Dolores O'Riordan

De Wikipedia
Artículu revisáu
Dolores O'Riordan
Vida
Nacimientu Ballybricken[1]6 de setiembre de 1971[2]
Nacionalidá Bandera de Irlanda República d'Irlanda
Muerte Mayfair[3]15 de xineru de 2018[4] (46 años)
Sepultura Herbertstown (en) Traducir
Causa de la muerte caída (es) Traducir[5]
Familia
Casada con Don Burton (en) Traducir (1994 – 2014)[6]
Fíos/es 3[6]
Estudios
Llingües falaes inglés[7]
Oficiu música, cantautora, guitarristacantante
Nominaciones
Influyencies Duran Duran y The Smiths
Miembru de The Cranberries
D.A.R.K.
Xéneru artísticu rock alternativu
pop rock
Rock celta (es) Traducir
Folk rock
Jangle pop
dream pop (es) Traducir
Indie rock
Post-grunge
Mena de voz mezzosopranu
Instrumentu musical voz
tecláu
guitarra
flauta irlandesa (es) Traducir
flauta
Mandolina
Discográfica Interscope Records
Sanctuary Records
Cooking Vinyl (es) Traducir
Rounder Records (es) Traducir
Creencies
Relixón catolicismu[8]
IMDb nm0642512
doloresoriordan.com
Cambiar los datos en Wikidata

Dolores Mary Eileen O'Riordan Burton (6 de setiembre de 1971Ballybricken – 15 de xineru de 2018Mayfair) foi una cantante irlandesa, conocida por ser la vocalista femenina de la banda de rock The Cranberries.[9]

Biografía[editar | editar la fonte]

Infancia[editar | editar la fonte]

Dolores Mary Eileen O'Riordan Burton nació'l 6 de setiembre de 1971. A los dos díes de nacer, el so padre, Terence, sufre un tarrecible accidente mientres viaxaba na so motocicleta. De resultes, Terence queda paralíticu y vese obligáu a vivir nuna siella de ruedes.

Por mor de la condición del cabeza de familia, que trabayaba y vivía de les sos colleches, los hermanos de la pequeña Dolores faense cargu d'elles, mientres que Eileen, la madre de Dolores, divide'l tiempu ente'l so trabayu nun pequeñu snackbar y el cuidáu y l'atención de la reciella. Nesi tiempu, los O’Riordan vivíen nun área agrícola, nuna casa bien pequeña, que tenía namái dos habitaciones pa los 9 integrantes de la familia.

Pa 1974, cuando Dolores yá tenía 3 años, yera bien común vela cantando per tolos rincones de la casa, del colexu y de la ilesia.

De magar los 5 años, empezó a cantar y a tocar l'órganu na ilesia. Entonaba cantares tradicionales ya himnos eclesiásticos; asina foi como descubrió qu'esa yera la so verdadera pasión.

En 1978, con 7 años d'edá, tien unu de los sos primeros traumes por cuenta de que la so hermana mayor causa por accidente una quema dientro de la casa. Los O'Riordan entós queden ensin un techu onde vivir, polo que la vecindá ayúdalos a construyir un llar nuevu, esta vez, muncho más grande que l'anterior, pa que pudieren vivir con más comodidaes.

Dolores yera una neña fuera de lo común, nun-y prestaba l'estereotipu de comportamientu d'una neña permediu, nin xugar col restu de les moces: ella quería más pasar el tiempu xugando colos sos hermanos.

Dende pequeña quixo ser más llibre, decidir por ella mesma, daqué qu'envidiaba de los sos hermanos varones y del restu de los mozos. Por estes y otres razones, avézase a llevar el pelo bien curtio, pa confundise ente los mozos, tapeciendo cualquier niciu de feminidá. Dolores nun solía usar ropa colorío nin vistíos llargos. Quería ser como los sos hermanos; ellos siempres usaben ropa escuro, y gustába-yos salir en coche y pasalo bien.

En 1981, cuando yá tenía 10 años d'edá, empezó a trabayar cola so madre.

En 1983, Dolores escribe'l so primer cantar, a los 12 años; el tema titulábase «Calling», y falaba sobre'l so primer amor, un home mayor qu'ella y que, amás, yera'l so maestru nel colexu. Na escuela, la pequeña Dolores siempres foi tachada como la neña rara y col nomatu The girl who writes songs (‘la moza qu'escribe cantares’). Ellí nunca tuvo munchos amigos.

Cuando Dolores yera una adolescente, gustába-y enforma la música sacra, polo que tamién formaba parte del coru de la Ilesia a la qu'asistía. El pop formó una parte bien importante de los sos gustos; encantába-y sentir grupos como Duran Duran y The Smiths, y almiraba a Sinéad O'Connor y a Patsy Cline.

