El Astillero (Disculpen las molestias)

El Astillero
Datos
País d'orixe	España
Estrenu	2007
Ficha téunica
Direición	Q136786362
Repartu	Fernando León de Aranoa y Javier Bauluz
Ver llista completa
Enllaces esternos
Ficha n'IMDb

El astillero (Disculpen las molestias) ye una película documental española estrenada en 2007, dirixida por Alejandro Zapico. La película rellata la historia del conflictu llaboral y les lluches sindicales de los trabayadores del astilleru Naval Xixón na defensa de los sos puestos de trabayu frente a la reconversión industrial.

Argumentu

El documental cubre siete años (aproximao, hasta 2007) de la gran llucha obrera nel astilleru Naval Xixón. El director del documental Alejandro Zapico recueye les asamblees sindicales, les movilizaciones, los enfrentamientos cola policía y el trabayu diariu nel astilleru.

La película céntrase na resistencia de los trabayadores énte la solombra de la reconversión industrial, que se traduz en despidos y prexubilaciones. El rellatu pon el ramu cola entrada na cárcel y lliberación posterior de los líderes sindicales Cándido González Carnero y Juan Manuel Martínez Morala, y el gran sofitu social que xeneró la so causa, exemplificáu en permunches manifestaciones de solidaridá. El documental busca amosar que la llucha yera por daqué más qu’un emplegu, tamién por otra concepción del trabayu y la dignidá d’unos homes que-y dedicaron al astilleru una gran parte de la so vida.

Intervenciones

•  Cándido González Carnero (Sindicalista)
• Juan Manuel Martínez Morala (Sindicalista)
• Fernando León de Aranoa (cineasta)

Producción

Zapico entamó la grabación nel añu 2000 pa recoyer el conflictu. El rodaxe duró siete años, dende’l despidu de doscientos eventuales aquel añu hasta la entrada y salida de la cárcel de los líderes sindicales Cándido y Morala en 2007.

La película foi producida por Piraván, El Ballenero y Señor Paraguas, col periodista ganador del Premio Pulitzer, Javier Bauluz, como ún de los productores. El montaxe tuvo al cargu del realizador Juan Tizón y el guión foi de Julio Rodríguez.

Estrenu

El documental estrenóse nel Festival Internacional de Cine de Xixón (FICX) en payares de 2007.

Recepción

A lo llargo d’estos siete años, Alejandro Zapico recoyó les intenses asamblees sindicales nes que se decidía’l futuru llaboral de los compañeros, les movilizaciones y enfrentamientos cola policía, el trabayu nel astilleru. Pero sobre too, el director dio la pallabra a unos trabayadores que lleven conviviendo cola solombra de la reconversión industrial de magar décades, que nel so casu traduzse en despidos y prexubilaciones. (...) 'El Astillero (Perdonen las molestias)' ye un llargumetraxe que non solo esplica la llucha d’esti astilleru, sinón que retrata tou un sistema económicu que determina cada día de les nuestres vides y énte’l qu’un grupu d’homes y muyeres se llevanta, col sindicalismu como arma principal. La Nueva España.

Emotiva y bien realizada, el silenciu na sala ye más qu’elocuente, llega al espectador, atrápalu y conviértelu en cómpliz y amiéstalu a la trama faciéndola de so. Paez ciencia ficción, pero nun lo ye, l’espectador sábelo, los protagonistes –les víctimes– son munchos, tán a la vera y los fechos son más que conocíos; ye, amás, de dalguna manera, la segunda parte de «Los lunes al Sol». Miguel Ángel Llana.

Referencies

• Datos: Q136786349