El Paisano: Un retrato colectivo
El Paisano: Un retrato colectivo  | |
|---|---|
| Datos | |
| Títulu orixinal | El paisano: Un retrato colectivo (es) |
| Xéneru | documental |
| País d'orixe | España |
| Estrenu | 2005 |
| Idioma orixinal | asturianu y castellanu |
| Duración | 88 min |
| Ficha téunica | |
| Direición | Ramón Lluís Bande |
| Producción | Vera Robert |
| Guión | Ramón Lluís Bande |
| Música | Víctor Manuel |
| Ver llista completa | |
| Enllaces esternos | |
| Ficha n'IMDb | |
| Ficha en FilmAffinity | |
 | |
El Paisano: Un retrato colectivo ye un llargumetraxe documental estrenáu en 2005, dirixíu y escritu por Ramón Lluís Bande. La película céntrase na figura d'Horacio Fernández Inguanzo (conocíu como «El Paisano»), un líder históricu del Partíu Comunista d'España (PCE) y activista social d'Asturies, valiéndose de la so biografía como filu conductor pa pescudar na historia de la resistencia antifranquista y la memoria democrática na rexón. El documental ye parte de la filmografía del Nuevu Cine Asturianu.
Argumentu
[editar | editar la fonte]La película nun s'enfoca namái na vida d'Horacio Fernández Inguanzo, emplégalu como'l nuedu d'un retratu colectivu de la llucha obrera y política n'Asturies mentanto la dictadura de Francisco Franco. Per aciu de catorce testimonios, una carta y un cantar, el documental detalla los episodios clave de la vida clandestina y la represión franquista.[1]
Los temes centrales que s'abarquen incluyen: la vida de la guerrilla, la llucha poles condiciones llaborales, la güelga xeneral revolucionaria de 1962 y el papel cimeru de les muyeres na resistencia antifascista.
Testimonios
[editar | editar la fonte]Los testimonios recoyíos son los de Manuel García Fonseca «El Polesu», Gerardo Díaz Solís «El Portu», Ángel Zapico Fernández «Gelín», Ana Sirgo «Anita la de Lada», Azucena Álvarez García, Primitiva Sánchez Faes, Manuel Otones, Senén Fernández Fernández, Policarpio, Vicente García Solís, Conchita Valdés, Manuel Rodríguez Rodríguez, Juan Fernández Ania y Clementina Fernández Inguanzo.[2]
Equipu técnicu y producción
[editar | editar la fonte]El documental foi producíu por Robert PC y la Fundación Horacio Fernández Inguanzo, cola participación de la Fundación Juan Muñiz Zapico. La música cuerre al cargu del cantautor asturianu Víctor Manuel que, en 1976, dedicó-y a Horacio Fernández Inguanzo la canción «El paisano».[3][4]
Reconocimientos
[editar | editar la fonte]El documental proyectóse en dellos foros de memoria histórica y festivales de cine documental n'España. Foi mencionáu como parte de la filmografía del Nuevu Cine Asturianu.
Reacciones
[editar | editar la fonte]Ramón Lluís Bande foi construyendo nos márxenes del cine español, entamando a facelo cuando tovía yera más complicao qu'agora'l poder rodar dende la independencia dafechu, una filmografía alloñada de la complacencia, dende una postura personal y política –que vien a ser lo mesmo– y a partir d'un trabayu cinematográficu nidiamente militante afitáu na ellaboración d'un discursu propiu y reflexonáu. En 2003, col mediumetraxe Extratexa, Bande retrataba al guerrilleru comunista Manuel Alonso González, al que tamién-y dedica'l so curtiumetraxe Sangre (2010). Nel mediumetraxe De la Fuente (2014) centrábase na figura figura d'Aida de la Fuente, figura mítica de la revolución asturiana d'ochobre de 1934 asesinada polos fascistas, y n'El Paisano: un retrato colectivo (2005) llevaba a cabu un averamientu a Horacio Fernández Inguanzo, ‘El Paisano', creando a partir d'él un rellatu más ampliu. Toos estos trabayos, de distinta duración y metodoloxía variada, funcionen de forma individual, pero nel so conxuntu y amestándo-yos Equí y n'otru tiempu y El nome de los árboles, podríemos dicir que cada película ye como una pieza d'un tou coherente nel so desendolque, que se complementa y s'enancha, arriqueciéndose con cada amiestu.Israel Paredes (El estado mental).[5]
Referencies
[editar | editar la fonte]- ↑ «El Paisano: Un retrato colectivo (2005)». FilmAffinity.
- ↑ «El Paisano. Un retrato colectivo de Ramón Lluís Bande». lagavillaverde.org.
- ↑ «Significado de la canción EL PAISANO (Victor Manuel)». Letras.com.
- ↑ «Victor Manuel, pregonero en San Mateo y concierto 'Cincuenta años no es nada». RTPA (21 de febreru de 2014).
- ↑ «El ataque del presente al resto de los tiempos | El Estado Mental». elestadomental.com.
Enllaces esternos
[editar | editar la fonte]- Ficha d'El Paisano: Un retrato colectivo na Internet Movie Database
- Ficha d'El Paisano: Un retrato colectivo en FilmAffinity
| Control d'autoridaes |
|
|---|
Datos: Q137194902