Entamu con The Cranberries[editar | editar la fonte]

Ella y el so grupu fixéronse mundialmente conocíos con «Zombie», un cantar que denunciaba la situación n'Irlanda del Norte, rexón del Reinu Xuníu que sufrió enfrentamientos armaos ente católicos y protestantes mientres décades. Darréu consiguiríen otros grandes ésitos con cantares como «Ode to my family», «When you're gone», «I can't be with you», «Salvation», «Free to decide», «Promises», «Animal instinct» y «Just my imagination», y delles más que son unos verdaderos cenciellos; pero los sos primeros pasos diéronlos con «Dreams» y «Linger», clásicos de la música n'inglés.

Dolores O'Riordan entamó la so carrera con grandes enfrentamientos cola prensa sensacionalista británica, que la maltrató mientres dellos años, especialmente en 1996, cuando se dixo que Dolores sufría d'anorexa.

Tuvo una quebra na rótula que la obligó a suspender la xira Free to decide world tour. Les coses reconduciéronse cuando en 1999 publicó'l discu Bury the hatchet (lliteralmente ‘enterremos l'hachu’), títulu que dexaba bien claro la so intención de partir dende cero.

Los sos cantares son bien autobiográficos. Unu de los sos mayores momentos de fama foi cuando interpretó l'Ave María de Schubert, con Luciano Pavarotti, nel conciertu Pavarotti & friends: together for the children of Bosnia (1995), cantar que darréu formaría parte de la banda sonora de la película La Pasión de Cristu (2004). Nesti conciertu tamién cantó «Linger», con de Simon Le Bon, del grupu Duran Duran, y el tema «Nessun dorma» con tolos artistes, a la fin del conciertu.

Dempués de cuasi 7 años d'inactividá, el grupu The Cranberries axuntóse pa facer una xira mundial qu'empezó n'avientu de 2009 y que remató en payares de 2010. Esta xira llevó a la banda per tercer vegada a Llatinoamérica; ente los países visitaos tuvieron Arxentina, Chile, Perú, Ecuador, Venezuela, Méxicu y Brasil.

Carrera en solitariu[editar | editar la fonte]

Dolores robló un contratu cola compañía discográfica independiente Sanctuary Records, y llanzó'l so discu como solista en mayu de 2007. L'álbum llevó por nome Are you listening?.

Según les pallabres de Dolores, esti discu

Ye diferente dafechu a The Cranberries. Nun escribiera dalgo tan escuro y personal como esto con ellos.
Dolores O'Riordan pa Hot Press.

Dolores O'Riordan tuvo de cancelar siete presentaciones por cuenta d'una enfermedá, terminando anticipadamente la xira. El tour incluyó Asia, Europa y América (per primer vegada visitó Suramérica), sumando cuasi cincuenta presentaciones. El gran recibimientu de los hispanofalantes foi bien prestosu pa ella, declara Dolores: «Tengo munches alcordances prestoses [...]. Prometí volver el próximu añu a Sudamérica, a llugares como Arxentina, Chile, Brasil, Perú... Dexáronme totalmente ablucada. Llamento enforma nun venir primero colos mios compañeros de siempre, The Cranberries».

O'Riordan con pelo llargo, promocionando'l so álbum debú en solitariu Are you listening? en 2007.

En xunu de 2007, Sanctuary Records foi adquirida por Universal Music Group.[10] Poro, suspendióse la promoción del segundu single, «When we were young» de Are you listening?.[11] Según Don Burton, nun pudo comunicase colos representantes d'Universal pa intentar llegar a un arreglu.

Ye de destacar la so participación na película Click: na escena del casoriu del fíu d'Adam Sandler na película, Sandler y Kate Beckinsale baillen el so cantar d'amor, «Linger», cantada por una banda y de vocalista, Dolores.

N'agostu de 2009, Dolores O'Riordan publicó'l so segundu álbum como solista, tituláu No baggage[12], y el so primer cenciellu titulóse «The journey». Esti álbum nuevu supunxo una inmersión nueva nes sos vivencies personales, con soníos esperimentales y con temes bien intimistes. Esti mesmu añu xuntóse con Andy Rouke y Ole Koretsky pa sacar a la lluz cantares cola banda D.A.R.K

Un día dempués de la publicación de No baggage, nuna entrevista radiofónica, la cantante anunció'l regresu de The Cranberries dempués de seis años y mediu d'inactividá. Na entrevista esplicó que nel mes de payares empezaría la xira mundial n'Estaos Xuníos y Europa. Tamién s'anuncia un nuevu discu de la banda, tituláu Roses, y que se grabaría nos meses d'abril y mayu de 2011, pa ser llanzáu finalmente en febreru de 2012.

Vida personal[editar | editar la fonte]

El 18 de xunetu de 1994, Dolores O'Riordan casó con Don Burton, l'exmanager de la xira de Duran Duran. El so primer fíu, Taylor Baxter, nació'l 23 de payares de 1997, mientres el descansu ente los álbumes To the faithful departed y Bury the hatchet. Molly Leigh nació'l 27 de xineru de 2001, y Dakota Rain, el 10 d'abril de 2005.

