Joaquín Villaespesa Quintana, encargóse de traducir y copiar los partes de les noticies de la BBC británica sobro la Segunda Guerra Mundial que dempués distribuyíen n'Almería y Xibraltar dientro de la publicación antifranquista El Campense, a favor de los aliaos na guerra contra l'Alemaña nazi d'Adolf Hitler.[9][10]

Un chivatazu delató a Magaña énte les autoridaes franquistes, siendo detenida por espublizar propaganda subversiva y ser integrante d'una organización clandestina pol Serviciu d'Investigación de FET y de les JONS. Foi encarcelada'l 24 de marzu de 1941, y nun volvió salir nunca más en llibertá.[6][9] Munchos de los sos compañeros na organización fueron deteníos un mes dempués.[6] Fueron procesaos nun xuiciu conocíu como'l Parte Inglés, con gran trescendencia na posguerra almeriense, onde Magaña foi condergada a pena de muerte nuna sentencia exemplificadora, xunto a otros ocho compañeros nun xuiciu con poques garantíes procesales.[6][11]

Magaña foi executada con 20 años d'edá n'Almería na madrugada del 11 d'agostu de 1942 xunto a Joaquín Villaespesa Quintana, Cristóbal Company García, Francisco García Luna, Justo Ruiz Pelegrina, Juan Hernández Granados, Diego Molina Matarín y Francisco Martín Vázquez, y foi soterrada nuna fuesa común al pie de dos d'ellos. Foi la única muyer fusilada mientres el franquismu n'Almería.[6]

Reconocencies

[editar | editar la fonte]

En 2020, una cai de Tabernas foi bautizada col nome d'Encarnación Magaña como reconocencia a la so llucha pola llibertá, siendo la primer cai d'esa llocalidá almeriense con nome de muyer.[9][12]

La historia d'Encarnación Magaña y la de los otros ocho fusilaos xunto a ella ta recoyida nel llibru El Parte Inglés. La lucha antifranquista desde la clandestinidad en Almería  de la editorial Círculo Rojo, a partir de la investigación del historiador Eusebio Rodríguez Padilla.[6][13]

Referencies

[editar | editar la fonte]
  1. ↑ 1,0 1,1 1,2 1,3 URL de la referencia: http://www.dipalme.org/Servicios/IEA/edba.nsf/xlecturabiografias.xsp?ref=291.
  2. ↑ «Diccionario Biográfico de Almería» (castellanu). Instituto de Estudios Almerienses.
  3. ↑ «Encarnación Magaña, la primera mujer con una calle en Tabernas» (castellanu). La Voz de Almería. Consultáu'l 25 xunu 2024.
  4. ↑ «Encarnación Magaña Gómez» (castellanu). Todos los nombres. Consultáu'l 25 xunu 2024.
  5. ↑ URL de la referencia: http://historiamujeres.es/vidas/magana_gomez.pdf.
  6. ↑ 6,00 6,01 6,02 6,03 6,04 6,05 6,06 6,07 6,08 6,09 «Encarnación Magaña, la única mujer fusilada en la Almería franquista». www.publico.es. Consultáu'l 2020-12-21.
  7. ↑ 7,0 7,1 7,2 «Encarnación Magaña Gómez | Todos los Nombres». www.todoslosnombres.org. Consultáu'l 2020-12-21.
  8. ↑ 8,0 8,1 «La única mujer asesinada en Almería por el franquismo: una heroína fusilada con solo 19 años por luchar contra Franco y Hitler» (castellanu). El Plural. Consultáu'l 2020-07-26.
  9. ↑ 9,0 9,1 9,2 9,3 9,4 «Encarnación Magaña, la primera mujer con una calle en Tabernas» (castellanu). www.lavozdealmeria.com. Consultáu'l 2020-07-26.
  10. ↑ 10,0 10,1 «'El Parte Inglés' que le costó la vida a la almeriense Encarnación Magaña» (castellanu). Almeria is Different (2020-07-06). Consultáu'l 2021-02-01.
  11. ↑ Almeria, Diario de (2010-07-05). «Los crímenes de la represión franquistaEl caso del Parte Inglés» (castellanu). Diario de Almería. Consultáu'l 2020-07-26.
  12. ↑ REDACCION. «Encarnación Magaña será la primera mujer que da nombre a una calle en Tabernas - Almería Información» (castellanu). www.almeriainformacion.com. Archiváu dende l'orixinal, el 13 d'agostu de 2020. Consultáu'l 2020-12-21.
  13. ↑ «Eusebio Rodríguez recupera la figura de Encarnita Magaña». Consultáu'l 2020-07-26.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Encarnación_Magaña_Gómez&oldid=4358186»