El Club Musical

De Wikipedia
Saltar a navegación Saltar a la gueta
Programa de televisiónEl Club Musical
Datos
País d'orixe España
Llingua orixinal asturianu
Emisión
Emisora A7
Fecha de principiu 14 xunetu 2013
Varios
Cambiar los datos en Wikidata

El Club Musical ye un programa de TPA que s'estrenó'l domingu 14 de xunetu del 2013, a les 23:30 hores (amás de la so redifusión pela RPA los xueves a les 00:00 hores), y ye’l primer programa d'estes carauterístiques na TPA. L'espaciu ta dirixíu y presentáu por Xune Elipe y quier valir d'escaparate y apoyu a la bayurosa escena sonora asturiana, asina, pelos trece capítulos que tien la primer temporada pasaron bandes y solistes que representen estilos y tendencies estremaes dientro d'ella. Goxe Producciones foi la encargada de llevar alantre esti proyeutu que tuvo xestándose a lo llargo de los dos años, nesi tiempu la productora axuntó un equipu de persones bien conocíes nel ámbitu musical y audiovisual del país, casu de Javier Lueje (realizador), Pablo Quiroga o Guillermu Fernández (cámares), Rubén Álvarez (soníu), Tamara Rosa (rexidora), Víctor Vivar (illuminación) o Jorge Cambareli (sintonía), ente otros.

El Club Musical ye un espaciu que quier ser reflexu de la diversidá, dinamismu y calidá del panorama musical asturianu, mostrando a los grupos y intérpretes nel so hábitat natural: les actuaciones en direuto. El so oxetivu últimu ye apoyar a los creadores musicales locales dende una perspeutiva xeneral, ye dicir, ensin llendes en cuantes a los estilos o tendencies, dando entrada a les propuestes más variaes: rock, folk, jazz, pop, canción d'autor, hip hop... tean éstes cantaes n’asturianu, castellanu, inglés o cualquier otru idioma. Como complementu inclúise tamién una entrevista pa conocer meyor cada banda o artista y saber de les sos influencies, trayeutoria, proyeutos o grabaciones. El programa empieza en toles entregues con un reportaxe curtiu sobre’l protagonista de cada nueche pa, darréu, dir alternando actuación en direuto con entrevista, amás de facer tamién recomendaciones bibliográfiques (cómics, ensayos, etc) sobre l'estilu musical que practique la banda o intérprete convidáu.

La primer temporada tien trece capítulos, que se desenvolvieron na Sala Club del Centru Cultural Internacional Oscar Niemeyer, la Fundación de Música Moderna d'Avilés y el Teatru El Llar, de Corvera. Per esos escenarios pasaron nomes veteranos y mui conocíos o intérpretes nuevos que despuntaron, ufiertando una visión amplia de la música que se ta faciendo anguaño n’Asturies. Los primeros episodios van tar dedicaos a: Blues & Decker, Lorena Álvarez y su Banda Municipal, Crudo, El Patio de tu Casa, Alexandra in Grey, Toli Morilla, Skama la Rede, Dr. Explosion, Pauline en la Playa, Patrulla Dixie, La Bandina, Misiva y Felpeyu.

La llingua vehicular d'El Club Musical ye l'asturianu, tanto nos reportaxes, como nes entrevistes o créitos, independientemente de que los músicos protagonistes canten o s’espresen en castellanu. Nesti sen, búscase la normalidá y naturalidá en cuantes al aspectu llingüísticu, rellacionando de pasu al nuestru idioma con un tema «modernu» y «contemporaneu» como pue ser la música más actual. Otra manera, un porcentaxe curiosu de los protagonistes d'esta primer temporada empleguen l'asturianu nes sos composiciones.

Ésta va ser la primer incursión nel terrén audiovisual del direutor y presentador del programa, Xune Elipe, depués d'años de trabayar na edición discográfica, bibliográfica o radiofónica, con proyeutos como Discos L'Aguañaz, Anuariu de la Música Asturiana o Rockmería, amás de la so faceta como miembru del grupu Dixebra.