En 1998 mercó una granxa de 61 hectárees llamáu Riversfield Stud, allugáu en Kilmallock, County Limerick. Vivió ellí mientres seis años enantes de vendela en 2004.

En 2006, Dolores O'Riordan foi incluyida ente les diez muyeres más riques d'Irlanda.

En 2009, foi gallardonada pol Patronatu d'Honor de la Sociedá Filosófica Universitaria del Trinity College de Dublín.

Dolores O'Riordan vivió en Howth, Dublín col so home y los sos trés fíos. La familia dividía'l so tiempu ente les sos cases de Dublín y una cabaña de madera asitiada en Buckhorn, Ontario (Canadá), que fuera mercada en 1994. En 2009, mudóse dafechu al so llar en Buckhorn.

Anque criada como católica, Dolores O'Riordan a la fin de la so vida yá nun prauticaba. Identificábase como una non convencional (pero relixosa) cristiana. Tamién yera una almiradora del fináu Papa Juan Pablo II. Dempués d'axuntase con él en Ciudá del Vaticanu, Dolores O'Riordan comentó: «Yera preciosu, bien santu. Taba lloca por él. Pienso que realmente s'esmolecía polos probes y qu'amaba axuntase cola xente. Cuando vieno a Limerick, cuando yo yera una neña; foi bien allucinante llevar a la mio madre a velu».

O'Riordan declarara tamién que yera provida, diciendo: «Nun toi en posición de xulgar a otres muyeres, ¿sabes?, pero quiero dicir ¿por qué s'embaracen? Nun ye nada bono pa les muyeres pasar por tol procedimientu del albuertu y facer que daqué vivo dientro de los sos cuerpos se desanicie. Esto denigra a les muyeres. Inclusive, anque delles muyeres dicen “nun m'importa facelo”, cada vez qu'una muyer fai un albuertu, esto entrapalla'l so autoestima, faciéndola más, más y más pequeña".

El 15 de xineru de 2018, con 46 años, l'artista finó de forma repentina en Londres, onde taba faciendo una grabación.[13]

Discografía[editar | editar la fonte]

Discografía con The Cranberries[editar | editar la fonte]

Álbumes

Discografía en solitario[editar | editar la fonte]

Álbumes
Cenciellos
  • 2007: Ordinary day
  • 2007: When we were young
  • 2009: The journey
  • 2009: Switch off the moment

Referencies[editar | editar la fonte]

  1. Afirmao en: Gemeinsame Normdatei. Data de consulta: 15 avientu 2014. Llingua de la obra o nome: alemán. Autor: Biblioteca Nacional d'Alemaña.
  2. Afirmao en: Gemeinsame Normdatei. Data de consulta: 2 mayu 2014. Llingua de la obra o nome: alemán. Autor: Biblioteca Nacional d'Alemaña.
  3. URL de la referencia: http://www.independent.co.uk/arts-entertainment/music/news/dolores-oriordan-dead-cranberries-age-singer-frontwoman-cause-of-death-a8160581.html.
  4. URL de la referencia: https://www.rte.ie/news/ireland/2018/0115/933526-dolores-oriordan/.
  5. «Dolores O’Riordan drowned in bath, inquest finds» (6 setiembre 2018). Consultáu'l 6 setiembre 2018.
  6. 6,0 6,1 URL de la referencia: https://www.limerickpost.ie/2018/01/15/breaking-limerick-singer-dolores-oriordan-dead-at-46/.
  7. Afirmao en: catálogu de la Biblioteca Nacional Checa. Identificador NKCR AUT: xx0043605. Data de consulta: 1r marzu 2022.
  8. URL de la referencia: https://cruxnow.com/global-church/2018/01/17/irish-bishop-recalls-cranberries-musician-faith-inspiration/. Data de consulta: 9 febreru 2018.
  9. «Muere Dolores O'Riordan, cantante de The Cranberries». 20minutos.es. Consultáu'l 15 de xineru de 2018. Muere Dolores O'Riordan, cantante de The Cranberries. http://www.20minutos.es/noticia/3235220/0/muere-dolores-oriordan-cantante-the-cranberries/. Consultáu'l 15 de xineru de 2018. 
  10. Gustavo Iglesias (20 d'avientu de 2006). «Dolores O?Riordan, sobre su disco en solitario: "Es muy diferente a Cranberries"» (castellano). Consultáu'l 16 de xineru de 2018.
  11. videoclip
  12. flamboyantrecords (29 de xunetu de 2007). «Dolores O'Riordan: When we were young (official video) 07/07». Consultáu'l 16 de xineru de 2018.
  13. Guimón, Pablo (2018-01-15). «Muere Dolores O'Riordan, la cantante de The Cranberries». EL PAÍS. Consultáu'l 2018-01-15.Guimón, Pablo (2018-01-15) (en castellanu). Muere Dolores O'Riordan, la cantante de The Cranberries. https://elpais.com/cultura/2018/01/15/actualidad/1516036345_795575.html. Consultáu'l 2018-01-15. 

Enllaces esternos[editar | editar la fonte]